ಧಾರವಾಡ: ಕರೊನಾ ಹಿನ್ನೆಲೆಯಲ್ಲಿ ಮಾ. 25ರಿಂದ ಜಾರಿಯಲ್ಲಿದ್ದ ಲಾಕ್ಡೌನ್ ನಿಯಮಾವಳಿಗಳಲ್ಲಿ ಒಂದಿಷ್ಟು ಸಡಿಲವಾಗಿದ್ದು, ಜಿಲ್ಲೆಯ ಸಾರ್ವಜನಿಕರು ಮೇ 4ರಿಂದ ನಿಟ್ಟುಸಿರು ಬಿಡಲು ಅವಕಾಶವಾಗಿದೆ. ಆದಾಗ್ಯೂ, ಲಾಕ್ಡೌನ್ ಪೂರ್ವದಲ್ಲಿಯ ಸ್ವಾತಂತ್ರ್ಯ ಸಿಗುವುದಿಲ್ಲ.
ಜಿಲ್ಲಾಧಿಕಾರಿ ದೀಪಾ ಚೋಳನ್ ಭಾನುವಾರ ರಾತ್ರಿ ಪರಿಷ್ಕೃತ ಆದೇಶ ಹೊರಡಿಸಿದ್ದು, ಸೋಮವಾರದಿಂದ ಅನ್ವಯವಾಗುವಂತೆ ಜಾರಿಗೆ ಬರುತ್ತಿದೆ.
ಕೇಂದ್ರ ಗೃಹ ಮಂತ್ರಾಲಯ ಮೇ 1ರಂದು ಪರಿಷ್ಕೃತ ಆದೇಶ ಹೊರಡಿಸಿದ್ದು, ಮೇ 17ರವರೆಗೆ ಲಾಕ್ಡೌನ್ ಮುಂದುವರಿಸುವಂತೆ ಸೂಚಿಸಿದೆ. ಅದರ ಅನ್ವಯ ಜಿಲ್ಲಾ ವಿಪತ್ತು ನಿರ್ವಹಣಾ ಪ್ರಾಧಿಕಾರದ ಅಧ್ಯಕ್ಷರೂ ಆಗಿರುವ ಜಿಲ್ಲಾಧಿಕಾರಿ ದೀಪಾ ಚೋಳನ್ ಪರಿಷ್ಕೃತ ಆದೇಶ ಹೊರಡಿಸಿದ್ದಾರೆ.
ಯಥಾಸ್ಥಿತಿಯಲ್ಲಿ ಹುಬ್ಬಳ್ಳಿ ಹೃದಯಭಾಗ: ಹುಬ್ಬಳ್ಳಿ: ಇಲ್ಲಿಯ ಮುಲ್ಲಾ ಓಣಿ, ಕರಾಡಿ ಓಣಿ, ಆಜಾದ ಕಾಲನಿ, ಕೇಶ್ವಾಪುರ ಶಾಂತಿ ನಗರದ ವ್ಯಕ್ತಿಗಳಲ್ಲಿ ಕರೊನಾ ಸೋಂಕು ಕಂಡುಬಂದಿರುವುದರಿಂದ ಸೀಲ್ಡೌನ್ ಆದೇಶಕ್ಕೆ ಒಳಪಟ್ಟಿವೆ. ಮುಲ್ಲಾ ಓಣಿಯಲ್ಲಿ ಕರೊನಾ ಸೋಂಕು ಪತ್ತೆಯಾದಾಗಿನಿಂದಲೇ ಕಂಟೈನ್ವೆುಂಟ್ (ಸಂಭಾವ್ಯ ಸೋಂಕು) ಪ್ರದೇಶ ಘೊಷಣೆಯಾಗಿದ್ದು, 3 ಕಿ.ಮೀ. ಸುತ್ತಳತೆ ಪ್ರದೇಶ ಇದರ ವ್ಯಾಪ್ತಿಗೆ ಬರುತ್ತದೆ. ಸೋಂಕಿತ ವ್ಯಕ್ತಿಗಳ ಮನೆಯಿಂದ 1 ಕಿ.ಮೀ. ಸುತ್ತಳತೆಯನ್ನು ಹೆಚ್ಚು ಅಪಾಯಕಾರಿ ಪ್ರದೇಶ ಎಂದು ಪರಿಗಣಿಸಲಾಗಿದೆ. ಹೀಗಾಗಿ, ಪ್ರಮುಖ ವಾಣಿಜ್ಯ ಪ್ರದೇಶಗಳಾದ ದುರ್ಗದಬೈಲ್, ಬ್ರಾಡವೇ, ಕೊಪ್ಪಿಕರ ರಸ್ತೆ, ದಾಜಿಬಾನಪೇಟೆ, ಕಮರಿಪೇಟೆ, ಪುಣೆ-ಬೆಂಗಳೂರು ರಸ್ತೆಯ ಪ್ರಮುಖ ಭಾಗ, ಲ್ಯಾಮಿಂಗ್ಟನ್ ರಸ್ತೆ ಮೊದಲಾದ ಕಡೆಯಲ್ಲಿ ಕಂಟೈನ್ವೆುಂಟ್ ಬಿಗಿ ಆದೇಶ ಇರುವುದರಿಂದ ಸದ್ಯಕ್ಕೆ ಹೇಗೆ ಇದೆಯೋ ಹಾಗೆಯೇ ಇರಲಿದೆ. ಅಂದರೆ, ಲಾಕ್ಡೌನ್ ಮುಂದುವರಿಯಲಿದೆ. ಸೋಂಕಿತರ ಮನೆಯ 1 ಕಿ.ಮೀ. ಸುತ್ತಳತೆಯ ಆಚೆಗಿನ ಕಂಟೈನ್ವೆುಂಟ್ನಲ್ಲಿ ಅಗತ್ಯ ವಸ್ತುಗಳ ಅಂಗಡಿಗಳನ್ನು ಷರತ್ತುಬದ್ಧವಾಗಿ ತೆರೆಯಲು ಅನುಮತಿಸಲಾಗಿದೆ.
