ಬೀಜಿಂಗ್: ಸಿಸಿಟಿವಿ ವಿಡಿಯೋ ನೋಡುತ್ತಿದ್ದ ಮಹಿಳೆ ಆಕಸ್ಮಿಕವಾಗಿ ಪತಿಯ ಅಕ್ರಮ ಸಂಬಂಧ ತಿಳಿದು ಆಘಾತಕ್ಕೀಡಾದ ಘಟನೆ ಚೀನಾದಲ್ಲಿ ನಡೆದಿರುವುದು ರಿಯಾಲಿಟಿ ಶೋ ಒಂದರಲ್ಲಿ ಬೆಳಕಿಗೆ ಬಂದಿದೆ.
ರಿಯಾಲಿಟಿ ಶೋನಲ್ಲಿ ಪೊಲೀಸ್ ಅಧಿಕಾರಿಗಳು ಬಗೆಹರಿಸಿದ ಸಮಸ್ಯೆ ಕುರಿತು ಚರ್ಚೆಯಾಗುತ್ತದೆ. ಈ ವೇಳೆ ಮಹಿಳೆಯ ಕತೆಯು ಸಹ ಪ್ರಸ್ತಾಪವಾಗಿದೆ. ಅಂದಹಾಗೆ ಘಟನೆ ಕೇಂದ್ರ ಚೀನಾದ ಮೆಟ್ರೋಪೊಲಿಸ್ ಛಾಂಗ್ಸಾದಲ್ಲಿನ ಕಮರ್ಸಿಯಲ್ ಸ್ಟ್ರೀಟ್ನಲ್ಲಿ ನಡೆದಿರುವುದಾಗಿ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದ ಅಧಿಕಾರಿಗಳು ತಿಳಿಸಿದ್ದಾರೆ.
ಸೆ. 21ರ ನಸುಕಿನ ಜಾವ ಎಲಿವೇಟರ್ ಬಳಿ ಸಂಭ್ರಮಿಸುತ್ತಿದ್ದ ಗುಂಪಿನ ಕೆಲವರು ಜಗಳದಲ್ಲಿ ಗಾಯಗೊಂಡು ಪೊಲೀಸ್ ಠಾಣೆಗೆ ದೂರು ನೀಡುತ್ತಾರೆ. ಎಲಿವೇಟರ್ ಹೊರಗೆ ಕಾಯುತ್ತಿರುವಾಗ ಲಿಫ್ಟ್ನಿಂದ ಜೋಡಿಯೊಂದು ಹೊರಬರುವುದನ್ನು ನೋಡಿದ ಗುಂಪಿನ ಸದಸ್ಯನೊಬ್ಬ ಏನೋ ಹೇಳುತ್ತಾನೆ. ಆತ ಹೇಳಿದ ಮಾತನ್ನು ತಪ್ಪಾಗಿ ಅರ್ಥ ಮಾಡಿಕೊಳ್ಳುವ ವ್ಯಕ್ತಿಯೊಬ್ಬ ಹಲ್ಲೆ ಮಾಡಲು ಮುಂದಾಗುತ್ತಾನೆ. ಬಳಿಕ ದೊಡ್ಡ ಗಲಾಟೆಯೇ ನಡೆಯುತ್ತದೆ ಎಂದು ಗಾಯಗೊಂಡ ಗುಂಪಿನ ಸದಸ್ಯರು ಆರೋಪಿಸಿದ್ದಾರೆ.
ಇದನ್ನೂ ಓದಿ: ಆನ್ಲೈನ್ನಲ್ಲಿ ಬಟ್ಟೆ ತರಿಸುವವರೇ ಎಚ್ಚರ! ನೀವು ಹೀಗೂ ಮೋಸ ಹೋಗಬಹುದು
ಹಲ್ಲೆ ಮಾಡಿದ ವ್ಯಕ್ತಿಯನ್ನು ಬಂಧಿಸಲು ಪೊಲೀಸರು ವಿಫಲವಾದಾಗ, ಆತನ ಪತ್ನಿಯನ್ನು ಪೊಲೀಸ್ ಠಾಣೆಗೆ ಕರೆಸುತ್ತಾರೆ. ಬಳಿಕ ಪೊಲೀಸರು ಮಹಿಳೆಯ ಜತೆಗೂಡಿ ಸಿಸಿಟಿವಿ ದೃಶ್ಯಾವಳಿಯನ್ನು ವೀಕ್ಷಿಸುತ್ತಾರೆ. ಆರಂಭದಲ್ಲಿ ಪತಿಗೆ ಯಾರೋ ಥಳಿಸುತ್ತಿದ್ದಾರೆ ಅಂದುಕೊಂಡ ಮಹಿಳೆಗೆ ನಂತರದಲ್ಲಿ ಪತಿಯು ಮತ್ತೊಂದು ಮಹಿಳೆಯೊಂದಿಗೆ ಮುದ್ದಾಡುವುದನ್ನು ನೋಡಿ ಶಾಕ್ ಆಗುತ್ತಾಳೆ.
ಪತಿ ಅಕ್ರಮ ಸಂಬಂಧದ ಬಗ್ಗೆ ಮೊದಲೇ ತಿಳಿದಿತ್ತಾ ಎಂದು ಪೊಲೀಸರು ಪ್ರಶ್ನಿಸಿದಾಗ ಗೊತ್ತಿರಲಿಲ್ಲ ಎಂದು ತಲೆಯಾಡಿಸುವ ಮಹಿಳೆ ವಿಡಿಯೋ ಶಾಕ್ಗೆ ಮಾತೇ ಬರುವುದಿಲ್ಲ. ಆದರೆ, ಕೆಲವೊಮ್ಮೆ ರಾತ್ರಿ ಹೋಗುತ್ತಿದ್ದ ಪತಿ ಬೆಳಗ್ಗೆ ಬರುತ್ತಿದ್ದರು ಎಂದು ಮಹಿಳೆ ಹೇಳಿಕೊಂಡಿದ್ದಾಳೆ.
ಇದೀಗ ಮಹಿಳೆಯ ನೋವಿನ ಕತೆ ಕೇಳಿರುವ ಅನೇಕ ನೆಟ್ಟಿಗರು ನೀವು ಡಿವೋರ್ಸ್ ಪಡೆದುಕೊಳ್ಳುವುದೇ ಉತ್ತಮ ಎಂದು ಸಲಹೆ ನೀಡುತ್ತಿದ್ದಾರೆ. (ಏಜೆನ್ಸೀಸ್)
(ವಿಡಿಯೋ ಕೃಪೆ: ಡೈಲಿ ಮೇಲ್)