ಬೆಳಗಾವಿ: ಜಾಗೃತಿ ಕೊರತೆಯಿಂದಾಗಿ ಸರ್ಕಾರಿ ಸೌಲಭ್ಯಗಳಿಂದ ವಂಚಿತರಾಗುತ್ತಿದ್ದ ಶಾಲಾ&ವಿದ್ಯಾರ್ಥಿಗಳಿಗೆ, ಮಕ್ಕಳ ಶೈಕ್ಷಣಿಕ ಸುಧಾರಣೆ ದಾಖಲೀಕರಣಕ್ಕೆ ಪರದಾಡುತ್ತಿದ್ದ ಶಿಕ್ಷಕರಿಗೆ ಹಾಗೂ ಮಕ್ಕಳನ್ನು ಮತ್ತೊಂದು ಶಾಲೆಗೆ ದಾಖಲಿಸುವುದಕ್ಕಾಗಿ ಅಲೆದಾಡುತ್ತಿದ್ದ ಪಾಲಕರಿಗೆ ಸ್ಯಾಟ್ಸ್ (ವಿದ್ಯಾರ್ಥಿ ಸಾಧನೆಯ ಟ್ರ್ಯಾಕಿಂಗ್ ವ್ಯವಸ್ಥೆ) ವರದಾನವಾಗಿ ಪರಿಣಮಿಸಿದೆ.
ಆರು ವರ್ಷಗಳಿಂದ ಅನುಷ್ಠಾನದಲ್ಲಿರುವ “ವಿದ್ಯಾರ್ಥಿ ಸಾಧನೆಯ ಟ್ರ್ಯಾಕಿಂಗ್ ವ್ಯವಸ್ಥೆ’ ವರ್ಷದಿಂದ ವರ್ಷಕ್ಕೆ ಬಲಗೊಳ್ಳುತ್ತಿದ್ದು, ವಿದ್ಯಾರ್ಥಿಗಳ ಸಾಧನೆ ತಿಳಿಯಲು ಮಾತ್ರವಲ್ಲ, ಅವರಿಗೆ ಯಾವೆಲ್ಲ ಸರ್ಕಾರಿ ಸೌಲಭ್ಯಗಳು ಎಷ್ಟರ ಮಟ್ಟಿಗೆ ತಲುಪುತ್ತಿವೆ ಎಂಬುದನ್ನೂ ತಿಳಿಸಿಕೊಡುತ್ತಿದೆ. ಆ ಮೂಲಕ ಪದೇ ಪದೆ ಯೋಜನೆಯ ಫಲಾನುಭವಿಗಳಾದವರನ್ನೂ ಟ್ರಾಕ್ ಮಾಡಿ, ಅದನ್ನು ಸೌಲಭ್ಯದಿಂದ ವಂಚಿತಗೊಳ್ಳಲಿದ್ದ ವಿದ್ಯಾರ್ಥಿಗಳಿಗೆ ವಿತರಿಸಲು ಸಹಾಯಕವಾಗಿದೆ.
ರಾಜ್ಯಾದ್ಯಂತ ಎಲ್ಲ ಪ್ರಾಥಮಿಕ ಮತ್ತು ಪ್ರೌಢ ಶಾಲೆಗಳ ವಿದ್ಯಾರ್ಥಿಗಳಿಗೆ ಶಿಕ್ಷಣ ಇಲಾಖೆಯಿಂದ ವಿತರಿಸಲಾಗುವ 9 ಅಂಕಿಗಳ ಗುರುತಿನ ಸಂಖ್ಯೆಯಿಂದ ಆಯಾ ವಿದ್ಯಾರ್ಥಿಗಳ ಶೈಕ್ಷಣಿಕ ಸಾಧನೆ, ಶಾಲೆ ಹಾಗೂ ಸರ್ಕಾರಿ ಯೋಜನೆಗಳನ್ನು ಪಡೆದುಕೊಳ್ಳುತ್ತಿರುವ ಮಾಹಿತಿ ಪಡೆಯಬಹುದಾಗಿದೆ. ಸರ್ಕಾರ ವಿತರಿಸುವ ಸೌಲಭ್ಯಗಳಿಗೆ ಇದೀಗ ಸ್ಯಾಟ್ಸ್ ಸಂಖ್ಯೆ ಜೋಡಣೆ ಕಡ್ಡಾಯಗೊಳಿಸಲಾಗಿದೆ.
