ಹುಬ್ಬಳ್ಳಿ: ಹುಬ್ಬಳ್ಳಿ ವಿಮಾನ ನಿಲ್ದಾಣದಲ್ಲಿ ಹವಾಮಾನ ವೈಪರೀತ್ಯದ ಸಂದರ್ಭದಲ್ಲೂ ಸರಳವಾಗಿ ವಿಮಾನ ಲ್ಯಾಂಡಿಂಗ್ ಮಾಡಲು ಸಹಕಾರಿಯಾಗುವ ಇನ್ಸ್ಟ್ರುಮೆಂಟಲ್ ಲ್ಯಾಂಡಿಂಗ್ ಸಿಸ್ಟಂ (ಐಎಲ್ಎಸ್) ಅಳವಡಿಕೆ ಕಾರ್ಯ ಬಹುತೇಕ ಪೂರ್ಣಗೊಂಡಿದ್ದು, ನವೆಂಬರ್ನಿಂದ ಕಾರ್ಯಾರಂಭ ಮಾಡಲಿದೆ.
ವಿಮಾನ ನಿಲ್ದಾಣದ ಹೊಸ ಟರ್ವಿುನಲ್ ಉದ್ಘಾಟನೆಯಾದ ಬಳಿಕ ಹೊಸ ಹೊಸ ತಂತ್ರಜ್ಞಾನ ಅಳವಡಿಕೆ ಕಾರ್ಯ ನಡೆಯುತ್ತಿದ್ದು, ಇದೀಗ ಐಎಲ್ಎಸ್ ಅಳವಡಿಕೆ ಪೂರ್ಣಗೊಳ್ಳುವ ಹಂತಕ್ಕೆ ಬಂದಿದೆ. ಜನವರಿಯಲ್ಲಿ ಐಎಲ್ಎಸ್ ಕಾಮಗಾರಿ ಆರಂಭಿಸಲಾಗಿದ್ದು, ನಿಗದಿಯಂತೆ ಮಾರ್ಚ್, ಏಪ್ರಿಲ್ನಲ್ಲಿ ಕಾರ್ಯಾರಂಭ ಮಾಡಬೇಕಿತ್ತು. ಕರೊನಾ ಲಾಕ್ಡೌನ್ನಿಂದಾಗಿ ಕಾಮಗಾರಿ ವಿಳಂಬವಾಯಿತು. ಸದ್ಯ ಐಎಲ್ಎಸ್ ತಾಂತ್ರಿಕ ಸಾಮಗ್ರಿಯ ಶೆಡ್, ಟವರ್ ಅಳವಡಿಕೆ ಕಾಮಗಾರಿ ಮುಕ್ತಾಯವಾಗಿದ್ದು, ನವೆಂಬರ್ನಲ್ಲಿ ಕಾರ್ಯಾರಂಭವಾಗಲಿದೆ.
ಮಳೆಗಾಲ, ಚಳಿಗಾಲ ಸಂದರ್ಭದಲ್ಲಿ ಹವಾಮಾನ ವೈಪರೀತ್ಯ ಉಂಟಾದ ಸಂದರ್ಭದಲ್ಲೂ ಸುಲಭವಾಗಿ ವಿಮಾನ ಲ್ಯಾಂಡಿಂಗ್ಗೆ ಐಎಲ್ಎಸ್ ಸಹಕಾರಿಯಾಗಲಿದೆ. ಮೋಡಗಳು ಉಂಟಾದಾಗ, ವಿಪರೀತ ಮಳೆ ಉಂಟಾಗಿ ಹವಾಮಾನ ವೈಪರೀತ್ಯ ಉಂಟಾದರೆ ರನ್ವೇ ಗೋಚರ ಆಗುವವರೆಗೂ ವಿಮಾನ ಲ್ಯಾಂಡಿಂಗ್ಗೆ ಏರ್ ಟ್ರಾಫಿಕ್ ಕಂಟ್ರೋಲ್ ರೂಂ (ಎಟಿಸಿ) ಅವಕಾಶ ನೀಡುವುದಿಲ್ಲ. ಆಗ ವಿಮಾನ ಆಕಾಶದಲ್ಲೇ ಗಿರಕಿ ಹೊಡೆಯಬೇಕಾಗುತ್ತದೆ. ಈ ರೀತಿ ಹಲವು ಬಾರಿ ವಿಮಾನಗಳು ಆಕಾಶದಲ್ಲೇ ಗಿರಕಿ ಹೊಡೆದ ಉದಾಹರಣೆಗಳಿವೆ. ಈ ಸಮಸ್ಯೆ ನಿವಾರಣೆಗೆಂದೇ ಐಎಲ್ಎಸ್ ವ್ಯವಸ್ಥೆ ಕಲ್ಪಿಸಲಾಗುತ್ತಿದೆ.
