ಭೋಪಾಲ್ : ಸಾಕಷ್ಟು ಲಸಿಕೆಗಳ ಪೂರೈಕೆಯಾಗಿಲ್ಲ ಎಂದು ಮಧ್ಯಪ್ರದೇಶ ಸರ್ಕಾರ ಇಂದು ಆರಂಭವಾಗಬೇಕಿದ್ದ 18 ವರ್ಷ ಮೇಲ್ಪಟ್ಟವರ ಕರೊನಾ ಲಸಿಕಾ ಅಭಿಯಾನವನ್ನು ಮುಂದೂಡಿದೆ. ಆದರೆ, ಸುಮಾರು ಎರಡೂವರೆ ಲಕ್ಷ ಡೋಸ್ ಕೋವಾಕ್ಸಿನ್ ಲಸಿಕೆಯನ್ನು ಸಾಗಿಸುತ್ತಿದ್ದ ಟ್ರಕ್ ಒಂದು ರಾಜ್ಯದ ಪಟ್ಟಣವೊಂದರಲ್ಲಿ ರಸ್ತೆ ಬದಿಯಲ್ಲಿ ಅನಾಥವಾಗಿ ಸಿಕ್ಕಿರುವುದು ವರದಿಯಾಗಿದೆ.
ಮಧ್ಯಪ್ರದೇಶದ ನರಸಿಂಗಪುರ ಜಿಲ್ಲೆಯ ಕರೇಲಿ ಬಸ್ ನಿಲ್ದಾಣದ ಬಳಿ ಬಹಳಷ್ಟು ಸಮಯದಿಂದ ರಸ್ತೆಯ ಬದಿಯಲ್ಲಿ ಯಾರೋ ಟ್ರಕ್ ಒಂದನ್ನು ಬಿಟ್ಟು ಹೋಗಿದ್ದಾರೆ. ಅದರ ಚಾಲಕ ಅಥವಾ ಕ್ಲೀನರ್ ಸ್ಥಳದಲ್ಲಿ ಎಲ್ಲೂ ಕಾಣುತ್ತಿಲ್ಲ ಎಂದು ಕರೇಲಿ ಪೊಲೀಸರಿಗೆ ಇಂದು ಬೆಳಿಗ್ಗೆ ಮಾಹಿತಿ ಬಂದಿದೆ. ಸ್ಥಳ ತಲುಪಿದ ಪೊಲೀಸರು ಟ್ರಕ್ಅನ್ನು ಪರಿಶೀಲಿಸಿದಾಗ ಅದರಲ್ಲಿ ಭಾರತ್ ಬಯೋಟೆಕ್ ಕಂಪೆನಿಯ ಕೋವಾಕ್ಸಿನ್ ಲಸಿಕೆಗಳ 2,40,000 ಡೋಸ್ಗಳ ದಾಸ್ತಾನು ಕಂಡು ಆಶ್ಚರ್ಯಗೊಂಡಿದ್ದಾರೆ.
ಇದನ್ನೂ ಓದಿ: ಉಗ್ರರಿಂದ ಟ್ರಕ್ ಬಾಂಬ್‌ ದಾಳಿ-ಪರೀಕ್ಷೆಯ ಸಿದ್ಧತೆಯಲ್ಲಿ ತೊಡಗಿದ್ದ 21 ವಿದ್ಯಾರ್ಥಿಗಳ ದುರಂತ ಅಂತ್ಯ
“ಈ ಲಸಿಕೆಗಳ ಬೆಲೆ ಸುಮಾರು 8 ಕೋಟಿ ರೂ.ಗಳಿರಬಹುದು. ಡ್ರೈವರ್ನ ಮೊಬೈಲ್ ನಂಬರನ್ನು ಟ್ರೇಸ್ ಮಾಡಿದಾಗ ಅದು ಹೆದ್ದಾರಿ ಬಳಿಯ ಪೊದೆಗಳಲ್ಲಿ ಸಿಕ್ಕಿತು. ನಾವು ಡ್ರೈವರ್ ಮತ್ತು ಕಂಡಕ್ಟರ್ಅನ್ನು ಹುಡುಕುತ್ತಿದ್ದೇವೆ. ಆದರೆ ಸದ್ಯಕ್ಕೆ ಅವರು ನಾಪತ್ತೆಯಾಗಿದ್ದಾರೆ. ಟ್ರಕ್ನ ಏರ್ ಕಂಡೀಷನ್ ಕೆಲಸ ಮಾಡುತ್ತಿತ್ತು. ಆದ್ದರಿಂದ ಲಸಿಕೆಯ ಡೋಸ್ಗಳು ಸುರಕ್ಷಿತವಾಗಿವೆ ಎಂದು ಭಾವಿಸಿದ್ದೇವೆ” ಎಂದು ಸಬ್ಇನ್ಸ್ಪೆಕ್ಟರ್ ಆಶೀಶ್ ಬೊಪಾಚೆ ಹೇಳಿದ್ದಾರೆ. ತನಿಖೆ ಮುಂದುವರೆದಿದೆ. (ಏಜೆನ್ಸೀಸ್)
ಕೆಲವು ವಾರ ಇಡೀ ದೇಶ ಬಂದ್ ಮಾಡಿ ಎನ್ನುತ್ತಾರೆ ಅಮೆರಿಕದ ವೈದ್ಯಕೀಯ ಸಲಹೆಗಾರ