ಗೋಕರ್ಣ: ಕ್ವಾರಂಟೈನ್ಗೆ ಒಪ್ಪದ ರಷ್ಯನ್ ಪ್ರವಾಸಿಯೊಬ್ಬ ಸೋಮವಾರ ಗೋವಾಕ್ಕೆ ವಾಪಸಾಗಿದ್ದಾನೆ.
ರಷ್ಯಾದ ವಾದಮಿರ್ ಲಾಝುರೇವ್ ಎಂಬಾತ ಉತ್ತರ ಪ್ರದೇಶದಲ್ಲಿ ಎರಡು ತಿಂಗಳು ವಾಸವಾಗಿದ್ದ. ಬಳಿಕ ಗೋವಾ ಮೂಲಕ ಖಾಸಗಿ ವಾಹನದಲ್ಲಿ ಗೋಕರ್ಣಕ್ಕೆ ಸೋಮವಾರ ಮಧ್ಯಾಹ್ನ ಆಗಮಿಸಿದ್ದ. ಹಿತ್ತಲಮಕ್ಕಿ ಚೆಕ್ಪೋಸ್ಟ್ನಲ್ಲಿ ವಾಹನ ತಡೆದು ತಪಾಸಣೆ ಮಾಡಲಾಯಿತು. ಗೋವಾದಿಂದ ಇಲ್ಲಿಗೆ ಬರುವ ಮೊದಲು ಕಾರವಾರದ ಕಿಮ್ಸ್ನಲ್ಲಿ ಈತನ ತಪಾಸಣೆ ಮಾಡಿ 14 ದಿನದ ಕ್ವಾರಂಟೈನ್ಗೆ ಆದೇಶಿಸಲಾಯಿತು. ಇದರ ಪ್ರಕಾರ, ಸ್ಥಳೀಯ ಪಿಎಸ್ಐ ನವೀನ ನಾಯ್ಕ ಮತ್ತು ಆರೋಗ್ಯಾಧಿಕಾರಿ ಡಾ.ಜಗದೀಶ ನಾಯ್ಕ ಈತನನ್ನು ಕುಮಟಾದ ಸಾಂಸ್ಥಿಕ ಕ್ವಾರಂಟೈನ್ಗೆ ಕಳಿಸಿದರು. ಕುಮಟಾಕ್ಕೆ ಹೋದ ನಂತರ ಅಲ್ಲಿರಲು ಒಪ್ಪದ ಈತ ತಿರುಗಿ ಗೋವಾಕ್ಕೆ ಮರಳಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
ಚೆಕ್ಪೋಸ್ಟ್ ಬೇಕು: ಲಾಕ್ಡೌನ್ ಸಡಿಲವಾದ ನಂತರ ಬೇರೆ ಬೇರೆ ಜಿಲ್ಲೆ ಮತ್ತು ರಾಜ್ಯಗಳಿಂದ ಗೋಕರ್ಣಕ್ಕೆ ಬರುತ್ತಿರುವವರ ಸಂಖ್ಯೆ ಹೆಚ್ಚಾಗುತ್ತಿರುವುದು ಜನರ ಆತಂಕಕ್ಕೆ ಕಾರಣವಾಗಿದೆ. ನಿತ್ಯ ಬೆಳಗ್ಗೆ ಬೇರೆ ಜಿಲ್ಲೆಯ ವಾಹನಗಳು ಇಲ್ಲಿ ಕಾಣಸಿಗುತ್ತಿವೆ. ಸದ್ಯ ಈತನಕ ಪೊಲೀಸ್ ಮತ್ತು ಆರೋಗ್ಯ ಇಲಾಖೆ ಚೆಕ್ಪೋಸ್ಟ್ ಇರುವುದರಿಂದ ಗುರುತಿಸಿ ದಾಖಲಿಸಲಾಗುತ್ತಿದೆ. ಅಗತ್ಯ ಇರುವವರನ್ನು ಕ್ವಾರಂಟೈನ್ ಕೇಂದ್ರಕ್ಕೆ ರವಾನಿಸಲಾಗುತ್ತಿದೆ. ಆದರೆ, ಈ ಚೆಕ್ಪೋಸ್ಟ್ ರದ್ದಾದಲ್ಲಿ ಸೋಂಕು ಪೀಡಿತ ಪ್ರದೇಶಗಳಿಂದ ಬರುವವರನ್ನು ಪತ್ತೆ ಮಾಡುವುದು ಕಷ್ಟವಾಗಲಿದೆ. ಕಾರಣ ಹಿತ್ತಲಮಕ್ಕಿ ಚೆಕ್ಪೋಸ್ಟ್ ಮುಂದುವರಿಸಲು ಪೊಲೀಸರು ಜಿಲ್ಲಾ ವರಿಷ್ಠರಿಗೆ ವಿನಂತಿಸಿದ್ದು, ಸ್ಥಳೀಯ ನಾಗರಿಕರು ಕೂಡ ಇದನ್ನು ಬೆಂಬಲಿಸಿ ಚೆಕ್ಪೋಸ್ಟ್ ಜಾರಿಯಲ್ಲಿಡಲು ಆಗ್ರಹಿಸಿದ್ದಾರೆ.