ನವದೆಹಲಿ: ಒಲಿಂಪಿಕ್ಸ್ ಅರ್ಹತಾ ಕೂಟಕ್ಕೆ ತನ್ನೊಂದಿಗೆ ತೆರಳಬೇಕಿರುವ ತರಬೇತಿ ಸಿಬ್ಬಂದಿಗೆ ಲಾಜಿಸ್ಟಿಕ್ಸ್ ಸಮಸ್ಯೆ ಸೃಷ್ಟಿಸುವ ಮೂಲಕ ಭಾರತೀಯ ಕುಸ್ತಿ ಒಕ್ಕೂಟ (ಡಬ್ಲ್ಯುಎಫ್ಐ) ತನ್ನ ಸ್ಪರ್ಧೆಯನ್ನು ತಡೆಯಲು ಸಂಚು ರೂಪಿಸಿದೆ ಎಂದು ಮಹಿಳಾ ಕುಸ್ತಿಪಟು ವಿನೇಶ್ ಪೋಗಟ್ ಆರೋಪಿಸಿದ್ದಾರೆ. ಆದರೆ ಈ ಆರೋಪವನ್ನು ತಳ್ಳಿಹಾಕಿರುವ ಡಬ್ಲ್ಯುಎಫ್ಐ, ಪ್ರವೇಶಪತ್ರಗಳನ್ನು ಕಳುಹಿಸುವ ಗಡುವು ಮುಗಿದ ಬಳಿಕ ವಿನೇಶ್ ಮನವಿ ಸಲ್ಲಿಸಿರುವುದೇ ಈ ಸಮಸ್ಯೆಗಳಿಗೆ ಕಾರಣ ಎಂದು ಸ್ಪಷ್ಟನೆ ನೀಡಿದೆ. ಈ ನಡುವೆ, ತನ್ನನ್ನು ಉದ್ದೀಪನ ಪ್ರಕರಣದಲ್ಲಿ ಸಿಲುಕಿಸುವ ಭೀತಿಯೂ ಇದೆ ಎಂದು 29 ವರ್ಷದ ವಿನೇಶ್ ಹೇಳಿಕೊಂಡಿದ್ದಾರೆ.
ಮುಂದಿನ ವಾರ ಕಿರ್ಗಿಸ್ತಾನ್ನಲ್ಲಿ ನಡೆಯಲಿರುವ ಏಷ್ಯನ್ ಅರ್ಹತಾ ಕೂಟದಲ್ಲಿ ವಿನೇಶ್ ಮಹಿಳೆಯರ 50 ಕೆಜಿ ವಿಭಾಗದಲ್ಲಿ ಪ್ಯಾರಿಸ್ ಒಲಿಂಪಿಕ್ಸ್ ಕೋಟಾ ಸ್ಥಾನ ಜಯಿಸಲು ಹೋರಾಡಲಿದ್ದಾರೆ. ಈ ಸಂಬಂಧ ವಿನೇಶ್ ಪೋಗಟ್ ತನ್ನ ಕೋಚ್ ಮತ್ತು ಫಿಸಿಯೋಗೂ ಪ್ರವೇಶ ಪತ್ರ ನೀಡುವಂತೆ ಮಾರ್ಚ್ 18ರಂದು ಮನವಿ ಸಲ್ಲಿಸಿದ್ದರು. ಆದರೆ ಈ ಸಂಬಂಧ ಪ್ರವೇಶ ಪತ್ರಗಳನ್ನು ಕಳುಹಿಸುವ ಗಡುವು ಮಾರ್ಚ್ 11ರಂದೇ ಮುಕ್ತಾಯಗೊಂಡಿತ್ತು. ಹೀಗಾಗಿ ವಿನೇಶ್ ಮನವಿ ಪುರಸ್ಕರಿಸಲಾಗಿಲ್ಲ ಎಂದು ಡಬ್ಲ್ಯುಎಫ್ಐ ತಿಳಿಸಿದೆ.
ಬ್ರಿಜ್ಭೂಷಣ್ ಮತ್ತು ಅವರ ಬಣದ ಡಮ್ಮಿ ಅಧ್ಯಕ್ಷ ಸಂಜಯ್ ಸಿಂಗ್ ನಾನು ಒಲಿಂಪಿಕ್ಸ್ನಲ್ಲಿ ಸ್ಪರ್ಧಿಸುವುದನ್ನು ತಡೆಯಲು ಎಲ್ಲ ರೀತಿಯ ಪ್ರಯತ್ನಗಳನ್ನು ನಡೆಸುತ್ತಿದ್ದಾರೆ. ಭಾರತ ತಂಡದ ಎಲ್ಲ ಕೋಚ್ಗಳು ಬ್ರಿಜ್ಭೂಷಣ್ ಆಪ್ತರು. ಹೀಗಾಗಿ ಅವರು ನೀರಿನಲ್ಲಿ ಏನಾದರು ಬೆರೆಸಿ ನಾನು ಉದ್ದೀಪನ ಪರೀಕ್ಷೆಯಲ್ಲಿ ಫೇಲಾಗುವಂತೆ ಮಾಡಿದರೂ ಅಚ್ಚರಿ ಇಲ್ಲ ಎಂದು ವಿನೇಶ್ ಪೋಗಟ್ ಸಾಮಾಜಿಕ ಜಾಲತಾಣದಲ್ಲಿ ಆರೋಪಿಸಿದ್ದಾರೆ.
IPL 2024: ವೇಗದ ಎಸೆತಗಳಿಂದ ಬ್ಯಾಟರ್ಗಳನ್ನು ಕಂಗೆಡಿಸಿದ ಮಯಾಂಕ್ ಯಾದವ್ಗೆ ಈಗ ಕಾಡುತ್ತಿದೆ ಗಾಯ!