ನವದೆಹಲಿ: ಉತ್ತರ ಕೊರಿಯಾದ್ದು ಪುರುಷ ಪ್ರಧಾನ ಸಮಾಜ. ಹಾಗಾಗಿ ಅಲ್ಲಿ ಇದುವರೆಗೂ ಆಡಳಿತ ನಡೆಸಿದವರೆಲ್ಲರೂ ಪುರುಷರೇ ಆಗಿದ್ದಾರೆ. ಆದರೆ ಸದ್ಯ ಆಡಳಿತದ ಹೊಣೆ ಹೊತ್ತಿರುವ ಕಿಮ್ ಜಾಂಗ್ ಉನ್ ಅವರ ಆರೋಗ್ಯದ ಬಗ್ಗೆ ಊಹಾಪೋಹಗಳು ಮುಂದುವರಿದಿರುವಂತೆ, ಅವರ ಸಹೋದರಿ ಮುಂದಿನ ಆಡಳಿತ ವಹಿಸಿಕೊಳ್ಳುವ ಸಾಧ್ಯತೆಗಳು ದಟ್ಟವಾಗುತ್ತಿವೆ.
ಆದರೆ, ಪುರುಷ ಪ್ರಧಾನ ಸಮಾಜದಲ್ಲಿ ಮಹಿಳಾ ನಾಯಕತ್ವ ಒಪ್ಪಿಕೊಳ್ಳುವ ಬಗ್ಗೆ ಅನುಮಾನಗಳು ವ್ಯಕ್ತವಾಗುತ್ತಿವೆ. ಕಿಮ್ ಜಾಂಗ್ ಉನ್ ಅವರ ಸಹೋದರಿ ಕಿಮ್ ಯೋ ಜಾಂಗ್ ಆಡಳಿತ ವಲಯದಲ್ಲಿ ಹಂತಹಂತವಾಗಿ ಮೇಲಕ್ಕೆ ಬಂದಿದ್ದಾರೆ. ಸದ್ಯ 31-32 ವರ್ಷ ವಯಸ್ಸಿನರಾಗಿರುವ ಅವರು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಜತೆಗಿನ ಎರಡು ಶೃಂಗಗಳು, ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಭೇಟಿಯ ಸಂದರ್ಭದಲ್ಲಿ ಕಿಮ್ ಜಾಂಗ್ ಉನ್ ಅವರನ್ನು ನೆರಳಿನಂತೆ ಹಿಂಬಾಲಿಸಿದ್ದರು. ತಮ್ಮೊಂದಿಗೆ ಶೃಂಗ ಸಭೆಗೆ ಆಗಮಿಸುವಂತೆ ಕೋರಿ ಕಿಮ್ ಜಾಂಗ್ ಉನ್ ದಕ್ಷಿಣ ಕೊರಿಯಾದ ಅಧ್ಯಕ್ಷ ಮೂನ್ ಜೇ ಅವರಿಗೆ ಕಳುಹಿಸಿದ್ದ ಸಂದೇಶವನ್ನು ಅಲ್ಲಿಗೇ ಹೋಗಿ ವೈಯಕ್ತಿಕವಾಗಿ ತಲುಪಿಸಿದ್ದರು.
ಕಿಮ್ ಯೋ ಜಾಂಗ್ ಅಧಿಕಾರಕ್ಕೆ ಬರುತ್ತಾರೆ ಎಂದು ಹೇಳಲು ಇನ್ನೂ ಎರಡು ಕಾರಣಗಳಿವೆ. ಕಿಮ್ ಜಾಂಗ್ ಉನ್ ನಂತರದಲ್ಲಿ ಉತ್ತರ ಕೊರಿಯಾದ ಆಡಳಿತ ಚುಕ್ಕಾಣಿಯನ್ನು ಸಮರ್ಥವಾಗಿ ನಿಭಾಯಿಸಬಲ್ಲ ಪುರುಷರು ಯಾರೂ ಇಲ್ಲ. ಇರುವ ಇಬ್ಬರು ಸಹೋದರರ ಪೈಕಿ ಕಿಮ್ ಜಾಂಗ್ ಚೋಲ್ ಎಂಬುವರಿಗೆ ರಾಜಕೀಯಕ್ಕಿಂತಲೂ ಗಿಟಾರ್ ನುಡಿಸುವುದರಲ್ಲೇ ಹೆಚ್ಚು ಆಸಕ್ತಿ. ಮತ್ತೊಬ್ಬ ಸಹೋದರ ಕಿಮ್ ಹ್ಯಾನ್ ಸೋಲ್ ಆಡಳಿತದ ಉಸಾಬರಿಯೇ ಬೇಡ ಎಂದು ಹೇಳಿ ವಿದೇಶದಲ್ಲಿ ನೆಲೆಸಿದ್ದಾರೆ. ಹೀಗಾಗಿ, ಕಿಮ್ ಜಾಂಗ್ ಉನ್ ಕುಟುಂಬದಲ್ಲಿ ಅವರ ನಂತರ ಉತ್ತರ ಕೊರಿಯಾದ ಆಡಳಿತ ವಹಿಸಿಕೊಳ್ಳಲು ಸಮರ್ಥರಾದವರು ಎಂದರೆ ಕಿಮ್ ಯೋ ಜಾಂಗ್ ಒಬ್ಬರೇ ಆಗಿದ್ದಾರೆ.
ಕಿಮ್ ಕುಟುಂಬಸ್ಥರೇ ಮೊದಲಿನಿಂದಲೂ ಉತ್ತರ ಕೊರಿಯಾವನ್ನು ಆಳುತ್ತಾ ಬಂದಿರುವ ಹಿನ್ನೆಲೆಯಲ್ಲಿ ಆ ಕುಟುಂಬದವರೇ ಆಗಿರುವ ಕಿಮ್ ಯೋ ಜಾಂಗ್ ಅವರೇ ದೇಶದ ಆಡಳಿತ ಹಿಡಿಯಲಿ ಎಂದು ಬಯಸುವವರು ಬಹಳಷ್ಟು ಜನರಿದ್ದಾರೆ. ಆದರೆ, ಪುರುಷ ಪ್ರಧಾನ ಸಮಾಜವಾಗಿರುವ ಕಾರಣ ಇವರ ನಾಯಕತ್ವವನ್ನು ವಿರೋಧಿಸುವವರ ಸಂಖ್ಯೆಯೂ ದೊಡ್ಡದಾಗಿದೆ. ಈ ಹಿನ್ನೆಲೆಯಲ್ಲಿ ಉತ್ತರ ಕೊರಿಯಾದ ಮುಂದಿನ ಬೆಳವಣಿಗೆಗಳು ಭಾರಿ ಕುತೂಹಲ ಮೂಡಿಸಿವೆ.
ಕೋವಿಡ್ 19 ಚಿಕಿತ್ಸೆಗೆ ಅಗತ್ಯವಾದ ಪಿಪಿಇಯ ಶೇ.50 ಈ ನಗರದಲ್ಲೇ ತಯಾರಾಗುತ್ತದೆ… ಕೇಂದ್ರ ಸರ್ಕಾರದ ಮಾಹಿತಿ