ನವದೆಹಲಿ: ಎಲಾನ್ ಮಸ್ಕ್ ಟ್ವಿಟರ್ ಖರೀದಿ ಮಾಡಿದ್ದೇ ಮಾಡಿದ್ದು, ದಿನವೂ ಹೊಸ ಸುದ್ದಿ ಮಾಡುತ್ತಿದ್ದಾರೆ. ಒಮ್ಮೆ ಬ್ಲೂ ಟಿಕ್ಗೆ ಹಣ ಪಡೆಯುವುದು, ಇನ್ನೊಮ್ಮೆ ಸಿಇಒ ವಜಾ ಹೀಗೆ ನಿರಂತರವಾಗಿ ಟ್ವಿಟರ್ ಸುದ್ದಿಯಲ್ಲಿದೆ.
ಈಗ ಭಾರತದಲ್ಲಿರುವ ಶೇಕಡ 90ರಷ್ಟು ಉದ್ಯೋಗಿಗಳನ್ನು ಮಸ್ಕ್ ವಜಾ ಮಾಡುತ್ತಿದ್ದಾರೆ. ಇಡಿ ತಂಡಗಳನ್ನೇ ಕಿತ್ತು ಹಾಕುತ್ತಿರುವ ಕಾರಣ ಟ್ವಿಟರ್ ಯಾವ ಕಡೆ ಸಾಗುತ್ತಿದೆ ಎನ್ನುವುದು ಸ್ಪಷ್ಟವಿಲ್ಲ. ಆದರೆ ಎಲಾನ್ ಮಸ್ಕ್ ತಾನು ಹೂಡಿದ ಹಣವನ್ನು ಕಾಪಾಡಿಕೊಳ್ಳುವುದಕ್ಕೆ ಇಷ್ಟೆಲ್ಲಾ ಮಾಡುತ್ತಿರುವುದು ಎಂಬುದು ಸ್ಪಷ್ಟ.
ಈಗ ವಜಾಗೊಂಡಿರುವ ಬಹುತೇಕ ಉದ್ಯೋಗಿಗಳು ಮಾರ್ಕೆಟಿಂಗ್, ಪ್ರಾಡಕ್ಟ್ ಟೀಮ್ ಮತ್ತು ಸಂವಹನ ವಿಭಾಗದವರು ಎಂದು ತಿಳಿದುಬಂದಿದೆ. 200ಕ್ಕೂ ಹೆಚ್ಚು ಟ್ವಿಟರ್ ಉದ್ಯೋಗಿಗಳು ಭಾರತದಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು. ಆದರೆ ಈಗ ಕೆಲವೇ ಕೆಲವರು ಕಂಪೆನಿಯಲ್ಲಿ ಉಳಿದುಕೊಂಡಿದ್ದಾರೆ. ಈಗಾಗಲೇ ಜಗತ್ತಿನಾದ್ಯಂತ ಶೇಕಡ 70ರಷ್ಟು ಉದ್ಯೋಗಿಗಳನ್ನು ಮಸ್ಕ್ ವಜಾಗೊಳಿಸಿದ್ದಾರೆ. (ಏಜೆನ್ಸೀಸ್)