ನವದೆಹಲಿ: ವಾಟ್ಸ್ಆ್ಯಪ್ ಪ್ರೈವೆಸಿ ಪಾಲಿಸಿ ಬದಲಾಗುತ್ತಿದ್ದಂತೆ ವಾಟ್ಸ್ಆ್ಯಪ್ ಬದಲಿಗೆ ಉತ್ತಮ ಆಯ್ಕೆ ಎಂದು ಹಲವರು ಟೆಲಿಗ್ರಾಮ್, ಸಿಗ್ನಲ್ ಆ್ಯಪ್ಗಳತ್ತ ಮುಖ ಮಾಡಿದ್ದಾರೆ. ಆದರೆ ಪ್ರೈವೆಸಿ ವಿಷಯದಲ್ಲಿ ಇವುಗಳಿಗಿಂತಲೂ ಬೆಟರ್ ಆ್ಯಪ್ ಇನ್ನೊಂದಿದೆ ಹಾಗೂ ಉಗ್ರರು ತಮ್ಮ ರಹಸ್ಯ ಕಾರ್ಯಾಚರಣೆಗೂ ಅದೇ ಆ್ಯಪ್ ಬಳಸುತ್ತಿದ್ದಾರೆ ಎಂಬ ವಿಷಯವೊಂದು ಈಗ ಬಹಿರಂಗಗೊಂಡಿದೆ. ಅದರಲ್ಲೂ ಇಂಥದ್ದೊಂದು ರಹಸ್ಯ ಹೊರಬೀಳುವಲ್ಲಿ ಪ್ರಮುಖ ಕಾರಣಗಳ ಪೈಕಿ ಬೆಂಗಳೂರಿನ ಡಾ. ಬ್ರೇವ್ ಕೂಡ ಒಬ್ಬ.
ಉಗ್ರರು ತಮ್ಮ ರಹಸ್ಯ ಕಾರ್ಯಾಚರಣೆಗೆ ಈ ಆ್ಯಪ್ ಬಳಸುತ್ತಿದ್ದರು ಎಂಬ ಅಂಶವನ್ನು ನ್ಯಾಷನಲ್ ಇನ್ವೆಸ್ಟಿಗೇಷನ್ ಏಜೆನ್ಸಿ (ಎನ್ಐಎ) ನಡೆಸಿದ ತನಿಖೆಯಲ್ಲಿ ಬಹಿರಂಗಗೊಂಡಿದೆ. ಅಂದರೆ ಈಗ ವಾಟ್ಸ್ಆ್ಯಪ್ಗಿಂತ ಹೆಚ್ಚಿನ ವೈಯಕ್ತಿಕ ಭದ್ರತೆ ಇರುವ ಟೆಲಿಗ್ರಾಮ್ ಹಾಗೂ ಸಿಗ್ನಲ್ ಬೆಸ್ಟ್ ಎನ್ನಲಾಗುತ್ತಿದ್ದರೂ ಉಗ್ರರು ಬಳಸುತ್ತಿರುವ ಆ್ಯಪ್ ಅದಕ್ಕಿಂತಲೂ ಹೆಚ್ಚು ಪ್ರೈವೆಸಿ ಹೊಂದಿದೆ ಎಂಬ ಅಂಶ ಈ ತನಿಖೆಯಲ್ಲಿ ಕಂಡು ಬಂದಿದೆ.
