ದೋಹಾ(ಕತಾರ್): ಅಫ್ಘಾನಿಸ್ತಾನದ ತಾಲಿಬಾನ್ ಸಂಘಟನೆಯೊಂದಿಗೆ ಐತಿಹಾಸಿಕ ಶಾಂತಿ ಒಪ್ಪಂದಕ್ಕೆ ಅಮೆರಿಕ ಸಹಿ ಹಾಕುವ ಮೂಲಕ 18 ವರ್ಷಗಳ ದೀರ್ಘಕಾಲದ ರಕ್ತಸಿಕ್ತ ಯುದ್ಧ ಸನ್ನಿವೇಶಕ್ಕೆ ಇಂದು ತೆರೆ ಎಳೆದಿದೆ. ಒಪ್ಪಂದದ ಅನ್ವಯ ಆಫ್ಘಾನ್ನಲ್ಲಿರುವ ತನ್ನ ಸೇನಾ ಪಡೆಯನ್ನು ಅಮೆರಿಕ ಕಾಲಮಿತಿಯಲ್ಲಿ ವಾಪಸ್ ಕರೆಸಿಕೊಳ್ಳಲಿದೆ.
ಶನಿವಾರ ದೋಹಾದಲ್ಲಿ ನಡೆದ ಐತಿಹಾಸಿಕ ಸಭೆಯಲ್ಲಿ ಅಮೆರಿಕ, ತಾಲಿಬಾನ್ನೊಂದಿಗೆ ಶಾಂತಿ ಒಪ್ಪಂದಕ್ಕೆ ಸಹಿ ಹಾಕಿತು. ಮುಂದಿನ ನಾಲ್ಕರಿಂದ ಐದು ತಿಂಗಳಲ್ಲಿ ಒಟ್ಟು 13,000 ಸಾವಿರ ಸೈನಿಕರಲ್ಲಿ 8,600 ಸೈನಿಕರನ್ನು ಅಲ್ಲಿಯೇ ಉಳಿಸಿ, ಉಳಿದವರನ್ನು ತವರಿಗೆ ಕರೆಸಿಕೊಳ್ಳಲಿದೆ.
ಇನ್ನುಳಿದವರನ್ನು ಮುಂದಿನ 14 ತಿಂಗಳಲ್ಲಿ ಕರೆಯಿಸಿಕೊಳ್ಳಲಿದೆ. ಆದರೆ ಅದು, ತಾಲಿಬಾನ್ನೊಂದಿಗೆ ನಡೆಯುವ ಮತ್ತೊಂದು ಸಭೆಯ ಮೇಲೆ ನಿರ್ಧಾರವಾಗಿರಲಿದೆ. ಭಯೋತ್ಪದನಾ ನಿಗ್ರಹ ಪರಿಸ್ಥಿತಿಗಳು ಹಾಗೂ ತಾಲಿಬಾನ್ ಅನುಸರಣೆಯನ್ನು ನಿರ್ಣಯಿಸಿದ ಬಳಿಕ ಇನ್ನುಳಿದ ಯೋಧರನ್ನು ಅಮೆರಿಕ ವಾಪಸ್ ಕರೆಸಿಕೊಳ್ಳಲು ನಿರ್ಧರಿಸಿದೆ.
ಈ ಒಂದು ಒಪ್ಪಂದದಿಂದ ತಾಲಿಬಾನ್ ಮತ್ತು ಆಫ್ಘಾನ್ ಸರ್ಕಾರದ ನಡುವೆ ಮಾತುಕತೆ ನಡೆಯುವ ನಿರೀಕ್ಷೆಗಳಿದ್ದು, ಒಂದು ವೇಳೆ ಮಾತುಕತೆ ಯಶಸ್ವಿಯಾದರೆ 18 ವರ್ಷಗಳ ದೀರ್ಘಕಾಲಿಕ ಸಂಘರ್ಷಕ್ಕೆ ಅಂತಿಮ ಮುದ್ರೆ ಬೀಳುವುದು ಖಚಿತವಾಗುತ್ತದೆ.
ತಾಲಿಬಾನ್ ಬಂಡಾಯಗಾರ ಮುಲ್ಲಾ ಬರಾದರ್ ಹಾಗೂ ಅಮೆರಿಕ ಮುಖ್ಯ ಸಂಧಾನಕಾರ ಜಲ್ಮೇ ಖಲೀಲ್ಜದ್ ಜತೆ ದೋಹಾದ ಲಕ್ಸುರಿ ಹೋಟೆಲ್ನಲ್ಲಿ ಶಾಂತಿ ಒಪ್ಪಂದ ನಡೆದಿದೆ. ಉಭಯ ನಾಯಕರು ಸಭೆಯಲ್ಲಿ ಒಟ್ಟಿಗೆ ಕೈಕುಲಕಿ ಸ್ನೇಹ ಸಂದೇಶ ಸಾರಿದರು. ಈ ವೇಳೆ ಸಭೆಯಲ್ಲಿ ನೆರೆರದಿದ್ದ ಜನರು ದೇವರೇ ಶ್ರೇಷ್ಠವೆಂದು ಹರ್ಷೋದ್ಘಾರ ಕೂಗಿದರು.
ಇನ್ನು ಒಪ್ಪಂದದ ಬಗ್ಗೆ ಮಾತನಾಡಿರುವ ಅಮೆರಿಕ ರಾಜ್ಯ ಕಾರ್ಯದರ್ಶಿ ಮೈಕ್ ಪೊಂಪಿಯೊ ಅಲ್ ಖೈದಾ ಜತೆಗಿನ ಒಪ್ಪಂದಗಳನ್ನು ಕಡಿದುಕೊಂಡು ನಿಮ್ಮ ಭರವಸೆಗಳನ್ನು ಉಳಿಸಿಕೊಳ್ಳಿ ಎಂದು ತಾಲಿಬಾನ್ಗೆ ಒತ್ತಾಯಿಸಿದರು. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕೂಡ ಹೊಸ ಭವಿಷ್ಯದ ಅವಕಾಶವನ್ನು ಆಫ್ಘಾನ್ ಜನ ಸ್ವೀಕರಿಸಲಿ ಎಂದು ಸಂದೇಶ ರವಾನಿಸಿದ್ದಾರೆ.
2001, ಸೆಪ್ಟೆಂಬರ್ 11ರಂದು ಅಮೆರಿಕದಲ್ಲಿ ನಡೆದ ಉಗ್ರ ದಾಳಿಯ ಬಳಿಕ ತಾಲಿಬಾನ್ ಮತ್ತು ಅಮೆರಿಕ ನಡುವೆ ಸಂಘರ್ಷ ಉಂಟಾಗಿತ್ತು. ಅಂದಿನಿಂದ ತಾಲಿಬಾನ್ ಉಗ್ರ ನಿಗ್ರಹ ಹಾಗೂ ಆಫ್ಘಾನಿಸ್ತಾನದ ಮರುನಿರ್ಮಾಣಕ್ಕೆ ಅಮೆರಿಕ 1 ಟ್ರಿಲಿಯನ್ ಡಾಲರ್ಗೂ ಹೆಚ್ಚು ವ್ಯಯಿಸಿದೆ. ಈವೆರೆಗೂ ಸುಮಾರು 2400 ಅಮೆರಿಕ ಯೋಧರು ಹತ್ಯೆಯಾಗಿದ್ದಾರೆ. (ಏಜೆನ್ಸೀಸ್)