ಹಾಂಗ್ಝೌ: ಮುಹಮದ್ ಅಜ್ಮಲ್, ರಮೇಶ್ ರಾಜೇಶ್, ವಿದ್ಯಾ ರಾಮರಾಜ್, ಶುಭಾ ವೆಂಕಟೇಶನ್ ಒಳಗೊಂಡ ಭಾರತ ತಂಡ ಏಷ್ಯನ್ ಗೇಮ್ಸ್ನ 4/400 ಮೀ. ಮಿಶ್ರ ರಿಲೇ ಸ್ಪರ್ಧೆಯಲ್ಲಿ ಬಹರೇನ್, ಶ್ರೀಲಂಕಾದ ಹಿಂದೆ 3ನೇ ಸ್ಥಾನಿಯಾಗಿ ಸ್ಪರ್ಧೆ ಮುಗಿಸಿತು. ಆದರೆ ಶ್ರೀಲಂಕಾ ತಂಡ ಲೇನ್ ನಿಯಮ ಉಲ್ಲಂಘನೆ ಮಾಡಿದ್ದರಿಂದ ಸ್ಪರ್ಧೆಯಿಂದ ಅನರ್ಹಗೊಂಡಿತು. ಇದರಿಂದಾಗಿ ಭಾರತಕ್ಕೆ ಕಂಚಿನಿಂದ ರಜತ ಪದಕಕ್ಕೆ ಬಡ್ತಿ ಲಭಿಸಿತು. ಭಾರತ 3 ನಿಮಿಷ, 14.34 ಸೆಕೆಂಡ್ಗಳಲ್ಲಿ ಸ್ಪರ್ಧೆ ಮುಗಿಸಿತು. ಶ್ರೀಲಂಕಾ 3 ನಿಮಿಷ, 14.25 ಸೆಕೆಂಡ್ಗಳಲ್ಲಿ ಸ್ಪರ್ಧೆ ಮುಗಿಸಿದ್ದರೂ ಅನರ್ಹಗೊಂಡ ಕಾರಣ, ಕಜಾಕ್ಸ್ತಾನಕ್ಕೆ ಕಂಚು ಲಭಿಸಿತು.
ಆನ್ಸಿ ರಜತ ನೆಗೆತ, ಶೈಲಿಗೆ ನಿರಾಸೆ
ಮಹಿಳೆಯರ ಲಾಂಗ್ ಜಂಪ್ನಲ್ಲಿ 6.63 ಮೀ. ನೆಗೆತದ ವೈಯಕ್ತಿಕ ಶ್ರೇಷ್ಠ ನಿರ್ವಹಣೆ ತೋರಿದ ಆನ್ಸಿ ಸೋಜನ್ ರಜತ ಪದಕಕ್ಕೆ ಕೊರಳೊಡ್ಡಿದರು. ಚೀನಾದ ಶಿಖಿ ಕ್ಸಿಯೋಂಗ್ (6.73 ಮೀ) ಚಿನ್ನ ಗೆದ್ದರು. ಪದಕ ಗೆಲ್ಲುವ ಫೇವರಿಟ್ ಆಗಿದ್ದ ಭಾರತದ ಮತ್ತೋರ್ವ ಸ್ಪರ್ಧಿ ಹಾಗೂ ಮಾಜಿ ಲಾಂಗ್ಜಂಪ್ ತಾರೆ ಅಂಜು ಬಾಬಿ ಜಾರ್ಜ್ ಶಿಷ್ಯೆ ಶೈಲಿ ಸಿಂಗ್ 6.48 ಮೀ. ನೆಗೆಯಲಷ್ಟೇ ಶಕ್ತರಾಗಿ 5ನೇ ಸ್ಥಾನಕ್ಕೆ ತೃಪ್ತಿಪಟ್ಟರು.
ಪಾರುಲ್ಗೆ ಬೆಳ್ಳಿ, ಪ್ರೀತಿಗೆ ಕಂಚು
ಅಥ್ಲೆಟಿಕ್ಸ್ ಸ್ಪರ್ಧೆಯಲ್ಲಿ ಸೋಮವಾರ ನಡೆದ ಮಹಿಳೆಯರ 3 ಸಾವಿರ ಮೀ. ಸ್ಟೀಪಲ್ಚೇಸ್ನಲ್ಲಿ ಪಾರುಲ್ ಚೌಧರಿ 9 ನಿಮಿಷ, 27.63 ಸೆಕೆಂಡ್ಗಳಲ್ಲಿ ಓಟ ಮುಗಿಸಿ ಬೆಳ್ಳಿ ಪದಕ ಗೆದ್ದುಕೊಂಡರೆ, ಭಾರತದ ಇನ್ನೋರ್ವ ಓಟಗಾರ್ತಿ ಪ್ರೀತಿ 9 ನಿಮಿಷ, 43.32 ಸೆಕೆಂಡ್ಗಳಲ್ಲಿ ಓಡಿ ಕಂಚಿನ ಪದಕಕ್ಕೆ ಕೊರಳೊಡ್ಡಿದರು. ಬಹರೇನ್ನ ಯವಿ ವಿನ್ಫ್ರೆಡ್ ಮುಟಿಲ್ (9ನಿ, 18.28ಸೆ) ಕೂಟ ದಾಖಲೆಯೊಂದಿಗೆ ಚಿನ್ನ ಜಯಿಸಿದರು.
VIDEO: ಇಶ್ ಸೋಧಿ ರನೌಟ್ ಮಾಡಿ ವಾಪಸ್ ಕರೆದ ಬಾಂಗ್ಲಾ; ಹೃದಯ ಗೆದ್ದ ಕ್ರೀಡಾಸ್ಫೂರ್ತಿ!