ನವದೆಹಲಿ: ದೇಶಿಯವಾಗಿ ಅಭಿವೃದ್ಧಿಪಡಿಸಲಾಗಿರುವ ದೇಶದ 2ನೇ ಕೋವಿಡ್-19 ರೋಗನಿರೋಧಕ ಚುಚ್ಚುಮದ್ದಿನ ಹೆಸರು ಇದೀಗ ಬಹಿರಂಗಗೊಂಡಿದೆ. ಅಹಮದಾಬಾದ್ ಮೂಲದ ಝೈಡಸ್ ಕ್ಯಾಡಿಲಾ ಹೆಲ್ತ್ಕೇರ್ ಕಂಪನಿ ಇದನ್ನು ಸಿದ್ಧಪಡಿಸಿದ್ದು ಇದಕ್ಕೆ ಝೈಕೋವ್-ಡಿ (ZyCoV-D) ಎಂದು ನಾಮಕರಣ ಮಾಡಿದೆ.
ಇದರ ಮೊದಲ ಹಂತದ ಕ್ಲಿನಿಕಲ್ ಟ್ರಯಲ್ ಮುಗಿದಿದ್ದು, ಝೈಕೋವ್-ಡಿಯನ್ನು ಮಾನವರ ಮೇಲಿನ ಪ್ರಯೋಗಿಸಲು ಅಗತ್ಯ ಅನುಮತಿ ದೊರೆತಿರುವುದಾಗಿ ಝೈಡಸ್ ಕ್ಯಾಡಿಲಾ ಹೆಲ್ತ್ಕೇರ್ ಶುಕ್ರವಾರ ತಿಳಿಸಿತ್ತು.
ಝೈಕೋವ್-ಡಿ ಚುಚ್ಚುಮದ್ದನ್ನು ಪ್ರಾಣಿಗಳ ಮೇಲೆ ಪ್ರಯೋಗಿಸಿದಾಗ ಅದರಿಂದ ಭಾರಿ ರೋಗನಿರೋಧಕ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಇದು ಎಲ್ಲ ರೀತಿಯ ಬಲಿಷ್ಠವಾದ ವೈರಾಣುವನ್ನೂ ನಿಷ್ಕ್ರಿಯಗೊಳಿಸಬಲ್ಲದ್ದಾಗಿದೆ. ತನ್ಮೂಲಕ ಈ ಚುಚ್ಚುಮದ್ದಿನ ರಕ್ಷಣಾತ್ಮಕ ಸಾಮರ್ಥ್ಯ ಸಂಪೂರ್ಣವಾಗಿ ಸಾಬೀತಾಗಿದೆ ಎಂದು ಝೈಡಸ್ ಸಂಸ್ಥೆ ಹೇಳಿದೆ.
ಇದನ್ನೂ ಓದಿ: ಮಂಗಳ ಗ್ರಹದ ಬಹುದೊಡ್ಡ ಚಂದ್ರನ ಚಿತ್ರ ರವಾನಿಸಿದ ಮಾಮ್
ದೇಶದ ವಿವಿಧೆಡೆಗಳಿಂದ 1 ಸಾವಿರ ಕರೊನಾ ಸೋಂಕಿತರನ್ನು ಬಳಸಿಕೊಂಡು ಝೈಕೋವ್-ಡಿ ಚುಚ್ಚಮದ್ದನ್ನು ಮಾನವರ ಮೇಲೆ ಪ್ರಯೋಗಿಸಲಾಗುವುದು. ಭಾರತ ಮತ್ತು ಜಾಗತಿಕ ಬೇಡಿಕೆಗಳನ್ನು ಪೂರೈಸಲು ಅಗತ್ಯವಾದ ಸಾಮರ್ಥ್ಯ ಹೆಚ್ಚಳಕ್ಕೂ ನಿರ್ಧರಿಸಲಾಗಿದೆ ಎಂದು ಹೇಳಿದೆ.
ಮನುಷ್ಯರಿಗೆ ಕೊಡಬೇಕಿರುವ ಡೊಸೇಜ್ನ ಮೂರು ಪಟ್ಟು ಡೋಸ್ ಇಂಜೆಕ್ಷನ್ ಅನ್ನು ಮೊಲಗಳಿಗೆ ಕೊಡಲಾಗಿತ್ತು. ಆದರೂ, ಅವುಗಳ ಪ್ರಾಣಕ್ಕೆ ಏನೊಂದು ಸಮಸ್ಯೆ ಆಗಲಿಲ್ಲ. ಇದನ್ನು ಗಮನಿಸಿದಾಗ, ಪುನರಾವರ್ತಿತ ಡೋಸ್ ವಿಷಕಾರಿಯಾಗಿ ಪರಿಣಮಿಸುವುದಿಲ್ಲ ಎಂಬುದು ಸ್ಪಷ್ಟವಾಗುತ್ತದೆ ಎಂದು ತಿಳಿಸಿದೆ.