ನ್ಯೂಯಾರ್ಕ್: ಇರಾನ್ನಲ್ಲಿ ನಡೆದ ಉಕ್ರೇನಿಯನ್ ವಿಮಾನ ಪತನದ ಬಗ್ಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅನುಮಾನ ವ್ಯಕ್ತಪಡಿಸಿದ ಬೆನ್ನಲ್ಲೇ ಪತನ ಕುರಿತದಾ ತನಿಖೆಗೆ ಕೈಜೋಡಿಸುವುದಾಗಿ ಯುಎಸ್ನ ರಾಷ್ಟ್ರೀಯ ಸಾರಿಗೆ ಸುರಕ್ಷತಾ ಮಂಡಳಿ(ಎನ್ಟಿಎಸ್ಬಿ) ಗುರುವಾರ ತಿಳಿಸಿದೆ.
ಈ ಬಗ್ಗೆ ಎನ್ಟಿಎಸ್ಬಿ ಟ್ವಿಟರ್ ಖಾತೆಯಲ್ಲಿ ಬರೆದುಕೊಂಡಿದ್ದು, ಬುಧವಾರ ಘಟಿಸಿದ ವಿಮಾನ ದುರಂತಕ್ಕೆ ಸಂಬಂಧಿಸಿದಂತೆ ಇರಾನ್ನಿಂದ ಔಪಚಾರಿಕ ಅಧಿಸೂಚನೆಯನ್ನು ಸ್ವೀಕರಿಸಿದ್ದೇವೆ ಎಂದು ಹೇಳಿದೆ.
ಪತನದ ಬಗ್ಗೆ ತನಿಖೆ ನಡೆಸಲು ಎನ್ಟಿಎಸ್ಬಿಯು ಅಂಗೀಕೃತ ಪ್ರಾತಿನಿಧಿಕವೊಂದನ್ನು ಗೊತ್ತುಪಡಿಸಲಿದೆ. ಅಲ್ಲದೆ, ಇರಾನ್ ನೇತೃತ್ವದಲ್ಲಿ ಪತನದ ಸುತ್ತಲಿನ ಪರಿಸ್ಥಿತಿಯ ಪರಿವೀಕ್ಷಣೆಯನ್ನು ಮುಂದುವರಿಸಲಿದೆ. ಇದರೊಂದಿಗೆ ತನಿಖೆಯಲ್ಲಿ ತನ್ನ ಭಾಗವಹಿಸುವಿಕೆ ಮಟ್ಟವನ್ನು ಎನ್ಟಿಎಸ್ಬಿ ಮೌಲ್ಯಮಾಪನ ಮಾಡಲಿದೆ ಎಂದು ತಿಳಿಸಿದೆ.
ಎನ್ಟಿಎಸ್ಬಿ ಒಳಗೊಂಡ ಯಾವುದೇ ತನಿಖೆಯಲ್ಲಿ ಪತನದ ಕಾರಣಗಳ ಬಗ್ಗೆ ಯಾವುದೇ ಊಹಾಪೋಹಕ್ಕೆ ಎಡೆಮಾಡಿಕೊಡುವುದಿಲ್ಲ. ನಿಖರ ತನಿಖೆಯಷ್ಟನ್ನೇ ಪರಿಗಣಿಸಲಾಗುವುದು ಎಂದು ಸ್ಪಷ್ಟನೆ ನೀಡಿದೆ.
ಬೋಯಿಂಗ್ 737 ಹೆಸರಿನ ಉಕ್ರೇನಿಯನ್ ವಿಮಾನ ಬುಧವಾರ ಬೆಳಗ್ಗೆ ಇರಾನ್ನ ತೆಹ್ರಾನ್ ಇಮಾಮ್ ಖೊಮೆನಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ಬಿಟ್ಟು ಉಕ್ರೇನ್ನ ಕೈವ್‌ ಬೋರಿಸ್‌ಪಿಲ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಹೊರಟಿತ್ತು. ಆದರೆ ವಿಮಾನದಲ್ಲಿ ಕಾಣಿಸಿಕೊಂಡ ತಾಂತ್ರಿಕ ದೋಷದಿಂದ ಟೇಕಾಫ್ ಆದ ಕೆಲವೇ ಕ್ಷಣಗಳಲ್ಲಿ ಏರ್ಪೋರ್ಟ್ ಬಳಿ ಪತನಗೊಂಡಿದೆ. ಸ್ಫೋಟಗೊಂಡ ಪರಿಣಾಮ ವಿಮಾನದಲ್ಲಿದ್ದವರೆಲ್ಲಾ ಮೃತರಾಗಿರುವುದಾಗಿ ಉಕ್ರೇನ್ ವಿದೇಶಾಂಗ ಸಚಿವಾಲಯದ ಅಧಿಕಾರಿ ಕೀವ್ ತಿಳಿಸಿದ್ದರು. ಇರಾನ್ ಕೂಡ ಇದನ್ನೇ ವಾದಿಸಿತ್ತು. ಆದರೆ, ವಿಮಾನ ಪತನದ ಬಳಿ ಕ್ಷಿಪಣಿ ಅವಶೇಷ ದೊರೆತಿರುವುದು ಅನುಮಾನವನ್ನು ಹುಟ್ಟುಹಾಕಿದೆ. (ಏಜೆನ್ಸೀಸ್)