ಮುಂಬೈ: ಒಬ್ಬ ವ್ಯಕ್ತಿ ಮುಂಬೈ ಲೋಕಲ್ ಟ್ರೈನ್ನಲ್ಲಿ ಪ್ರಯಾಣಿಸುವಾಗ ಕಳೆದುಕೊಂಡಿದ್ದ ಪರ್ಸ್ 14 ವರ್ಷಗಳ ಬಳಿಕ ಸಿಕ್ಕಿದೆ. ಮುಂಬೈ ಪೊಲೀಸರು ಪ್ರಾಮಾಣಿಕವಾಗಿ ಆ ವ್ಯಕ್ತಿಗೆ ಕರೆ ಮಾಡಿ, ಈ ವಿಷಯ ತಿಳಿಸಿದಾಗ ಅವರಿಗೇ ಅಚ್ಚರಿಯಾಗಿದೆ. ಅದರಲ್ಲೂ ವಿಶೇಷವಾಗಿ ಇದೀಗ ರದ್ದಾಗಿರುವ 500 ರೂ. ನೋಟು ಇದೆ ಎಂದಾಗ ಅವರ ಅಚ್ಚರಿ ನೂರ್ಮಡಿಗೊಂಡಿದೆ.
ಹೇಮಂತ್ ಪದಾಲ್ಕರ್ ಆ ಪರ್ಸ್ ಕಳೆದುಕೊಂಡಿದ್ದವರು. 2006ರಲ್ಲಿ ಅವರು ಛತ್ರಪತಿ ಶಿವಾಜಿ ಮಹಾರಾಜ್ ಟರ್ಮಿನಸ್ನಿಂದ ಪನ್ವೇಲ್ಗೆ ಲೋಕಲ್ ಟ್ರೈನ್ನಲ್ಲಿ ಹೋಗುತ್ತಿದ್ದಾಗ ಈ ಪರ್ಸ್ ಅನ್ನು ಕಳೆದುಕೊಂಡಿದ್ದರು ಎಂದು ಸರ್ಕಾರಿ ರೈಲ್ವೆ ಪೊಲೀಸ್ (ಜಿಆರ್ಪಿ) ಅಧಿಕಾರಿಗಳು ತಿಳಿಸಿದ್ದಾರೆ.
ಈ ವರ್ಷದ ಏಪ್ರಿಲ್ನಲ್ಲಿ ವಾಷಿಯ ಜಿಆರ್ಪಿ ಸಿಬ್ಬಂದಿ ಅವರಿಗೆ ಕರೆ ಮಾಡಿ ಪರ್ಸ್ ಸಿಕ್ಕಿರುವ ಬಗ್ಗೆ ಮಾಹಿತಿ ಕೊಟ್ಟಿದ್ದರು. ಆಗ ಕೋವಿಡ್-19 ಲಾಕ್ಡೌನ್ ಇದ್ದುದರಿಂದ ಅವರಿಗೆ ಹೋಗಿ ಆ ಪರ್ಸ್ ಅನ್ನು ತೆಗೆದುಕೊಳ್ಳಲು ಸಾಧ್ಯವಾಗಿರಲಿಲ್ಲ.
ಇದನ್ನೂ ಓದಿ: ತುಂಗಭದ್ರಾ ಜಲಾಶಯ ಭರ್ತಿಗೆ ಹನ್ನೊಂದೇ ಅಡಿ ಬಾಕಿ: ಒಂದೇ ದಿನ 8.5 ಟಿಎಂಸಿ ಅಡಿ ಒಳಹರಿವು
ಲಾಕ್ಡೌನ್ ನಿಯಮ ಸಡಿಲಗೊಂಡು, ಸಾರ್ವಜನಿಕರ ಸಂಚಾರಕ್ಕೆ ಅವಕಾಶವಾದ ನಂತರದಲ್ಲಿ ಪನ್ವೇಲ್ ನಿವಾಸಿಯಾದ ಪದಾಲ್ಕರ್ ಅವರು ಇತ್ತೀಚೆಗೆ ಜಿಆರ್ಪಿ ಕಚೇರಿಗೆ ಹೋಗಿ ಪರ್ಸ್ ಅನ್ನು ಪಡೆದುಕೊಂಡಿದ್ದಾರೆ.
ಪರ್ಸ್ ಕಳೆದುಕೊಂಡ ಸಂದಭದಲ್ಲಿ 2016ರಲ್ಲಿ ಚಲಾವಣೆ ರದ್ದುಗೊಂಡ 500 ರೂ. ಸೇರಿ ಒಟ್ಟು 900 ರೂ. ಇತ್ತು. ಇದೀಗ ವಾಷಿ ಜಿಆರ್ಪಿ ಅವರು ನನಗೆ 300 ರೂ. ಮರಳಿಸಿದ್ದಾರೆ. 100 ರೂ.ಗಳನ್ನು ಸ್ಟ್ಯಾಂಪ್ ಪೇಪರ್ಗಾಗಿ ತೆಗೆದುಕೊಂಡರು. ಚಲಾವಣೆ ರದ್ದುಗೊಂಡಿರುವ 500 ರೂ.ಗಳನ್ನು ಬದಲಿಸಿದ ಬಳಿಕ 500 ರೂ. ಮರಳಿಸುವುದಾಗಿ ಹೇಳಿದ್ದಾರೆ ಎಂದು ಹೇಳಿದ್ದಾರೆ.
ತಮ್ಮ ಪರ್ಸ್ ಕದ್ದಿದ್ದ ವ್ಯಕ್ತಿಯನ್ನು ಕೆಲದಿನಗಳ ಹಿಂದೆ ಬಂಧಿಸುದುದಾಗಿ ಜಿಆರ್ಪಿ ಅಧಿಕಾರಿಗಳು ತಿಳಿಸಿದ್ದಾರೆ. ಆತನ ಬಳಿಯಿಂದ ನನ್ನ ಪರ್ಸ್ ಅನ್ನು ವಶಕ್ಕೆ ಪಡೆದು ನೋಡಿದಾಗ ಅದರಲ್ಲಿ 900 ರೂ.ಗಳು ಹಾಗೆಯೇ ಇತ್ತು ಎಂದು ಹೇಳಿದ್ದಾಗಿ ತಿಳಿಸಿದ್ದಾರೆ.