ಫಿನ್ಲೆಂಡ್: ‘ಯಥಾ ರಾಜಾ, ತಥಾ ಪ್ರಜಾ’ ಎಂಬುದನ್ನು ಕೇಳಿರುತ್ತೀರಿ. ಇದೊಂಥರ ‘ಯಥಾ ಚಿತ್ತ, ತಥಾ ಚಿತ್ರ’ ಎಂಬಂಥದ್ದು. ಏಕೆಂದರೆ ನೀವೇನು ಯೋಚಿಸುತ್ತೀರೋ ಅದು ಕಂಪ್ಯೂಟರ್ ಪರದೆಯಲ್ಲಿ ಮೂಡಲಿದೆ.
ಇಂಥದ್ದೊಂದು ಟೆಕ್ನಾಲಜಿಯನ್ನು ಯುನಿವರ್ಸಿಟಿ ಆಫ್ ಹೆಲ್ಸಿಂಕಿಯ ಸಂಶೋಧಕರು ಕಂಡು ಹಿಡಿದಿದ್ದಾರೆ. ಮನುಷ್ಯನ ಮೆದುಳಿನ ಸಂದೇಶಗಳನ್ನು ಗ್ರಹಿಸುವ ಕಂಪ್ಯೂಟರ್, ಆತನ ಯೋಚನೆಗೆ ತಾಳೆಯಾಗುವಂಥದ್ದೇ ಚಿತ್ರವನ್ನು ಬಿಡಿಸುತ್ತದೆ ಎಂಬ ವರದಿಯೊಂದು ಸೈಂಟಿಫಿಕ್ ರಿಪೋರ್ಟ್ಸ್ ಜರ್ನಲ್ನಲ್ಲಿ ಪ್ರಕಟವಾಗಿದೆ.
ಸಂಶೋಧಕರು ಈ ಟೆಕ್ನಾಲಜಿಗೆ ನ್ಯೂರೋ ಅಡಾಪ್ಟಿವ್ ಜನರೇಟಿವ್ ಮಾಡೆಲಿಂಗ್ ಎಂದು ಕರೆದಿದ್ದಾರೆ. ಈ ಸಂಶೋಧನೆಗಾಗಿ ಅವರು 31 ಜನರನ್ನು ಬಳಸಿಕೊಂಡು ಅಧ್ಯಯನ ನಡೆಸಿದ್ದಾರೆ. ಅವರಿಗೆ ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ ಮೂಲಕ ಜನರೇಟ್ ಮಾಡಿದ ವಿವಿಧ ಮುಖಭಾವದ ಫೋಟೋಗಳನ್ನು ತೋರಿಸಿ, ಅದಕ್ಕೆ ಅವರ ಪ್ರತಿಕ್ರಿಯೆಯನ್ನು ಇಇಜಿ ಮೂಲಕ ದಾಖಲಿಸಿಕೊಳ್ಳಲಾಗಿದೆ. ನಂತರ ಅವರಿಗೆ ಕೆಲವರನ್ನು, ಉದಾಹರಣೆಗೆ ವಯಸ್ಸಾದ ಅಥವಾ ನಗುತ್ತಿರುವವರ ಮುಖ ನೆನಪಿಸಿಕೊಳ್ಳುವಂತೆ ಹೇಳಲಾಗಿದೆ. ಅದನ್ನೂ ಇಇಜಿ ಮೂಲಕ ದಾಖಲಿಸಿಕೊಳ್ಳಲಾಗಿದೆ. ಅವೆರಡನ್ನೂ ತಾಳೆ ಹಾಕಿ ಬಂದ ದತ್ತಾಂಶಗಳಿಂದ ಈ ಟೆಕ್ನಾಲಜಿ ರೂಪಿಸಲಾಗಿದೆ. ಈ ಟೆಕ್ನಾಲಜಿ ಬಳಸಿ ವ್ಯಕ್ತಿಯೊಬ್ಬ ಏನು ಯೋಚಿಸುತ್ತಾನೋ ಅದನ್ನು ಪರದೆ ಮೇಲೆ ಚಿತ್ರದ ರೂಪದಲ್ಲಿ ಮೂಡಿಸಲು ಸಾಧ್ಯವಿದ್ದು, ಅದು ಶೇ. 83 ನಿಖರತೆ ಹೊಂದಿದೆ ಎಂದು ಸಂಶೋಧಕರು ಹೇಳಿಕೊಂಡಿದ್ದಾರೆ. (ಏಜೆನ್ಸೀಸ್)