ಲಂಡನ್: ಜಗತ್ತಿನೆಲ್ಲೆಡೆ ಮಾರಕ ಕೊರೊನಾ ವೈರಸ್ ಭೀತಿ ಸೃಷ್ಟಿಸಿದೆ. ಇದೇ ಭೀತಿ ಭಾರತೀಯ ಮೂಲದ ಯುವತಿಯೊಬ್ಬಳ ಮೇಲಿನ ಹಲ್ಲೆಗೂ ಕಾರಣವಾಗಿರುವುದು ದುರಾದೃಷ್ಟಕರ ಸಂಗತಿ. ಕೊರೊನಾ ವೈರಸ್ ಅನ್ನು ತನ್ನ ಜತೆಯಲ್ಲಿಯೇ ಹೊತ್ತು ತಂದಿದ್ದಾಳೆ ಎಂಬ ಚೀನಾ ಮೂಲದ ಸ್ನೇಹಿತೆಯ ವಿರುದ್ಧದ ಆರೋಪವನ್ನು ಅಲ್ಲಗೆಳೆದ ಭಾರತೀಯ ಮೂಲದ ಯುವತಿಯ ಮೇಲೆಯೇ ಪ್ರಜ್ಞೆ ಕಳೆದುಕೊಳ್ಳುವ ಮಟ್ಟಿಗೆ ಹಲ್ಲೆ ಮಾಡಿರುವ ಘಟನೆ ಬರ್ಮಿಂಗ್ಹ್ಯಾಮ್ನಲ್ಲಿ ನಡೆದಿದೆ.
ವಕೀಲ ತರಬೇತಿ ಪಡೆಯುತ್ತಿರುವ ಮೀರಾ ಸೊಲಂಕಿ ಇಂಗ್ಲೆಂಡ್ನ ಸೊಲಿಹಲ್ನಲ್ಲಿ ನೆಲೆಸಿದ್ದಾರೆ. ಸೋಲಂಕಿ ತನ್ನ 29ನೇ ಹುಟ್ಟುಹಬ್ಬವನ್ನು ಆಚರಿಸಲು ಸ್ನೇಹಿತೆಯೊಂದಿಗೆ ಬರ್ಮಿಂಗ್ಹ್ಯಾಮ್ನ ಅನಾ ರೊಚಾ ಬಾರ್ ಮತ್ತು ಫೆಡ್ರಿಕ್ ಸ್ಟ್ರೀಟ್ಗೆ ತೆರಳಿದ್ದರು.
ಲಂಡನ್ನಿಂದ ಬಂದಿದ್ದ ತನ್ನ 28 ವರ್ಷದ ಸ್ನೇಹಿತೆ ಮ್ಯಾಂಡಿ ಹೌಂಗ್ ಜತೆ ಸೋಲಂಕಿ ಹುಟ್ಟುಹಬ್ಬ ಆಚರಣೆಯ ಸ್ಥಳದಲ್ಲಿದ್ದರು. ಈ ವೇಳೆ ಏಷ್ಯನ್ ಪುರುಷರ ಗುಂಪೊಂದು ಸೋಲಂಕಿಯವರನ್ನು ಗುರಿಯಾಗಿಸಿಕೊಂಡಿದೆ. ಬಳಿಕ ಫೆ. 9ರ ಭಾನುವಾರ ಬೆಳಗ್ಗೆ 2 ಗಂಟೆ ಸಮಯದಲ್ಲಿ ಸೋಲಂಕಿ ತನ್ನ ಸ್ನೇಹಿತೆಯೊಂದಿಗೆ ಬಾರ್ನಿಂದ ಹೊರಬರುತ್ತಲೇ ಹಿಂಬಾಲಿಸಿಕೊಂಡು ಬಂದ ಓರ್ವ ವ್ಯಕ್ತಿ ಕಿರುಕುಳು ನೀಡಿದ್ದಾಗಿ ಸೋಲಂಕಿ ಹೇಳಿಕೊಂಡಿದ್ದಾರೆ.
