ಬೀರೂರು: ಕುವೆಂಪು ವಿಶ್ವವಿದ್ಯಾಲಯ ಪ್ರಕಟಿಸಿರುವ ಪದವಿ ತರಗತಿಗಳ ನೂತನ ಶೈಕ್ಷಣಿಕ ವೇಳಾಪಟ್ಟಿಗೆ ಆಕ್ಷೇಪ ವ್ಯಕ್ತಪಡಿಸಿರುವ ಅಖಿಲ ಭಾರತ ವಿದ್ಯಾರ್ಥಿ ಪರಿಷತ್ (ಎಬಿವಿಪಿ) ಬೀರೂರು ಘಟಕದಿಂದ ಶನಿವಾರ ಪಟ್ಟಣದ ಮಹಾತ್ಮ ಗಾಂಧಿ ವೃತ್ತದಲ್ಲಿ ಪ್ರತಿಭಟನೆ ನಡೆಸಲಾಯಿತು. ವಿದ್ಯಾರ್ಥಿಗಳ ಹಿತಕಾಪಾಡುವ ನಿಟ್ಟಿನಲ್ಲಿ ಪರಿಷ್ಕೃತ ವೇಳಾಪಟ್ಟಿ ರಚಿಸುವಂತೆ ಒತ್ತಾಯಿಸಿದರು.
ನೂತನ ವೇಳಾಪಟ್ಟಿ ಅನ್ವಯ 4 ಮತ್ತು 6ನೇ ನೆಮಿಸ್ಟರ್ಗೆ ಆ.30 ಕೊನೆಯ ದಿನ ಎಂದು ಪ್ರಕಟಿಸಲಾಗಿದೆ. ಸೆ.7ರಿಂದ ಪರೀಕ್ಷೆ ನಿಗದಿ ಮಾಡಿದೆ. ಆದರೆ ಪಾಠ ಪ್ರವಚನಗಳು ಪೂರ್ಣವಾಗಿಲ್ಲ. ಇದರಿಂದ ಪರೀಕ್ಷೆ ಎದುರಿಸಲು ತೊಂದರೆ ಆಗಲಿದೆ ಎಂದು ವಿದ್ಯಾರ್ಥಿಗಳು ಅಹವಾಲು ಹೇಳಿಕೊಂಡರು.
ಜಿಲ್ಲಾ ಸಂಚಾಲಕ ಶಶಾಂಕ್ ಮಾತನಾಡಿ, ಕುವೆಂಪು ವಿವಿಯ 4 ಹಾಗೂ 6ನೇ ಸೆಮಿಸ್ಟರ್ನ ತರಗತಿಗಳು ಜೂನ್ನಲ್ಲಿ ಆರಂಭವಾಗಿವೆ. ಪಾಠಗಳು ಪೂರ್ಣಗೊಂಡಿಲ್ಲ, ಅಗತ್ಯಕ್ಕಿಂತಲೂ ಕಡಿಮೆ ತರಗತಿಗಳು ನಡೆದಿರುವುದರಿಂದ ಪರೀಕ್ಷೆಯಲ್ಲಿ ವಿದ್ಯಾರ್ಥಿಗಳಿಗೆ ತೊಂದರೆಯಾಗಲಿದೆ. ಇದೇ ಸಮಸ್ಯೆ 2ನೇ ಸೆಮಿಸ್ಟರ್ನ ವಿದ್ಯಾರ್ಥಿಗಳಿಗೂ ಉಂಟಾಗಲಿದೆ. ಕೂಡಲೇ ವೇಳಾಪಟ್ಟಿ ಹಿಂಪಡೆದು ಪರಿಷ್ಕೃತ ಪಟ್ಟಿ ಬಿಡುಗಡೆ ಮಾಡಬೇಕೆಂದು ಒತ್ತಾಯಿಸಿದರು.
ಕಡೂರು ಮತ್ತು ಬೀರೂರು ಪ್ರಥಮ ದರ್ಜೆ ಕಾಲೇಜು ವಿದ್ಯಾರ್ಥಿಗಳು ನಾಡ ಕಚೇರಿ ಉಪತಹಸೀಲ್ದಾರ್ ಮೂಲಕ ಕುವೆಂಪು ವಿಶ್ವವಿದ್ಯಾಲಯ ಕುಲಪತಿಗೆ ಮನವಿ ಸಲ್ಲಿಸಿದರು.