ಹುಬ್ಬಳ್ಳಿ: ನಗರದ ಕೆಎಲ್ಇ ಸಂಸ್ಥೆಯ ಶ್ರೀಮತಿ ಸಿ.ಐ. ಮುನವಳ್ಳಿ ಪಾಲಿಟೆಕ್ನಿಕ್ನಲ್ಲಿ ಕಳೆದ ನಾಲ್ಕು ವಾರದಿಂದ ಆನ್ಲೈನ್ ತರಗತಿ ಮತ್ತು ಪರೀಕ್ಷೆಗಳನ್ನು ಆರಂಭಿಸಲಾಗಿದೆ.
ಬೆಳಗ್ಗೆ 9ರಿಂದ ಮಧ್ಯಾಹ್ನ 1ರವರೆಗೆ 24 ಗ್ರುಪ್ಗಳಿಗೆ ಹೊಸ ವೇಳಾಪಟ್ಟಿ ಪ್ರಕಾರ ತರಗತಿ ನಡೆಸಲಾಗುತ್ತಿದೆ. ಪ್ರಾಚಾರ್ಯರು ಎಲ್ಲ ಗ್ರುಪ್ಗಳ ಸದಸ್ಯರಾಗಿದ್ದು, ವಾಟ್ಸ್ ಆಪ್ ಮೂಲಕ ಫೀಡ್ಬ್ಯಾಕ್ ನೀಡಲಾಗುತ್ತಿದೆ. ವಿದ್ಯಾರ್ಥಿಗಳು ನಿತ್ಯ ಉಪನ್ಯಾಸಕರಿಂದ ಮಾಹಿತಿ ಪಡೆಯುತ್ತಿದ್ದಾರೆ. ಒಟ್ಟು 8 ವಿಭಾಗಗಳ 24 ತರಗತಿಗಳಲ್ಲಿ ಓದುತ್ತಿರುವ ಸುಮಾರು 1200 ವಿದ್ಯಾರ್ಥಿಗಳ ಪೈಕಿ ಶೇ. 90ರಷ್ಟು ವಿದ್ಯಾರ್ಥಿಗಳು ಆನ್ಲೈನ್ ಸಕ್ರಿಯರಾಗಿದ್ದು, ಲಾಕ್ಡೌನ್ ಲಾಭ ಪಡೆಯುತ್ತಿದ್ದಾರೆ.
ಏ. 27ರಿಂದ ಮೇ 3ರವರೆಗೆ ಮೂರು ತಾಸಿನ 100 ಅಂಕಗಳ ಪ್ರಶ್ನೆ ಪತ್ರಿಕೆ ವಾಟ್ಸ್ಆಪ್ ಗ್ರುಪ್ನಲ್ಲಿ ವೇಳಾಪಟ್ಟಿ ಪ್ರಕಾರ ಬಿಡುಗಡೆಯಾಗಿದ್ದು, ಮನೆಯಲ್ಲಿಯೇ ಕುಳಿತು ವಿದ್ಯಾರ್ಥಿಗಳು ಉತ್ತರ ಬರೆಯುತ್ತಿದ್ದಾರೆ. ಇದರಿಂದ ಪಾಲಕರು ಹಾಗೂ ವಿದ್ಯಾರ್ಥಿಗಳಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ವಿದ್ಯಾರ್ಥಿಗಳು ಮತ್ತು ಪಾಲಕರ ಜಂಟಿ ಪರೀಕ್ಷೆ ನಡೆಸುತ್ತಿರುವುದು ರಾಜ್ಯದಲ್ಲಿಯೇ ಇದು ಮೊದಲ ಪ್ರಯತ್ನ.
ಪ್ರತಿ ಸೆಮಿಸ್ಟರ್ಗೆ ಒಂದರಂತೆ ಗ್ರುಪ್ ಮಾಡಲಾಗಿದೆ. ವೈಸ್ ರೆಕಾರ್ಡ್, ವಿಡಿಯೋ, ಪಿಪಿಟಿ ಮತ್ತು ಯೂಟ್ಯೂಬ್ ಲಿಂಕ್ಗಳ ಮೂಲಕ ಪಾಠ ನಡೆಯುತ್ತಿವೆ ಎಂದು ಪ್ರಾಚಾರ್ಯ ವೀರೇಶ ಅಂಗಡಿ ತಿಳಿಸಿದ್ದಾರೆ.