ನವದೆಹಲಿ: ಕರೊನಾ ವೈರಸ್ ಸೋಂಕು ಹರಡದಂತೆ ತಡೆಯುವ ನಿಟ್ಟಿನಲ್ಲಿ ಭಾರತ ಹಲವು ಉಪಕ್ರಮಗಳನ್ನು ತೆಗೆದುಕೊಂಡಿದ್ದು, ಆ ಕಾರ್ಯಗಳನ್ನು ಸುಸೂತ್ರವಾಗಿ ನಡೆಸುವುದಕ್ಕೆ ಅನುಕೂಲವಾಗುವಂತೆ ವಿಶ್ವಬ್ಯಾಂಕ್ ಗುರುವಾರ 100 ಕೋಟಿ ಡಾಲರ್ ತುರ್ತು ಹಣಕಾಸಿನ ನೆರವು ನೀಡಲು ಒಪ್ಪಿಗೆ ನೀಡಿದೆ.
ವಿಶ್ವ ಬ್ಯಾಂಕ್ ಘೋಷಿಸಿರುವ ಮೊದಲ ಹಣಕಾಸು ನೆರವು ಯೋಜನೆ 1.9 ಶತಕೋಟಿ ಡಾಲರ್ ಮೌಲ್ಯದ್ದಾಗಿದ್ದು, ಇದರ ಭಾಗವಾಗಿಯೇ ಭಾರತಕ್ಕೂ ನೆರವು ಲಭಿಸುತ್ತಿದೆ. ಭಾರತವೂ ಸೇರಿ 25 ರಾಷ್ಟ್ರಗಳಿಗೆ ಈ ನೆರವು ಸಿಗುತ್ತಿದೆ. ಭಾರತಕ್ಕೆ ಅಧಿಕ ನೆರವು ಲಭಿಸುತ್ತಿದೆ. ಉತ್ತಮ ಸ್ಕ್ರೀನಿಂಗ್, ಕಾಂಟ್ಯಾಕ್ಟ್ ಟ್ರೇಸಿಂಗ್, ಲ್ಯಾಬ್ ಡಯಾಗ್ನೋಸ್ಟಿಕ್ಸ್, ಪಿಪಿಇ ಕಿಟ್ ಸಿದ್ಧಪಡಿಸುವುದು, ಐಸೋಲೇಷನ್ ವಾರ್ಡ್ ಸಿದ್ಧಪಡಿಸುವುದಕ್ಕೆ ಈ ಹಣವನ್ನು ಉಪಯೋಗಿಸಬಹುದು. ತ್ವರಿತಗತಿಯಲ್ಲಿ ಕೆಲಸವನ್ನು ಪೂರೈಸಿಕೊಳ್ಳಬಹುದು ಎಂದು ವಿಶ್ವಬ್ಯಾಂಕ್ ಹೇಳಿದೆ.
ದಕ್ಷಿಣ ಏಷ್ಯಾದಲ್ಲಿ ವಿಶ್ವಬ್ಯಾಂಕ್ ಭಾರತವನ್ನು ಹೊರತು ಪಡಿಸಿ ಪಾಕಿಸ್ತಾನಕ್ಕೆ 200 ದಶಲಕ್ಷ ಡಾಲರ್, ಅಫ್ಘಾನಿಸ್ತಾನಕ್ಕೆ 100 ದಶಲಕ್ಷ ಡಾಲರ್, ಮಾಲ್ಡೀವ್ಸ್ಗೆ 7.3 ದಶಲಕ್ಷ ಡಾಲರ್, ಶ್ರೀಲಂಕಾಕ್ಕೆ 128.6 ದಶಲಕ್ಷ ಡಾಲರ್ ನೆರವನ್ನು ನೀಡಲು ಒಪ್ಪಿಗೆ ಸೂಚಿಸಿದೆ. ಮುಂದಿನ 15 ತಿಂಗಳ ಅವಧಿಯಲ್ಲಿ 160 ಶತಕೋಟಿ ಹಣಕಾಸು ನೆರವು ನೀಡುವ ನಿಟ್ಟಿನಲ್ಲಿ ಬ್ಯಾಂಕ್ ಕೆಲಸ ಮಾಡುತ್ತಿರುವುದಾಗಿ ವಿಶ್ವಬ್ಯಾಂಕ್ ತಿಳಿಸಿದೆ. (ಏಜೆನ್ಸೀಸ್)
ಕರೊನಾ ತಡಗೆ ಏಪ್ರಿಲ್ 5ರ ಸಂಕಲ್ಪ ಏನು- ವಿಡಿಯೋ ಸಂದೇಶದಲ್ಲಿ ಪ್ರಧಾನಿ ಮೋದಿ ವಿವರಿಸಿದ್ದಾರೆ ನೋಡಿ…