ಹಾವೇರಿ: ಅಂತರ್ ಜಿಲ್ಲೆಗಳ ಬಸ್ ಸಂಚಾರ ಆರಂಭಗೊಂಡ ಮೂರನೇ ದಿನ ಗುರುವಾರ ಪ್ರಯಾಣಿಕರ ಸಂಖ್ಯೆಯಲ್ಲಿ ಸ್ವಲ್ಪ ಹೆಚ್ಚಾಗಿದೆ.
ಮೊದಲೆರಡು ದಿನದಂತೆ ಮೂರನೇ ದಿನವೂ 70 ಸ್ಥಳೀಯ ಬಸ್ ಹಾಗೂ ಅಂತರ್ ಜಿಲ್ಲೆಗಳಿಗೆ 141 ಬಸ್ ಬಿಡಲಾಗಿತ್ತು. ಗುರುವಾರ ಬಹುತೇಕ ಬಸ್ಗಳಲ್ಲಿ ಪ್ರಯಾಣಿಕರ ಸಂಖ್ಯೆ ಸ್ವಲ್ಪ ಏರಿಕೆ ಕಂಡಿದೆ. ಗುರುವಾರ ಬೆಂಗಳೂರಿಗೆ 16 ಬಸ್ಗಳು ಬೆಳಗ್ಗೆ ಹೋಗಿವೆ. ಇನ್ನುಳಿದಂತೆ ಹುಬ್ಬಳ್ಳಿ, ದಾವಣಗೆರೆಗೂ ಹೆಚ್ಚಿನ ಜನ ಸಂಚರಿಸಿದ್ದಾರೆ. ಗದಗ, ಉತ್ತರಕನ್ನಡ, ದಕ್ಷಿಣಕನ್ನಡ, ಕಲಬುರಗಿ ಜಿಲ್ಲೆಗಳತ್ತ ಕಡಿಮೆ ಜನ ಪ್ರಯಾಣಿಸಿದ್ದಾರೆ.
ದಿನದಿಂದ ದಿನಕ್ಕೆ ಪ್ರಯಾಣಿಕರ ಸಂಖ್ಯೆ ಹೆಚ್ಚಾಗುವ ಲಕ್ಷಣ ಕಂಡುಬಂದಿದ್ದು, ಪ್ರಯಾಣಿಕರ ಬೇಡಿಕೆಗನುಸಾರ ಬಸ್ಗಳ ಸಂಖ್ಯೆಯನ್ನೂ ಹೆಚ್ಚಿಸಲಾಗುವುದು. ಮಂಗಳವಾರ ಬಸ್ಗಳ ಓಡಾಟಕ್ಕೆ ಪ್ರತಿ ಕಿಮೀಗೆ 15 ರೂ.ಗಳಷ್ಟು ಕಲೆಕ್ಷನ್ ಆಗಿದ್ದರೆ, ಬುಧವಾರ 19 ರೂ. ರೂ.ಗೂ ಅಧಿಕವಾಗಿದೆ. ಗುರುವಾರ ಇನ್ನಷ್ಟು ಹೆಚ್ಚಳವಾಗಿದೆ. 30 ಪ್ರಯಾಣಿಕರಂತೆ ಪ್ರಯಾಣಿಸಿದರೂ ಪ್ರತಿ ಕಿಮೀಗೆ 26 ರೂ.ಗಳಷ್ಟು ಆದಾಯ ಬಂದರೆ ಬಸ್ಗಳ ಸಂಖ್ಯೆಯನ್ನು ಹೆಚ್ಚಿಸಲಾಗುವುದು ಎಂದು ವಾಕರಾಸಂ ವಿಭಾಗೀಯ ನಿಯಂತ್ರಣಾಧಿಕಾರಿ ಜೆ. ಜಗದೀಶ ವಿಜಯವಾಣಿಗೆ ತಿಳಿಸಿದರು.