ಮುಂಬೈ : ಬಾಲಿವುಡ್ನ ಹಿರಿಯ ನಟಿ ಶಶಿಕಲಾ ಅವರು ಇಂದು ತಮ್ಮ ಕೊಲಾಬಾದ ನಿವಾಸದಲ್ಲಿ ಕೊನೆಯುಸಿರೆಳೆದರು. ನೂರಕ್ಕೂ ಹೆಚ್ಚು ಬಾಲಿವುಡ್ ಚಿತ್ರಗಳಲ್ಲಿ ನಟಿಸಿದ್ದ ಶಶಿಕಲಾ, 88 ವರ್ಷ ವಯಸ್ಸಿನವರಾಗಿದ್ದರು. ಕಪ್ಪು ಬಿಳುಪು ಚಿತ್ರಗಳಲ್ಲಿ ಮತ್ತು ಈಸ್ಟ್ಮನ್ ಕಲರ್ ಚಿತ್ರಗಳಲ್ಲಿ ನಟಿಸಿದ್ದಲ್ಲದೆ, ಇತ್ತೀಚಿನ ಹೈಟೆಕ್ ಚಿತ್ರಗಳಲ್ಲೂ ಕೆಲಸ ಮಾಡಿದ ಹೆಗ್ಗಳಿಕೆ ಅವರದ್ದಾಗಿತ್ತು.
ಆಗಸ್ಟ್ 1932 ರಲ್ಲಿ ಮಹಾರಾಷ್ಟ್ರದ ಸೋಲಾಪುರಕ್ಕೆ ಸೇರಿದ ಕುಟುಂಬದಲ್ಲಿ ಜನಿಸಿದ ಶಶಿಕಲಾ, 2007ನೇ ವರ್ಷದ ಪ್ರತಿಷ್ಠಿತ ಪದ್ಮಶ್ರೀ ಪುರಸ್ಕಾರ ಪಡೆದಿದ್ದರು. 2009 ರಲ್ಲಿ ವಿ.ಶಾಂತಾರಾಂ ಅವಾರ್ಡ್ಸ್ನ ಜೀವಮಾನ ಸಾಧನೆ ಪ್ರಶಸ್ತಿಯನ್ನು ಪಡೆದಿದ್ದರು. ಬಾಲಿವುಡ್ ನಟ ದಿವಂಗತ ಓಮ್ಪ್ರಕಾಶ್ ಸೇಗಲ್ ಅವರ ಪತ್ನಿಯಾಗಿದ್ದರು.
ಇದನ್ನೂ ಓದಿ: ಬೀದಿಯಲ್ಲಿ ಮಸ್ತ್ ಡ್ಯಾನ್ಸ್ ಮಾಡಿದ ನಟಿ ಸುಹಾಸಿನಿ ಹಾಗೂ ಅಕ್ಷರಾ ಹಾಸನ್
ತೀನ್ ಬಟ್ಟಿ ಚಾರ್ (1953), ರಾಸ್ತಾ, ತೀನ್ ಬಹುರಾಣಿಯಾ (1968), ಡಾಕು, ಗುಮರಾಹ್, ಸುಜಾತ, ಮುಂತಾದ ಹಿಂದಿ ಚಿತ್ರಗಳಲ್ಲಿ ಅವರ ನಟನೆ ಮೆಚ್ಚುಗೆ ಪಡೆದಿತ್ತು. ಟಿವಿ ಧಾರಾವಾಹಿಗಳಲ್ಲೂ ನಟಿಸಿದ್ದ ಅವರು, ಸೋನ್‌ಪರಿ ಮತ್ತು ಜೀನಾ ಇಸಿ ಕಾ ನಾಮ್ ಹೈ ಜನಪ್ರಿಯ ಕಾರ್ಯಕ್ರಮಗಳ ಭಾಗವಾಗಿದ್ದರು. ಪೋಷಕ ನಟಿಯಾಗಿ ಹಲವಾರು ಚಿತ್ರಗಳಲ್ಲಿ ನಟಿಸಿರುವ ಶಶಿಕಲಾ ಅವರ ಇತ್ತೀಚಿನ ಚಿತ್ರಗಳು ಕಭಿ ಖುಷಿ ಕಭಿ ಘಮ್ ಮತ್ತು ಮುಝ್ಸೆ ಶಾದಿ ಕರೋಗಿ. (ಏಜೆನ್ಸೀಸ್)
ವಿರುಷ್ಕಾ ದಂಪತಿಗಳ ಪ್ರಾಣಿಪ್ರೇಮ : ಮುಂಬೈನಲ್ಲಿ ಬೀದಿ ಪ್ರಾಣಿಗಳಿಗೆ ಆಶ್ರಯ ಕೇಂದ್ರಗಳು