ಶಿಗ್ಗಾಂವಿ: ಆಸ್ತಿ ಉತಾರಗಳನ್ನು ಪೂರೈಸಲು 10 ಸಾವಿರ ರೂಪಾಯಿ ಲಂಚಕ್ಕೆ ಬೇಡಿಕೆ ಇಟ್ಟ ಪುರಸಭೆ ಕಂದಾಯ ವಿಭಾಗದ (ಎಸ್ಸಿಎ) ನೌಕರ ಸತೀಶ ತಳವಾರ ಗುರುವಾರ ಲೋಕಾಯುಕ್ತ ಬಲೆಗೆ ಬಿದ್ದಿದ್ದಾರೆ.
ಪಟ್ಟಣದ ಅಬ್ದುಲ್ ರಶೀದ್ ದಿವಾನ್ದಾರ್ ಎಂಬುವವರಿಗೆ ಸಂಬಂಧಿಸಿದ ಹಳೇ ಕೈಬರಹ ಉತ್ತಾರ ಕೊಡಲು 10 ಸಾವಿರ ರೂಪಾಯಿಗೆ ಬೇಡಿಕೆ ಇಟ್ಟಿದ್ದರು. ಈ ವ್ಯವಹಾರಕ್ಕೆ ಸಂಬಂಧಿಸಿದಂತೆ ಪುರಸಭೆ ಆವರಣದಲ್ಲಿ 8 ಸಾವಿರ ರೂ. ಪಡೆದುಕೊಳ್ಳುವಾಗ ಸತೀಶ ತಳವಾರ ಲೋಕಾಯುಕ್ತರ ಬಲಿಗೆ ಸಿಕ್ಕು ಬಿದ್ದಿದ್ದಾರೆ.
ಆರೋಪಿಯನ್ನು ಪುರಸಭೆ ಕಚೇರಿಯಲ್ಲಿ ಬಂಧಿಸಲಾಗಿದ್ದು, ತನಿಖೆ ಮುಂದುವರಿದಿದೆ ಎಂದು ಲೋಕಾಯುಕ್ತ ಪೊಲೀಸರು ತಿಳಿಸಿದ್ದಾರೆ.