ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿಯವರು ಮಾ.24ರಿಂದ 21 ದಿನಗಳವರೆಗೆ ಇಡೀ ಭಾರತ ಲಾಕ್ಡೌನ್ ಆಗಲಿದೆ. ಕರೊನಾ ವೈರಸ್ ನಿಯಂತ್ರಣಕ್ಕೆ ಇದೊಂದೇ ದಾರಿ ಎಂದು ತಿಳಿಸಿದರು. ಹಾಗೇ ಮಾ.25ರಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಸುದ್ದಿಗೋಷ್ಠಿ ನಡೆಸಿ, ಲಾಕ್ಡೌನ್ ಸಮಯದಲ್ಲಿ ಜನಸಾಮಾನ್ಯರ ಜೀವನಕ್ಕೆ ಅನುಕೂಲವಾಗುವಂತೆ ಮೂರು ತಿಂಗಳ ಆರ್ಥಿಕ ನೆರವಿನ ಪ್ಯಾಕೇಜ್ ಘೋಷಿಸಿದರು.
ಲಾಕ್ಡೌನ್ ಪ್ರಾರಂಭವಾಗಿ ಆರು ದಿನವಾದರೂ ಅದಕ್ಕೊಂದು ಸ್ಪಷ್ಟನೆ ಸಿಗುತ್ತಿಲ್ಲ. ಈ ಮಧ್ಯೆ ರೂಮರ್ಗಳು ಶುರುವಾಗಿವೆ. ಈ ಲಾಕ್ಡೌನ್ 21ದಿನಕ್ಕೆ ಮುಗಿಯುವುದಿಲ್ಲ. ಇದನ್ನು ಕೇಂದ್ರ ಸರ್ಕಾರ ಖಂಡಿತ ಮುಂದುವರಿಸುತ್ತದೆ. ಏಪ್ರಿಲ್ 14ರಂದು ಲಾಕ್ಡೌನ್ ಮಗಿಯುತ್ತದೆ ಎಂದು ಯಾರೂ ಭಾವಿಸಬೇಡಿ. ಮೂರು ತಿಂಗಳ ಆರ್ಥಿಕ ನೆರವಿನ ಪ್ಯಾಕೇಜ್ ನೀಡಿದೆ ಎಂದರೆ ನಿಶ್ಚಿತವಾಗಿ ಲಾಕ್ಡೌನ್ ಅವಧಿ ವಿಸ್ತಾರವಾಗುತ್ತದೆ ಎಂದೇ ಅರ್ಥ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿತ್ತು. ಅಷ್ಟೇ ಅಲ್ಲ, ಕೆಲವು ಪ್ರಮುಖ ಸುದ್ದಿ ಮಾಧ್ಯಮಗಳೂ ಹೀಗೇ ವಿಶ್ಲೇಷಣೆ ಮಾಡಿದ್ದವು. ಜನಸಾಮಾನ್ಯರೂ ಸಹ ಇದನ್ನೇ ನಂಬಿಕೊಂಡಿದ್ದರು. ಆದರೆ….
ಕೇಂದ್ರ ಸರ್ಕಾರವೇ ಈಗ ಸ್ಪಷ್ಟನೆ ನೀಡಿದೆ. ಲಾಕ್ಡೌನ್ 21 ದಿನಕ್ಕೇ ಸೀಮಿತವಲ್ಲ. ಅವಧಿ ವಿಸ್ತರಣೆಯಾಗುತ್ತದೆ ಎಂದು ಹರಡುತ್ತಿರುವ ವದಂತಿಗಳು, ಮಾಧ್ಯಮಗಳ ವರದಿಗಳು ಆಧಾರರಹಿತವಾಗಿವೆ. ಹಾಗಾಗಿ ಯಾರೂ ಅದನ್ನು ನಂಬಬೇಡಿ ಎಂದು ಹೇಳಿದೆ. ಈ ಬಗ್ಗೆ ಕೇಂದ್ರ ಸರ್ಕಾರದ ಮಾಧ್ಯಮ ಸಂಸ್ಥೆಯಾಗಿರುವ ಪ್ರೆಸ್ ಇನ್ಫಾರ್ಮೇಶನ್ ಬ್ಯೂರೋ ಟ್ವೀಟ್ ಮಾಡಿ ಸ್ಪಷ್ಟಪಡಿಸಿದೆ.
ಕೇಂದ್ರ ಸಂಪುಟ ಕಾರ್ಯದರ್ಶಿ ರಾಜೀವ್ ಗೌಬಾ ಅವರೂ ಸಹ ಲಾಕ್ಡೌನ್ ಅವಧಿ ವಿಸ್ತರಣೆಯಾಗಲಿದೆ ಎಂಬ ವರದಿಯನ್ನು ತಳ್ಳಿ ಹಾಕಿದ್ದಾರೆ. ಇಂತಹ ರೂಮರ್, ರಿಪೋರ್ಟ್ಗಳನ್ನು ನೋಡಿ ನನಗೂ ಆಶ್ಚರ್ಯವಾಯಿತು. ಏ.14ರ ನಂತರ ಲಾಕ್ಡೌನ್ ಮುಂದುವರಿಸುವ ಯಾವುದೇ ಯೋಜನೆಯೂ ಇಲ್ಲ ಎಂದಿದ್ದಾರೆ.