ಶಾಂತಿನಗರ ಸುತ್ತಮುತ್ತ: ಕೇಶ್ವಾಪುರ ಶಾಂತಿನಗರ ಪೂರ್ವಕ್ಕೆ ಸಂಗಿನಿ ವಿಲ್ಲಾ, ಪಶ್ಚಿಮಕ್ಕೆ ವಿಜಯ ನಗರ ತಿರುಪತಿ ಬಜಾರ್, ಉತ್ತರಕ್ಕೆ ಗೋಪನಕೊಪ್ಪದ ಕೊನೆಯ ಬಸ್ ನಿಲ್ದಾಣ, ದಕ್ಷಿಣಕ್ಕೆ ಸವೋದಯ ಸರ್ಕಲ್ ಪ್ರದೇಶವು ಕಂಟೈನ್ವೆುಂಟ್ನ ಬಿಗಿ ಆದೇಶಕ್ಕೆ ಒಳಪಡುತ್ತವೆ.
17ರವರೆಗೆ ನಿಷೇಧಾಜ್ಞೆ: ಜಿಲ್ಲೆಯಾದ್ಯಂತ ಕರೊನಾ ಸೋಂಕು ಹರಡದಂತೆ ಸಾರ್ವಜನಿಕರ ಹಿತದೃಷ್ಟಿಯಿಂದ ಮುಂಜಾಗ್ರತಾ ಕ್ರಮವಾಗಿ ಮೇ 4ರಿಂದ 17ರವರೆಗೆ ಸಿಆರ್ಪಿಸಿ 1973ರ ಕಲಂ 144ರ ಅನ್ವಯ ನಿಷೇಧಾಜ್ಞೆ ಅವಧಿಯನ್ನು ವಿಸ್ತರಿಸಿ ಜಿಲ್ಲಾಧಿಕಾರಿ ದೀಪಾ ಚೋಳನ್ ಭಾನುವಾರ ಆದೇಶ ಹೊರಡಿಸಿದ್ದಾರೆ. ಸರ್ಕಾರಿ ವಾಹನಗಳಿಗೆ ಮತ್ತು ಕೋವಿಡ್ 19 ಕಾರ್ಯಾಚರಣೆಯಲ್ಲಿ ಕರ್ತವ್ಯನಿರತ ವಾಹನಗಳಿಗೆ ಈ ಆದೇಶ ಅನ್ವಯವಾಗುವುದಿಲ್ಲ. ನಿಯಂತ್ರಿತ ವಲಯಕ್ಕೆ ಇದರೊಂದಿಗೆ ಹೆಚ್ಚುವರಿಯಾದ ನಿರ್ಬಂಧಗಳು ಸಹ ಮುಂದುವರಿಯುತ್ತವೆ. ಈ ಆದೇಶವನ್ನು ಉಲ್ಲಂಘಿಸುವವರ ವಿರುದ್ಧ ಭಾರತೀಯ ದಂಡ ಸಂಹಿತೆಯ ಕಲಂ 188 ರ ಪ್ರಕಾರ ಕ್ರಮವನ್ನು ಜರುಗಿಸಲಾಗುವುದು ಎಂದು ಜಿಲ್ಲಾಧಿಕಾರಿ ದೀಪಾ ಚೋಳನ್ ಪರಿಷ್ಕೃತ ಆದೇಶದಲ್ಲಿ ತಿಳಿಸಿದ್ದಾರೆ.