ಧಾರವಾಡ: ಕರೋನಾ ವೈರಸ್ ಭೀತಿ ಹಿನ್ನೆಲೆಯಲ್ಲಿ ಆನ್ಲೈನ್ನಲ್ಲೆ ಪಾಠ-ಪ್ರವಚನಗಳು ನಡೆಯುತ್ತಿವೆ. ಇದೀಗ ನಗರದಲ್ಲಿ ಆನ್ಲೈನ್ ಮೂಲಕವೇ ಮದುವೆ ಮಾಡಿದ ಘಟನೆ ನಡೆದಿದೆ.
ಧಾರವಾಡದ ಯುವಕ ಹಾಗೂ ಕೊಪ್ಪಳದ ಯವತಿಯ ಮದುವೆಯನ್ನು ಏ. 19ರಂದು ನಿಶ್ಚಯಿಸಲಾಗಿತ್ತು. ಆದರೆ ಕರೊನಾ ವೈರಸ್ ಹರಡುವಿಕೆ ತಡೆಯಲು ಲಾಕ್ಡೌನ್ ವಿಧಿಸಿದ ಹಿನ್ನೆಲೆಯಲ್ಲಿ ನಿಗದಿತ ದಿನವೇ ಆನ್ಲೈನ್ನಲ್ಲಿ ಮದುವೆಯಾಗಿ ಪತಿ-ಪತ್ನಿಯಾಗಿದ್ದಾರೆ.
ಇಲ್ಲಿನ ಆದರ್ಶ ನಗರದ ಇಮ್ರಾನ್ ನದಾಫ್ ಜತೆಗೆ ಕೊಪ್ಪಳದ ತಾಜಮಾ ಬೇಗಂ ಜೊತೆಗೆ ವೀಡಿಯೋ ಕಾಲ್ ಮೂಲಕ ವಿವಾಹ ಮಾಡಲಾಯಿತು. ವರನ ಸ್ವಗೃಹ ಹಾಗೂ ವಧುವಿನ ಮನೆಯಲ್ಲಿ ಲ್ಯಾಪಟಾಪ್ ಇಟ್ಟು ಈ ಮೂಲಕ ಗುರುಹಿರಿಯರ ಸಮ್ಮುಖದಲ್ಲಿ ಮುಸ್ಲಿಂ ಸಮಾಜದ ಸಂಪ್ರದಾಯಗಳನ್ನು ನೆರವೇರಿಸಲಾಯಿತು. ಈ ಸಂದರ್ಭದಲ್ಲಿ ಎರಡು ಕುಟುಂಬದ ಸದಸ್ಯರು ಮಾಸ್ಕ್ ಹಾಕಿಕೊಂಡೇ ಸಂಪ್ರದಾಯಗಳನ್ನು ನೆರವೇರಿಸಿದ್ದು ವಿಶೇಷವಾಗಿತ್ತು.
ಜನವರಿ ತಿಂಗಳಲ್ಲಿ ನಿಶ್ಚಿತಾರ್ಥ ನೆರವೇರಿಸಿ ಏ.19ರಂದು ಮದುವೆ ಮಾಡಲು ನಿಶ್ಚಯಿಸಲಾಗಿತ್ತು. ಆದರೆ, ಲಾಕ್ಡೌನ್ ಕಾರಣದಿಂದ ಜಿಲ್ಲಾಡಳಿತಕ್ಕೆ ಮದುವೆ ಬಗ್ಗೆ ಮಾಹಿತಿ ನೀಡಿದಾಗ 4 ಜನರು ಮಾತ್ರ ತೆರಳಲು ಪರವಾನಗಿ ಕೊಡುವುದಾಗಿ ಹೇಳಿದರು. ಹೀಗಾಗಿ ಎರಡೂ ಕುಟುಂಬಗಳ ಒಪ್ಪಿಗೆ ಮೇರೆಗೆ ಆನ್ಲೈನ್ ಮೂಲಕ ಸರಳವಾಗಿ ಮದುವೆ ಮಾಡಲಾಗಿದ್ದು, ಲಾಕ್ಡೌನ್ ನಂತರದಲ್ಲಿ ಕೊಪ್ಪಳದಲ್ಲಿರುವ ಪತ್ನಿಯನ್ನು ಕರೆತರಲಾಗುವುದು ಎಂದು ವರ ಇಮ್ರಾನ್ ತಿಳಿಸಿದರು.