ಆಕ್ಲೆಂಡ್: ಎರಡನೇ ಏಕದಿನ ಪಂದ್ಯದಲ್ಲಿ ಭಾರತೀಯ ತಂಡದ ವಿರುದ್ಧ ವಿರಳ ರಕ್ಷಣಾತ್ಮಕ ಆಟ ತೋರಿದ ರೋಸ್ ಟೇಲರ್ ಅವರ ಅರ್ಧ ಶತಕದ ನೆರವಿನೊಂದಿಗೆ ಕಿವೀಸ್ ಪಡೆ 8 ವಿಕೆಟ್ ನಷ್ಟಕ್ಕೆ 273 ರನ್ ಕಲೆ ಹಾಕಿದೆ.
ಈ ಸರಣಿಯಲ್ಲಿ ಟೀಂ ಇಂಡಿಯಾ ಜತೆಗಿನ ಎರಡನೇ ಏಕದಿನ ಪಂದ್ಯ ಇದಾಗಿದ್ದು, ಟೇಲರ್ 74 ಬಾಲ್ಗಳನ್ನು ಎದುರಿಸಿ ಆರು ಫೋರ್, 2 ಸಿಕ್ಸ್ ಸೇರಿ 73 ರನ್ ಕಲೆ ಹಾಕಿ ಅಜೇಯರಾಗಿ ಉಳಿದರು. ಇದು ಅವರ 51ನೇ ಅರ್ಧಶತಕ.ಆತಿಥೇಯ ತಂಡ ಎಂಟು ವಿಕೆಟ್ ಕಳೆದುಕೊಂಡು 197ರನ್ ಗಳಿಸಿ ಸಂಕಷ್ಟದಲ್ಲಿದ್ದಾಗ ಇದೇ ಮೊದಲ ಬಾರಿ ಕಣಕ್ಕೆ ಇಳಿದ ಕೈಲ್ ಜಮೀಸನ್ ಜತೆಗೂಡಿ ಒಂಭತ್ತನೇ ವಿಕೆಟ್ನಲ್ಲಿ 51 ಬಾಲ್ಗೆ 76 ರನ್ಗಳ ಜತೆಯಾಟ ಪ್ರದರ್ಶಿಸಿದರು.
ಓಪನರ್ ಮಾರ್ಟಿನ್ ಗುಪ್ಟಿಲ್ ಅವರು ಬಾಲಿಗೊಂದು ರನ್ನಂತೆ 79 ರನ್ ಗಳಿಸಿ ಉತ್ತಮ ಆರಂಭ ನೀಡಿದ್ದು, ಹೆನ್ರಿ ನಿಕೋಲ್ಸ್ 41 ರನ್ ಗಳಿಸಿ ಮೊದಲ ವಿಕೆಟ್ಗೆ 93 ರನ್ಗಳ ಜೊತೆಯಾಟ ಪ್ರದರ್ಶಿಸಿದ್ದರು.ಹದಿನೇಳನೇ ಓವರ್ ತನಕ ಉತ್ತಮ ಪ್ರದರ್ಶನ ನೀಡಿದ್ದ ಈ ಜೋಡಿಯನ್ನು ಬೇರ್ಪಡಿಸಿದ್ದು ಯಜುವೇಂದ್ರ ಚಾಹಲ್. ನಿಕೋಲ್ಸ್ ಅವರನ್ನು ಎಲ್ಬಿಡಬ್ಲ್ಯು ಬಲೆಗೆ ಕೆಡಹುವ ಮೂಲಕ ಪೆವಿಲಿಯನ್ಗೆ ಅಟ್ಟಿದ ಯಜುವೇಂದ್ರ ಆತಿಥೇಯರಿಗೆ ಮೊದಲ ಆಘಾತ ನೀಡಿದರು.ಈ ವಿಕೆಟ್ ಪತನದ ಬಳಿಕ ಮತ್ತೆ 100 ರನ್ ಗಳಿಸುಷ್ಟರಲ್ಲಿ 8 ವಿಕೆಟ್ಗಳನ್ನು ಕಳೆದುಕೊಂಡಿತ್ತು.
ಲೆಗ್ ಸ್ಪಿನ್ನರ್ ಚಾಹಲ್ 58 ರನ್ ನೀಡಿ ಮೂರು ವಿಕೆಟ್ ಗಳಿಸಿ ಗಮನಸೆಳೆದರು. ಟಿಮ್ ಸೌತಿ ಮೂರು ರನ್ಗೆ ಔಟ್ ಆದಾಗ ಕಿವೀಸ್ ಪಡೆ 200 ರನ್ ಗಡಿ ದಾಟುವುದು ಕಷ್ಟ ಎಂಬ ವಾತಾವರಣವಿತ್ತು.ಆದರೆ,ರೋಸ್ ಟೇಲರ್ ಆಸರೆಯಾದ ಕಾರಣ ಟೀಂ ಇಂಡಿಯಾಕ್ಕೆ 274 ರನ್ಗಳ ಗೆಲುವಿನ ಗುರಿ ನೀಡುವಲ್ಲಿ ಕಿವೀಸ್ ಪಡೆ ಯಶಸ್ವಿಯಾಯಿತು.
ಇದಕ್ಕೂ ಮುನ್ನ, ಈ ಸರಣಿಯಲ್ಲಿ ಇದೇ ಮೊದಲ ಸಲ ಟಾಸ್ ಗೆದ್ದ ಟೀಂ ಇಂಡಿಯಾ, ಕ್ಷೇತ್ರ ರಕ್ಷಣೆಯನ್ನು ಆಯ್ದುಕೊಂಡಿತು. ಎರಡನೇ ಪಂದ್ಯಕ್ಕೆ ಟೀಂ ಇಂಡಿಯಾ ಎರಡು ಬದಲಾವಣೆ ಮಾಡಿದ್ದು, ಯಜುವೇಂದ್ರ ಚಾಹಲ್ ಅವರು ಕುಲದೀಪ್ ಯಾದವ್ ಸ್ಥಾನಕ್ಕೂ, ಮೊಹಮ್ಮದ್ ಶಮಿ ಸ್ಥಾನಕ್ಕೆ ನವದೀಪ್ ಸೈನಿ ಅವರನ್ನೂ ಸೇರಿಸಿಕೊಂಡಿದೆ. ಮುಂದಿನ ಟೆಸ್ಟ್ ಸರಣಿಗಾಗಿ ಯಾದವ್ ಮತ್ತು ಶಮಿ ಅವರಿಗೆ ವಿಶ್ರಾಂತಿ ನೀಡಲಾಗಿದೆ. ಮೂರು ಪಂದ್ಯಗಳ ಈ ಸರಣಿಯಲ್ಲಿ ಕಿವೀಸ್ ಪಡೆ ಈಗಾಗಲೇ ಒಂದು ಪಂದ್ಯ ಗೆದ್ದುಕೊಂಡಿದೆ.(ಏಜೆನ್ಸೀಸ್)