ಇಸ್ಲಾಮಿಕ್ ಸ್ಟೇಟ್ ಇರಾಕ್ ಆ್ಯಂಡ್ ಸಿರಿಯ ಖೋರಸಾನ್ ಪ್ರೊವಿನ್ಸ್ (ಐಎಸ್ಐಎಸ್-ಕೆಪಿ) ಎಂಬ ಉಗ್ರ ಸಂಘಟನೆಗೆ ಸೇರಿದ್ದ ಆರೋಪಿಗಳಾದ ಜಹಾನ್ಜೈಬ್ ಸಮಿ ವಾನಿ, ಆತನ ಪತ್ನಿ ಹೀನಾ ಬಶೀರ್ ಬೇಗ್ ಮತ್ತು ಬೆಂಗಳೂರು ಮೂಲದ ವೈದ್ಯ, ಉಗ್ರರ ವಲಯದಲ್ಲಿ ‘ಡಾ.ಬ್ರೇವ್’ ಎಂದೇ ಕರೆಯಲಾಗುತ್ತಿರುವ ಅಬ್ದೂರ್ ರಹಮಾನ್ ಹೆಚ್ಚಿನ ಭದ್ರತೆ ಇರುವ ಅರ್ಥಾತ್ ಪ್ರೈವೆಸಿ ಇರುವ ‘ಥ್ರೀಮಾ’ ಎಂಬ ಮೆಸೇಜಿಂಗ್ ಆ್ಯಪ್ ಬಳಸುತ್ತಿದ್ದರು ಎಂಬುದು ಎನ್ಐಎ ಅಧಿಕಾರಿಗಳಿಗೆ ತಿಳಿದು ಬಂದಿದೆ. ಈ ಪೈಕಿ ಜಹಾನ್ಜೈಬ್ ಮತ್ತು ಆತನ ಪತ್ನಿ 2020ರ ಮಾರ್ಚ್ನಲ್ಲಿ ಮತ್ತು ಅಬ್ದುರ್ ರಹಮಾನ್ ಕಳೆದ ಆಗಸ್ಟ್ನಲ್ಲಿ ಬಂಧಿತರಾಗಿದ್ದರು.
ಆರೋಪಿಗಳ ವಿಚಾರಣೆ ವೇಳೆ ಅಂದರೆ ಜ.12ರಂದು ನೀಡಲಾದ ಹೇಳಿಕೆ ಸಂದರ್ಭದಲ್ಲಿ ಈ ವಿಷಯ ಬೆಳಕಿಗೆ ಬಂದಿದೆ. ಅಬ್ದುಲ್ ರಹಮಾನ್ ಬಂಧನವಾಗುವ ಇತ್ತೀಚಿನ ವರೆಗೂ ಭಾರತ ಮಾತ್ರವಲ್ಲದೆ ಜಗತ್ತಿನಾದ್ಯಂತ ಇರುವ ಐಸಿಸ್ ಉಗ್ರರ ಜತೆ ಹಾಗೂ ಜಹಾನ್ಜೈಬ್ನೊಂದಿಗೂ ಥ್ರೀಮಾ ಮೂಲಕವೇ ಸಂಪರ್ಕದಲ್ಲಿದ್ದ ಎಂಬುದು ಗೊತ್ತಾಗಿದೆ.
ಉಗ್ರರು ಥ್ರೀಮಾ ಮೊಬೈಲ್ಫೋನ್ ಆ್ಯಪ್ ಜತೆಗೆ ಅದರ ಡೆಸ್ಕ್ಟಾಪ್ ವರ್ಷನ್ ಕೂಡ ಬಳಸುತ್ತಿದ್ದರು. ಏಕೆಂದರೆ ಈ ಆ್ಯಪ್ ಯಾವುದೇ ಡಿಜಿಟಲ್ ಜಾಡು ಉಳಿಸದ್ದರಿಂದ ಅದರಿಂದ ಹೊರಟ ಸಂದೇಶ/ಕರೆಯ ಮೂಲ ಪತ್ತೆ ಕಷ್ಟ ಎಂಬ ಕಾರಣಕ್ಕೇ ಉಗ್ರರು ಇದನ್ನು ಬಳಸುತ್ತಿದ್ದರು ಎನ್ನಲಾಗಿದೆ. ಅದರಲ್ಲೂ ಇತರ ಮೆಸೇಜಿಂಗ್ ಆ್ಯಪ್ಗಳ ಥರ ಥ್ರೀಮಾ ಬಳಕೆದಾರರು ಖಾತೆ ತೆರೆಯಲು ಇ-ಮೇಲ್ ಐಡಿ ಅಥವಾ ಫೋನ್ ನಂಬರ್ ಕೊಡಬೇಕಾಗಿರದ್ದರಿಂದ ಅನಾಮಧೇಯ ಬಳಕೆಗೆ ಇದು ಹೆಚ್ಚು ಉಪಯೋಗಿಸಲಾಗುತ್ತಿದೆ ಎನ್ನಲಾಗುತ್ತಿದೆ. (ಏಜೆನ್ಸೀಸ್)