ಟ್ರಿನಿಡಾಡ್: ಆರಂಭಿಕ ಫಿಲ್ ಸಾಲ್ಟ್ (119 ರನ್, 57 ಎಸೆತ, 7 ಬೌಂಡರಿ, 10 ಸಿಕ್ಸರ್) ಸಿಡಿಸಿದ ಸತತ 2ನೇ ಶತಕದ ನೆರವಿನಿಂದ ಪ್ರವಾಸಿ ಇಂಗ್ಲೆಂಡ್ ತಂಡ 4ನೇ ಟಿ20 ಪಂದ್ಯದಲ್ಲಿ ಅತಿಥೇಯ ವೆಸ್ಟ್ ಇಂಡೀಸ್ ಎದುರು ರನ್ ಪ್ರವಾಹ ಹರಿಸಿ 75 ರನ್ಗಳಿಂದ ಭರ್ಜರಿ ಗೆಲುವು ದಾಖಲಿಸಿದೆ. ಇದರೊಂದಿಗೆ ಜೋಸ್ ಬಟ್ಲರ್ ಬಳಗ 5 ಪಂದ್ಯಗಳ ಸರಣಿಯಲ್ಲಿ 2-2 ಸಮಬಲ ಸಾಧಿಸಿದ್ದು, ಅಂತಿಮ ಪಂದ್ಯ ಶುಕ್ರವಾರ ನಡೆಯಲಿದೆ.
ಮಂಗಳವಾರ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿದ ಆಂಗ್ಲರು, ಫಿಲ್ ಸಾಲ್ಟ್-ಜೋಸ್ ಬಟ್ಲರ್ (55) ಒದಗಿಸಿದ ಆರಂಭದಿಂದ 3 ವಿಕೆಟ್ಗೆ 267 ರನ್ಗಳ ಬೃಹತ್ ಮೊತ್ತ ಕಲೆಹಾಕಿತು. ಇದು ಟಿ20 ಕ್ರಿಕೆಟ್ನಲ್ಲಿ ದಾಖಲಾದ 5ನೇ ಗರಿಷ್ಠ ಮೊತ್ತವಾಗಿದೆ. ಪ್ರತಿಯಾಗಿ ಆಂಡ್ರೆ ರಸ್ಸೆಲ್ (51 ರನ್, 25 ಎಸೆತ, 3 ಬೌಂಡರಿ, 5 ಸಿಕ್ಸರ್) ಪ್ರತಿರೋಧದ ನಡುವೆಯೂ, ವಿಂಡೀಸ್ 15.3 ಓವರ್ಗಳಲ್ಲಿ 192 ರನ್ಗಳಿಗೆ ಸರ್ವಪತನ ಕಂಡಿತು.
ಇಂಗ್ಲೆಂಡ್: 3 ವಿಕೆಟ್ಗೆ 267 (ಫಿಲ್ ಸಾಲ್ಟ್ 119, ಬಟ್ಲರ್ 55, ವಿಲ್ ಜಾಕ್ಸ್ 24, ಲಿವಿಂಗ್ಸ್ಟೋನ್ 54, ಅಕೀಲ್ ಹೊಸೈನ್ 36ಕ್ಕೆ1). ವೆಸ್ಟ್ ಇಂಡೀಸ್: 15.3 ಓವರ್ಗಳಲ್ಲಿ 192 (ಮೇಯರ್ಸ್ 12, ಪೂರನ್ 39, ರುದರ್ಪೋರ್ಡ್ 36, ರಸ್ಸೆಲ್ 51, ರೀಸ್ ಟಾಪ್ಲೆ 37ಕ್ಕೆ3, ಸ್ಯಾಮ್ ಕರ್ರನ್ 25ಕ್ಕೆ2). ಪಂದ್ಯಶ್ರೇಷ್ಠ: ಫಿಲ್ ಸಾಲ್ಟ್.
ಸಾಲ್ಟ್ ಐಪಿಎಲ್ನಲ್ಲಿ ಅನ್ಸೋಲ್ಡ್!
ಐಪಿಎಲ್ ಹರಾಜಿಗೂ ಮುನ್ನ ಶತಕ ಸಿಡಿಸಿದ್ದ ಸಾಲ್ಟ್, ಹರಾಜಿನ ಬಳಿಕವೂ ಶತಕ ಸಿಡಿಸಿದರು. ಕಳೆದ ಬಾರಿ ₹1.5 ಕೋಟಿ ಮೂಲಬೆಲೆಗೆ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಸೇರಿದ್ದ ಸಾಲ್ಟ್ ಈ ಬಾರಿ ಅನ್ಸೋಲ್ಡ್ ಆದರು. ಇಂಗ್ಲೆಂಡ್ ಸ್ಪಿನ್ನರ್ ಆದಿಲ್ ರಶೀದ್ ಟಿ20 ಬೌಲರ್ಗಳ ರ್ಯಾಂಕಿಂಗ್ನಲ್ಲಿ ನಂ.1 ಸ್ಥಾನಕ್ಕೇರಿದ್ದಾರೆ. ಆದರೆ ಮಿನಿ ಹರಾಜಿನಲ್ಲಿ ಯಾವ ತಂಡವೂ ಅವರ ಖರೀದಿಗೆ ಆಸಕ್ತಿ ತೋರಲಿಲ್ಲ. 2023ರಲ್ಲಿ ಸನ್ರೈಸರ್ಸ್ ಪರ ರಶೀದ್ ಆಡಿದ್ದರು.