ವಾಷಿಂಗ್ಟನ್: ಮೊದಲ ಭಾರತ ಪ್ರವಾಸಕ್ಕಾಗಿ ಎದುರು ನೋಡುತ್ತಿರುವುದಾಗಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ತಿಳಿಸಿದ್ದು, ಉಭಯ ರಾಷ್ಟ್ರಗಳು ವ್ಯಾಪಾರ ಒಪ್ಪಂದಗಳಿಗೆ ಸಹಿ ಹಾಕಲಿವೆ ಎಂಬ ಸೂಚನೆಯನ್ನು ನೀಡಿದರು.
ಪ್ರಧಾನಿ ನರೇಂದ್ರ ಮೋದಿ ಅವರ ಆಹ್ವಾನದ ಮೇರೆಗೆ ಟ್ರಂಪ್ ಫೆ. 24 ಮತ್ತು 25 ಭಾರತ ಪ್ರವಾಸ ಮಾಡಲಿದ್ದಾರೆ. ಎರಡು ದಿನಗಳ ಭೇಟಿಯಲ್ಲಿ ದೆಹಲಿ ಮಾತ್ರವಲ್ಲದೆ, ಪ್ರಧಾನಿ ಮೋದಿ ತವರು ಗುಜರಾತಿನ ಅಹಮದಾಬಾದ್ನಲ್ಲಿ ಜಂಟಿ ಸಾರ್ವಜನಿಕ ಸಭೆಯನ್ನು ಉದ್ದೇಶಿಸಿ ಮಾತನಾಡಲಿದ್ದಾರೆ.
ಮೋದಿ ಓರ್ವ ಶ್ರೇಷ್ಠ ಜಂಟಲ್ಮನ್ ಮತ್ತು ನಾನು ಭಾರತ ಪ್ರವಾಸಕ್ಕೆ ಎದುರು ನೋಡುತ್ತಿದ್ದೇನೆ. ಈ ತಿಂಗಳ ಅಂತ್ಯದಲ್ಲಿ ನಾನು ಭಾರತಕ್ಕೆ ತೆರಳಿಲಿದ್ದೇನೆ ಎಂದು ಓವಲ್ನಲ್ಲಿರು ತಮ್ಮ ಕಚೇರಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದರು. ಭಾರತ ಪ್ರವಾಸದ ದಿನಾಂಕವನ್ನು ವೈಟ್ಹೌಸ್ ಪ್ರಕಟಿಸಿದ ದಿನದ ಬೆನ್ನಲ್ಲೇ ಟ್ರಂಪ್ ಪ್ರತಿಕ್ರಿಯೆ ನೀಡಿದ್ದಾರೆ.
ಸರಿ ಎನಿಸುವ ವ್ಯಾಪಾರ ಒಪ್ಪಂದಗಳಿಗೆ ಸಹಿ ಹಾಕುವುದಾಗಿ ಇದೇ ವೇಳೆ ಟ್ರಂಪ್ ತಿಳಿಸಿದರು. ಈ ಕುರಿತು ನೂತನ ಅಮೆರಿಕ ಭಾರತೀಯ ರಾಯಭಾರಿ ತರಂಜಿತ್ ಸಿಂಗ್ ಮಾತನಾಡಿ, ಮುಂಬರುವ ಟ್ರಂಪ್ ಭಾರತ ಪ್ರವಾಸ ಮೋದಿ ಮತ್ತು ಟ್ರಂಪ್ ನಡುವಿನ ವೈಯಕ್ತಿಕ ಶಕ್ತಿಯುತ ಸಂಬಂಧದ ಪ್ರತಿಬಿಂಬವಾಗಿರಲಿದೆ ಎಂದು ಹೇಳಿದರು.
ಕಳೆದ ಮೂರು ವರ್ಷಗಳಿಂದ ಪ್ರಧಾನಿ ಮೋದಿ ಮತ್ತು ಟ್ರಂಪ್ ನಡುವೆ ಉತ್ತಮ ಸ್ನೇಹ ಬೆಳೆದಿದೆ. ನಾಲ್ಕು ಬಾರಿ ಅಮೆರಿಕ ಪ್ರವಾಸ ಸೇರಿದಂತೆ 2019ರಲ್ಲಿ ಅಮೆರಿಕದ ಹ್ಯೂಸ್ಟನ್ನಲ್ಲಿ ನಡೆದ ಹೌಡಿ ಮೋದಿ ಹೆಸರಿನ ಬೃಹತ್ ಕಾರ್ಯಕ್ರಮದಲ್ಲಿ ಮೋದಿ-ಟ್ರಂಪ್ ಭಾಗವಹಿಸಿ 50 ಸಾವಿರ ಮಂದಿಯನ್ನು ಇಂಡಿಯನ್-ಅಮೆರಿಕರನ್ನು ಉದ್ದೇಶಿಸಿ ಮಾತನಾಡಿದ್ದರು.