ಚೈನೀಸ್ ಸ್ನೇಹಿತರು ಸೇರಿದಂತೆ ಹುಡುಗಿಯರು ಮತ್ತು ಹುಡುಗರೊಂದಿಗೆ ಹುಟ್ಟುಹಬ್ಬ ಹಿನ್ನೆಲೆಯಲ್ಲಿ ಪಾರ್ಟಿ ಮಾಡುತ್ತಿದ್ದೆವು. ಅಲ್ಲಿ ಏಷ್ಯನ್ ಪುರುಷರ ಒಂದು ಗುಂಪು ಇತ್ತು. ಬಳಿಕ ಓರ್ವ ಬಂದು ಕಿರುಕುಳ ನೀಡಿದ. ಅದನ್ನು ನಾವು ನಿರ್ಲಕ್ಷಿಸಿದೆವು. ಆದರೂ ಆತ ನನ್ನ ಓರ್ವ ಸ್ನೇಹಿತೆ ಮೇಲೆ ಉಗುಳಿದ. ಕೊನೆಯಲ್ಲಿ ಚೈನೀಸ್ ಸ್ನೇಹಿತೆ ಸೇರಿ ಮೂವರು ಉಳಿದುಕೊಂಡೆವು. ಆತ ಮತ್ತೆ ನಮ್ಮ ಬಳಿ ಬಂದು ಉದ್ರಿಕ್ತನಾಗಿ ಮಾತನಾಡಿದ್ದಲ್ಲದೆ, ನಮ್ಮನ್ನೇ ಹಿಂಬಾಲಿಸುತ್ತಿದ್ದ. ಅಲ್ಲದೆ, ಅಶ್ಲೀಲ ಪದಗಳಿಂದ ಜರಿಯುತ್ತಿದ್ದ ಎಂದು ಹೇಳಿದ್ದಾರೆ.
ಅಲ್ಲದೆ, ನನ್ನ ಚೈನೀಸ್ ಸ್ನೇಹಿತೆ ಕುರಿತು ನಿಮ್ಮ ಕೊರೊನಾ ವೈರಸ್ ಅನ್ನು ನಿಮ್ಮ ತವರಿಗೆ ವಾಪಸ್ ತೆಗೆದುಕೊಂಡು ಹೋಗು ಎಂದು ಹೇಳಿದ. ಇದರಿಂದ ನಾನು ಅವನತ್ತ ಕೋಪದಿಂದ ಕೂಗಿದೆ. ನಮ್ಮ ಬಳಿ ಬಂದ ಅವನನ್ನು ದೂರ ತಳ್ಳಿದೆ. ಆದರೆ, ಆತ ನನ್ನ ತಲೆಗೆ ಬಲವಾಗಿ ಹೊಡೆದ, ಇದರಿಂದ ನಾನು ಪ್ರಜ್ಞೆ ಕಳೆದುಕೊಂಡೆ. ಆ ಬಳಿಕವು ನನಗೆ ಸಹಾಯ ಮಾಡದೇ ಸುಮ್ಮನೇ ಹೊಗುವಂತೆ ಸ್ನೇಹಿತೆಯರಿಗೆ ಬೆದರಿಕೆ ಒಡ್ಡಿರುವುದಾಗಿ ಸ್ನೇಹಿತೆಯರು ತಿಳಿಸಿದರು. ನಾನು ಹಾರ್ಟ್ಲ್ಯಾಂಡ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದುಕೊಂಡೆ ಎಂದು ಸೋಲಂಕಿ ಘಟನೆಯನ್ನು ವಿವರಿಸಿದ್ದಾರೆ. ಅಲ್ಲದೆ, ಆತನ ವರ್ತನೆಯಿಂದ ತಾನು ತುಂಬಾ ಶಾಕ್ಗೆ ಒಳಗಾಗಿದ್ದಾಗಿ ಹೇಳಿಕೊಂಡಿದ್ದಾರೆ. (ಏಜೆನ್ಸೀಸ್)