ವಿಮಾನ ನಿಲ್ದಾಣದಲ್ಲಿ ಐಎಲ್ಎಸ್ ನಿರ್ಮಾಣ ಕಾಮಗಾರಿ ಭಾಗಶಃ ಮುಕ್ತಾಯವಾಗಿದ್ದು, ಕೊನೆಯ ಹಂತದ ಕೆಲಸಗಳು ನಡೆದಿವೆ. ನವೆಂಬರ್ನಲ್ಲಿ ಕಾರ್ಯಾರಂಭ ಮಾಡಲಿದೆ. ಇದರಿಂದ ಎಂತಹ ಹವಾಮಾನ ವೈಪರೀತ್ಯ ಇದ್ದರೂ ಸುಲಭವಾಗಿ ವಿಮಾನ ಲ್ಯಾಂಡಿಂಗ್ ಮಾಡಬಹುದಾಗಿದೆ.
| ಪ್ರಮೋದ ಕುಮಾರ ಠಾಕರೆ ನಿರ್ದೇಶಕ, ಹುಬ್ಬಳ್ಳಿ ವಿಮಾನ ನಿಲ್ದಾಣ
ಐಎಲ್ಎಸ್ ಕಾರ್ಯವೈಖರಿ ಭಿನ್ನ
ಐಎಲ್ಎಸ್ ನೆಲಮಟ್ಟದಿಂದ ಕಾರ್ಯನಿರ್ವಹಿಸುವ ರೇಡಾರ್ ಆಧರಿತ ತಂತ್ರಜ್ಞಾನವಾಗಿದೆ. ರನ್ವೇ ಬಳಿ ಒಂದು ಶೆಡ್ ನಿರ್ವಿುಸಲಾಗಿದೆ. ಇದು ಹವಾಮಾನ ವೈಪರೀತ್ಯದ ಸಂದರ್ಭದಲ್ಲೂ ವಿಮಾನ ರನ್ವೇನಲ್ಲಿ ಲ್ಯಾಂಡ್ ಆಗುವಂತೆ ತರಂಗ ಸಂದೇಶ ರವಾನಿಸುತ್ತದೆ. ಮತ್ತೊಂದು ರನ್ ವೇ ಪಕ್ಕದಲ್ಲಿ ಸ್ಥಾಪಿಸಲಾದ ತರಂಗ ಸ್ತಂಭಗಳು (ಆಂಟೆನಾ) ವಿಮಾನ ರನ್ವೇ ಮಧ್ಯಭಾಗಕ್ಕೆ ವಿಮಾನ ಹೋಗುವಂತೆ ಲೈಟಿಂಗ್, ತರಂಗ ಸಂದೇಶ ರವಾನಿಸುತ್ತ ಪೈಲಟ್ಗೆ ಸಹಕರಿಸುತ್ತವೆ. ಆಗಸದಿಂದ ರನ್ವೇ ಕಾಣದಿದ್ದರೂ ತರಂಗಗಳ ಸಹಾಯದಿಂದ ವಿಮಾನಗಳನ್ನು ಲ್ಯಾಂಡ್ ಮಾಡಬಹುದಾಗಿದೆ. ಒಂದು ವೇಳೆ ವಿಮಾನ ಪಕ್ಕಕ್ಕೆ ಸರಿದು ಆಂಟಿನಾಕ್ಕೆ ತಾಗಿದರೂ ಲಘುವಾಗಿರುವ ಕಾರಣ ಸುಲಭವಾಗಿ ಕೆಳಗೆ ಬೀಳುತ್ತವೆ. ವಿಮಾನಕ್ಕೆ ಯಾವುದೇ ಹಾನಿ ಉಂಟಾಗುವುದಿಲ್ಲ.