ಭಟ್ಕಳ: ಕರೊನಾ ಸೋಂಕು ಆತಂಕ, ಭಯ ಹುಟ್ಟಿಸಿರುವುದರ ಜತೆಗೆ ಸರಳ ಬದುಕು ನಡೆಸುವುದನ್ನೂ ಕಲಿಸುತ್ತಿದೆ. ಇದಕ್ಕೆ ಉದಾಹರಣೆ ಎಂಬಂತೆ ನಡೆದ ಆನ್ಲೈನ್ ವಿವಾಹ.
ಹೌದು, ಭಟ್ಕಳದ ಮಹ್ಮದ್ ಆದಿಲ್ ಕೌಡ ಎಂಬ ಯುವಕ ಚೆನ್ನೈ ಮೂಲದ ಆಂಬೂರು ನಿವಾಸಿ ಆಫಿಯಾ ಎಂಬ ವಧುವಿನೊಂದಿಗೆ ಆನ್ಲೈನ್ನಲ್ಲಿಯೇ ವಿವಾಹವಾಗಿದ್ದಾರೆ.
ಮಾಲ್ಡೀವ್ಸ್ನಲ್ಲಿ ಪೈಲಟ್ ಆಗಿರುವ ಆದಿಲ್ ಲಾಕ್ಡೌನ್ ಪೂರ್ವದಲ್ಲಿ ವಿವಾಹದ ಸಂಬಂಧ ಬೆಂಗಳೂರಿಗೆ ಆಗಮಿಸಿದ್ದರು. ಆದರೆ, ಕರೊನಾ ಹಾವಳಿಯಿಂದ ಬೆಂಗಳೂರಿನಲ್ಲಿಯೇ ಲಾಕ್ ಆಗಬೇಕಾದ ಸ್ಥಿತಿ ನಿರ್ವಣವಾಯಿತು. ಅಂದು ರಾಜ್ಯದಿಂದ ಮತ್ತೊಂದು ರಾಜ್ಯಕ್ಕೆ ತೆರಳಿ ಕ್ವಾರಂಟೈನ್ ನಿಯಮ ಪಾಲಿಸುವ ಅನಿವಾರ್ಯತೆ ಇತ್ತು. ಹಾಗಾಗಿ ಎರಡೂ ಕುಟುಂಬದವರು ಆನ್ಲೈನ್ನಲ್ಲಿಯೇ ವಿವಾಹ ನೆರವೇರಿಸುವ ನಿರ್ಧಾರಕ್ಕೆ ಬಂದರು. ಅದೇ ರೀತಿ ಶುಕ್ರವಾರ ಬೆಂಗಳೂರಿನಲ್ಲಿ ವಿವಾಹ ನಡೆಯಿತು.
ಧರ್ಮಗುರು ಖಾಜಿ ಸಾಹೇಬ್ ಅವರ ಎದುರು ವಧು-ವರನ ಒಪ್ಪಿಗೆಯ ಸಹಿ ಹಾಕಿಸಿ ಕೊಳ್ಳುವ ಮೂಲಕ ವಿವಾಹ ಕಾರ್ಯಕ್ರಮ ನಡೆಸಿಕೊಟ್ಟರು. ಉಳಿದ ಕಾನಾತ್ಮಕ ವಿವಾಹ ದಾಖಲೆಗಳು ಚೆನ್ನೈನಲ್ಲಿ ಈಗಾಗಲೇ ಮಾಡಿಕೊಂಡಿದ್ದಾರೆ. ಈ ವಿವಾಹವನ್ನು ಇವರ ಸಂಬಂಧಿಕರು ಮತ್ತು ಸ್ನೇಹಿತರು ಸಿಸ್ಕೋ ಆಪ್ ಮೂಲಕ ಆನ್ ಲೈನ್ ನಲ್ಲಿ ವಿವಾಹ ಸಮಾರಂಭ ನೋಡಿ ಸಂತೋಷ ಪಟ್ಟರು.
ಕರೊನಾ ಲಾಕ್ಡೌನ್ನಿಂದಾಗಿ ಭಟ್ಕಳದಲ್ಲಿ ಮುಸ್ಲಿಂ ಸಮುದಾಯವೊಂದರಲ್ಲೇ ನೂರಕ್ಕೂ ಹೆಚ್ಚು ವಿವಾಹಗಳು ಸ್ಥಗಿತಗೊಂಡಿವೆ. ಈಗ ಆನ್ ಲೈನ್ ವಿವಾಹಗಳಲ್ಲಿ ಯಾವುದೇ ಸಮಸ್ಯೆ ಎದುರಾಗದು ಎಂಬುದನ್ನು ಈ ಘಟನೆ ತೋರಿಸಿಕೊಟ್ಟಿದೆ.