ಟೋಕಿಯೊ: ತನ್ನ ನಗುವಿನ ಮೇಲೆ ಬಲವಾದ ನಂಬಿಕೆ ಇಟ್ಟಿರುವ ಜಪಾನ್ ವ್ಯಕ್ತಿಯೊಬ್ಬ 112 ವರ್ಷ ಹಾಗೂ 344 ದಿನದೊಂದಿಗೆ ವಿಶ್ವದ ಅತ್ಯಂತ ಹಿರಿಯ ಪುರುಷನೆಂಬ ಗಿನ್ನೆಸ್ ವಿಶ್ವದಾಖಲೆಯ ಭಾಜನಕ್ಕೆ ಪಾತ್ರರಾಗಿದ್ದಾರೆ.
ಉತ್ತರ ಜಪಾನ್ನ ನಿಗಾಟ ನಿವಾಸಿಯಾಗಿರುವ ಛಿತೆತ್ಸು ವಾಟನಬೆ 1907ರಲ್ಲಿ ಜನಿಸಿದರು. ದೀರ್ಘಾಯುಷಿ ಸಾಧನೆ ಮಾಡಿರುವ ಛಿತೆತ್ಸು ಬುಧವಾರ ತಮ್ಮ ಸಾಧನೆಯ ಅಂಗವಾಗಿ ಗಿನ್ನೆಸ್ ವಿಶ್ವದಾಖಲೆಯ ಪ್ರಮಾಣ ಪತ್ರವನ್ನು ಪಡೆದುಕೊಂಡರು.
ಇದೇ ವೇಳೆ ನಿಮ್ಮ ದೀರ್ಘಾಯುಷ್ಯದ ಗುಟ್ಟೇನು ಎಂದು ಛಿತೆತ್ಸುರನ್ನು ಪ್ರಶ್ನಿಸಿದಾಗ “ಕೋಪ ಮಾಡಿಕೊಳ್ಳಬೇಡಿ ಮತ್ತು ಯಾವಾಗಲೂ ನಗುತ್ತಿರಿ” ಎಂದು ಸಲಹೆ ನೀಡಿದರು.
ಇದಕ್ಕೂ ಮುನ್ನ ಅತ್ಯಂತ ಹಿರಿಯ ಪುರುಷ ಎನಿಸಿಕೊಂಡಿದ್ದ ಜಪಾನ್ ಮೂಲದವರೇ ಆದ ಮಸಾಜೊ ನೊನಕಾ ಕಳೆದ ತಿಂಗಳು ಮರಣ ಹೊಂದಿದರು. ವಿಶೇಷವೆಂದರೆ ವಿಶ್ವದ ಅತ್ಯಂತ ಹಿರಿಯ ವ್ಯಕ್ತಿ ಎಂಬ ಕೀರ್ತಿಗೆ ಕೇನ್ ತನಕಾ ಪಾತ್ರರಾಗಿದ್ದಾರೆ. 117 ವರ್ಷ ವಯಸ್ಸಾಗಿದ್ದು, ಇವರು ಕೂಡ ಜಪಾನ್ ಮೂಲದವರು. ವಿಶ್ವದ ಅತ್ಯಂತ ಹಿರಿಯ ಮಹಿಳೆಯು ಹೌದು.
ಕೃಷಿ ಶಾಲೆಯಲ್ಲಿ ಪದವೀಧರರಾಗಿರುವ ಛಿತೆತ್ಸು, ತೈವಾನ್ನ ದೈ ನಿಪ್ಪಾನ್ ಮೇಜಿ ಸುಗರ್ನಲ್ಲಿ ಕೆಲಸ ಮಾಡಿದ್ದಾರೆ. ಸುಮಾರು 18 ವರ್ಷಗಳ ಕಾಲ ತೈವಾನ್ನಲ್ಲಿ ವಾಸವಿದ್ದರು. ಮಿತ್ಸೂ ಎಂಬಾಕೆಯನ್ನು ಛಿತೆತ್ಸು ಮದುವೆಯಾಗಿದ್ದು, ಇವರಿಗೆ ಐವರು ಮಕ್ಕಳಿದ್ದಾರೆ. ಎರಡನೇ ವಿಶ್ವಯುದ್ಧ ಮುಗಿದ ಬಳಿಕ ನಿಗಾಟಗೆ ಮರಳಿದ ಛಿತೆತ್ಸು ನಿವೃತ್ತಿಯವರೆಗೂ ಸರ್ಕಾರಿ ಸೇವೆ ಸಲ್ಲಿಸಿದ್ದಾರೆ ಎಂದು ಗಿನ್ನೆಸ್ ರೆಕಾರ್ಡ್ ತಿಳಿಸಿದೆ. (ಏಜೆನ್ಸೀಸ್)