ವೆಲ್ಲಿಂಗ್ಟನ್: ನ್ಯೂಜಿಲೆಂಡ್ನ ನ್ಯೂವರ್ಲ್ಡ್ ಸೂಪರ್ಮಾರ್ಕೆಟ್ನಲ್ಲಿ ಮಾರಾಟಕ್ಕೆ ಇಡಲಾಗಿದ್ದ ಬೃಹತ್ ಗಾತ್ರದ ಕಲ್ಲಂಗಡಿ ಹಣ್ಣಿನ ಬೆಲೆಯನ್ನು ನೋಡಿ ಗ್ರಾಹಕರು ಅಚ್ಚರಿಗೆ ಒಳಗಾದ ಪ್ರಸಂಗವೊಂದು ಜರುಗಿದ್ದು, ಬೆಲೆಯುಳ್ಳ ಕಲ್ಲಂಗಡಿ ಹಣ್ಣಿನ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಒಂದು ಕಲ್ಲಂಗಡಿ ಹಣ್ಣಿನ ಬೆಲೆ 46 ಡಾಲರ್ ಆಗಿದ್ದು, ಭಾರತೀಯ ಕರೆನ್ಸಿ ಪ್ರಕಾರ ಬರೋಬ್ಬರಿ 3,259 ರೂ. ಆಗಿದೆ. ಆದರೂ ಅನೇಕ ನೆಟ್ಟಿಗರು ನಂಬಲು ತಯಾರಾಗಿಲ್ಲ. ಬೆಲೆಯ ಸ್ಟಿಕ್ಕರ್ನಲ್ಲಿ ಮಾನವನ ದೋಷವಿರಬಹುದನ್ನು ಊಹಿಸಬಹುದಾಗಿದೆ ಎಂದು ನೆಟ್ಟಿಗನೊಬ್ಬ ವೈರಲ್ ಆಗಿರುವ ಫೋಟೋ ಕುರಿತು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ನಿಜವಾಗಿಯೂ, ಇದು ತುಂಬಾ ಹಾಸ್ಯಸ್ಪದವಾಗಿದೆ. ಕಲ್ಲಂಗಡಿಯನ್ನು ಇಲ್ಲಿ ಬೆಳೆಯುವುದಿಲ್ಲವೇ? ಅವಕಾಡೋ ಬೆಲೆಗಿಂತಲೂ ಕಲ್ಲಂಗಡಿ ಬೆಲೆ ತೀರ ಕೆಟ್ಟದಾಗಿದೆ ಎಂದು ಮತ್ತೊಬ್ಬ ನೆಟ್ಟಿಗ ಬರೆದುಕೊಂಡಿದ್ದಾರೆ.
ಸೂಪರ್ ಮಾರ್ಕೆಟ್ನಲ್ಲಿ ಕಲ್ಲಂಗಡಿ ಹಣ್ಣನ್ನು ಕೆ.ಜಿ.ಗೆ 3.99 ಡಾಲರ್(282.83 ರೂ.)ಗೆ ಮಾರಾಟ ಮಾಡಲಾಗುತ್ತಿದ್ದು, ಹಣ್ಣು ಬರೋಬ್ಬರಿ 11.7 ಕೆ.ಜಿ ಇದೆ. ಅನೇಕ ಹಣ್ಣುಗಳು 3 ರಿಂದ 5 ಕೆ.ಜಿ.ತೂಗುತ್ತದೆ. ಆದರೆ ಇದು ಬರೋಬ್ಬರಿ 11 ಕೆ.ಜಿ. ಇರುವುದು ಅಚ್ಚರಿಗೆ ಕಾರಣವಾಗಿದೆ.
ಬೆಲೆ ನೋಡಿದರೆ ಹಣ್ಣಿನ ಕಡಿಮೆ ಪೂರೈಕೆ ಪ್ರತಿಬಿಂಬಿಸುತ್ತದೆ ಎಂದು ಸೂಪರ್ಮಾರ್ಕೆಟ್ ವಕ್ತಾರ ಅಂಟೊಯಿನೆಟ್ ಲೈಯರ್ಡ್ ತಿಳಿಸಿದ್ದಾರೆ. ಒಣ ವಾತಾವರಣದಿಂದಾಗಿ ಕಲ್ಲಂಗಡಿ ಹಣ್ಣಿನ ಕೊರತೆ ಉಂಟಾಗಿದ್ದು, ಮುಂದಿನ ವಾರಗಳಲ್ಲಿ ಇದು ಇಳಿಕೆಯಾಗುವ ಸಾಧ್ಯತೆ ಇದೆ ಎಂದು ಹೇಳಿದ್ದಾರೆ. (ಏಜೆನ್ಸೀಸ್)