ಭಾರತ ಪ್ರವಾಸಕ್ಕೆ ತುಂಬಾ ಉತ್ಸುಕನಾಗಿದ್ದೇನೆಂದು ತಿಳಿಸಿದ ಟ್ರಂಪ್, ಪ್ರಧಾನಿ ಮೋದಿಯೊಂದಿಗಿನ ಫೋನ್ ಸಂಭಾಷಣೆ ಬಗ್ಗೆ ಮಾತನಾಡಿ ಹಾಸ್ಯ ಚಟಾಕಿಯನ್ನು ಹಾರಿಸಿದರು.
ಕಳೆದ ಬಾರಿಯ ಹೌಡಿ ಮೋದಿ ಕಾರ್ಯಕ್ರಮದಲ್ಲಿ ನೆರೆದಿದ್ದ ಜನರ ಸಂಖ್ಯೆ ಮೋದಿ ಅವರಿಗೆ ತೃಪ್ತಿ ತಂದಿಲ್ಲ. ಸಾಮಾನ್ಯವಾಗಿ 40 ರಿಂದ 50 ಸಾವಿರ ಮಂದಿ ಮಾತ್ರ ಇದ್ದರು. ನಾವು ಮಿಲಿಯನ್ಸ್ ಮಂದಿಯನ್ನು ಹೊಂದಿದ್ದೇವೆ ಎಂದು ತಿಳಿಸಿದರು. ಸುಮಾರು 5ರಿಂದ 7 ಮಿಲಿಯನ್ಸ್ ಮಂದಿ ವಿಮಾನ ನಿಲ್ದಾಣದಿಂದ ಅಹಮದಾಬಾದ್ನ ಸ್ಟೇಡಿಯಂವರೆಗೆ ಇರಲಿದ್ದಾರೆ ಎಂದು ಮೋದಿ ಹೇಳಿದ್ದಾಗಿ ತಿಳಿಸಿದರು.
ನಿಮಗೆಲ್ಲ ಗೊತ್ತಾ ವಿಶ್ವದಲ್ಲೇ ಅದೊಂದು ಬಹುದೊಡ್ಡ ಸ್ಟೇಡಿಯಂ. ಮೋದಿ ಅದನ್ನು ನಿರ್ಮಾಣ ಮಾಡುತ್ತಿದ್ದಾರೆ. ಅದು ಬಹತೇಕ ಪೂರ್ಣಗೊಂಡಿದೆ ಎಂದು ಇದೇ ವೇಳೆ ಹೇಳಿದರು. ಟ್ರಂಪ್ ಮಾತಿನ ಅರ್ಥ ಇಬ್ಬರು ನಾಯಕರು ಅಹಮದಾಬಾದ್ನಲ್ಲಿ ಹೊಸದಾಗಿ ನಿರ್ಮಾಣವಾಗಿರುವ ಮೊಟೇರಾ ಸ್ಟೇಡಿಯಂನಲ್ಲಿ ಸಾರ್ವಜನಿಕರನ್ನು ಉದ್ದೇಶಿಸಿ ಮಾತನಾಡಲಿದ್ದಾರೆ.
ಅಂದಹಾಗೆ ಹೊಸದಾಗಿ ನಿರ್ಮಾಣ ಮಾಡಲಾಗಿರುವ ಮೊಟೇರಾ ಸ್ಟೇಡಿಯಂ 100,000 ಆಸನ ಸಾಮರ್ಥ್ಯವನ್ನು ಹೊಂದಿದೆ. ಆಸ್ಟ್ರೇಲಿಯಾದ ಮೆಲ್ಬೋರ್ನ್ ಸ್ಟೇಡಿಯಂಗಿಂತಲೂ ಇದು ಬಹುದೊಡ್ಡ ಕ್ರಿಕೆಟ್ ಸ್ಟೇಡಿಯಂ ಆಗಿರಲಿದೆ. ಸುಮಾರು 100 ಮಿಲಿಯನ್ ಡಾಲರ್ ವೆಚ್ಚದಲ್ಲಿ ನಿರ್ಮಾಣ ಮಾಡಲಾಗಿದೆ. (ಏಜೆನ್ಸೀಸ್)