ಹಾಜರಾತಿ, ಶಿಷ್ಯವೇತನ, ಪಠ್ಯಪುಸ್ತಕ ವಿತರಣೆ, ಮಧ್ಯಾಹ್ನದ ಬಿಸಿಯೂಟ, ಕ್ಷೀರಭಾಗ್ಯದ ಹಾಲು, ಆರೋಗ್ಯ ತಪಾಸಣೆ, ಬೈಸಿಕಲ್, ಸಮವಸ ಹಾಗೂ ಅಂಗವಿಕಲ ಮಕ್ಕಳಿಗೆ ವೀಲ್ಚೇರ್ ವಿತರಣೆಗೆ ಸೇರಿದಂತೆ ಇಲಾಖೆಯ ಎಲ್ಲ ಉಪಕ್ರಮಗಳ ದತ್ತಾಂಶಗಳನ್ನು ವಿಶ್ಲೇಷಣೆ ಮಾಡಿ, ಒಬ್ಬರಿಗೇ ಸೌಲಭ್ಯಗಳ ಪುನರಾವರ್ತನೆ ಆಗದಂತೆ ಹಾಗೂ ಸೌಲಭ್ಯ ವಿತರಿಸುವಲ್ಲಿ ಎನ್ಜಿಒಗಳು ಮಾಡುತ್ತಿರುವ ಅವ್ಯವಹಾರಕ್ಕೂ ಕಡಿವಾಣ ಹಾಕಲಾಗುತ್ತಿದೆ. ಟಿಸಿ ವರ್ಗಾವಣೆಯೂ ಸ್ಯಾಟ್ಸ್ ಮೂಲಕವೇ ಆಗುವುದರಿಂದ ಶಿಕ್ಷಕರು ಹಾಗೂ ಪಾಲಕರ ಸಮಯ ಹಾಗೂ ಶಕ್ತಿ ಅಪವ್ಯಯ ತಪ್ಪಿಸಿದೆ ಎನ್ನುತ್ತಾರೆ ಬೆಳಗಾವಿ ಜಿಲ್ಲಾ ಉಪನಿರ್ದೇಶಕ ಕಚೇರಿ ಸಿಬ್ಬಂದಿ.
ಯುನಿಕ್ ಡೈಸ್ ಸಂಖ್ಯೆ: ಸ್ಯಾಟ್ಸ್ ಸಂಖ್ಯೆಯಂತೆಯೇ ಶಾಲೆಗಳಿಗೂ ಡೈಸ್ ಸಂಖ್ಯೆ ನೀಡಲಾಗುತ್ತಿದ್ದು, ವಿದ್ಯಾರ್ಥಿಗಳ ಕಲಿಕಾ ಅವಧಿಯ ವೈಯಕ್ತಿಕ ಮಾಹಿತಿ, ದಾಖಲಾತಿ, ಹಾಜರಾತಿ, ಸೌಲಭ್ಯ, ವರ್ಗಾವಣೆ, ಶಾಲೆಯ ಶೈಕ್ಷಣಿಕ ಪ್ರಗತಿ ಕುರಿತು, ಶಾಲೆಯಲ್ಲಿನ ಸೌಲಭ್ಯ, ಶಿಕ್ಷಕರ ಸಂಖ್ಯೆ ಸೇರಿದಂತೆ ಸ್ಕೂಲ್ ರಿಪೋರ್ಟ್ ಕಾರ್ಡ್ ಸಹ ಲಭ್ಯವಿದೆ. ಶಾಲೆಗಳನ್ನು ಉನ್ನತಿಕರಣಕ್ಕೂ ಇದೇ ಡೈಸ್ ಸಂಖ್ಯೆ ಮೂಲಕ ದತ್ತಾಂಶ ವಿಶ್ಲೇಷಣೆಗೊಳಪಡಿಸಲಾಗುತ್ತದೆ. ಕೆಲ ಪುಸ್ತಕಗಳು ಇನ್ನೂ ವಿತರಣೆ ಆಗದ ಕಾರಣ ಸ್ಯಾಟ್ಸ್ನಲ್ಲಿ ನಿಖರ ಮಾಹಿತಿ, ಲಭ್ಯವಾಗುತ್ತಿಲ್ಲ ಎಂದು ಇಲಾಖೆ ಮೂಲಗಳು ತಿಳಿಸಿವೆ.
300 ಮಹಾ ವಿದ್ಯಾರ್ಥಿಗಳು ರಾಜ್ಯಕ್ಕೆ: ಬೆಳಗಾವಿ ವಿಭಾಗದಲ್ಲಿ ಮೊದಲ ತರಗತಿಯಿಂದ 10ನೇ ತರಗತಿವರೆಗಿನ ವಿದ್ಯಾರ್ಥಿಗಳಿಗೆ 2022ರಲ್ಲಿ 3.91 ಲಕ್ಷ ಹಾಗೂ 22&23 ಶೈಕ್ಷಣಿಕ ವರ್ಷದಲ್ಲಿ 3.85 ಲಕ್ಷ ವಿದ್ಯಾರ್ಥಿಗಳಿಗೆ ಸ್ಯಾಟ್ಸ್ ಸಂಖ್ಯೆ ವಿತರಿಸಲಾಗಿದೆ. 2021&22ರ ಸಾಲಿನಲ್ಲಿ ಗಡಿ ಜಿಲ್ಲೆಯ 500ಕ್ಕೂ ಅಧಿಕ ವಿದ್ಯಾರ್ಥಿಗಳು ಹೊರ ರಾಜ್ಯದ ಶಾಲೆಗಳಲ್ಲಿ ತಮ್ಮ ಮುಂದಿನ ತರಗತಿ ಪ್ರವೇಶಾತಿ ಪಡೆದಿದ್ದರು. ಅದರಂತೆ ಈ ಬಾರಿ ನೆರೆಯ ಮಹಾರಾಷ್ಟ್ರದ ಸುಮಾರು 300 ಜನ ವಿದ್ಯಾರ್ಥಿಗಳು ಬೆಳಗಾವಿ ವಿಭಾಗದ ಶಾಲೆಗಳಲ್ಲಿ ಹೊರರಾಜ್ಯದಿಂದ ಬಂದು ಅಕ್ಷರಾಭ್ಯಾಸ ನಡೆಸಿರುವುದು ಸ್ಯಾಟ್ಸ್ ದತ್ತಾಂಶ ಬಹಿರಂಗಪಡಿಸಿದೆ. ನಿಯಮಿತ ಹಾಗೂ ಪಾರದರ್ಶಕವಾಗಿ ಶೈಕ್ಷಣಿಕ ಸೌಲಭ್ಯ ಒದಗಿಸಲು ಇದೊಂದು ಉತ್ತಮ ತಂತ್ರಾಂಶ. ಹೊರದೇಶದಲ್ಲಿನ ಶಾಲೆಗಳಲ್ಲೂ ರಾಜ್ಯ ವಿದ್ಯಾರ್ಥಿಗಳಿಗೆ ನೀಡಲಾಗಿರುವ ಸ್ಯಾಟ್ಸ್ ಸಂಖ್ಯೆ ನಮೂದಿಸಿದರೆ ಅವರ ಶೈಕ್ಷಣಿಕ ಮಾಹಿತಿ ಸಿಗಲಿದೆ.
ವಿದ್ಯಾರ್ಥಿಗಳು ಎರಡೆರಡು ಶಾಲೆಗಳಲ್ಲಿ ಪ್ರವೇಶಾತಿ ಪಡೆಯುವುದಕ್ಕೂ ಸ್ಯಾಟ್ಸ್ ದತ್ತಾಂಶದಿಂದ ಕಡಿವಾಣ ಬಿದ್ದಿದೆ.
ವಿದ್ಯಾರ್ಥಿಗಳ ಶೈಕ್ಷಣಿಕ ಚಟುವಟಿಕೆಯ ಸಾಧನೆ ಆಯಾ ತರಗತಿವಾರು ಸ್ಯಾಟ್ಸ್ನಲ್ಲಿ ನಮೂದಿಸಲಾಗುತ್ತಿದೆ. ಇದರಿಂದ ಸೌಲಭ್ಯಗಳ ಪುನರಾವರ್ತನೆ ತಡೆಯುವುದರ ಸಮಯದ ಉಳಿತಾಯವಾಗುತ್ತಿದೆ.
| ಎಸ್.ಎಸ್.ಬಿರಾದಾರ
ಅಪರ ಆಯುಕ್ತ, ಧಾರವಾಡ ವಲಯ
| ಶಿವಾನಂದ ಕಲ್ಲೂರ