ಮಥುರಾ: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಭಾರತಕ್ಕೆ ಬರುತ್ತಿರುವ ಹಿನ್ನೆಲೆ ದೇಶದಲ್ಲಿ ಭಾರೀ ಸಿದ್ಧತೆಯನ್ನು ನಡೆಸಲಾಗುತ್ತಿದೆ. ಇದೀಗ ಟ್ರಂಪ್ಗೆ ನಮ್ಮ ದೇಶದ ಯಮುನಾ ನದಿ ಸುಂದರವಾಗಿ ಕಾಣಲಿ ಎಂಬ ಕಾರಣಕ್ಕೆ ನದಿಗೆ ನೀರನ್ನು ಸಹ ಬಿಡಲಾಗಿದೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಫೆ.24 ಮತ್ತಯ 25ರಂದು ಭಾರತ ಪ್ರವಾಸ ಕೈಗೊಳ್ಳಲಿದ್ದಾರೆ. ಅಹಮದಾಬಾದ್ನ ಮೊಟೆರಾದಲ್ಲಿ ಕ್ರೀಡಾಂಗಣವನ್ನು ಉದ್ಘಾಟಿಸಲಿರುವ ಟ್ರಂಪ್ ಅದಕ್ಕೂ ಮೊದಲು 22ಕಿ.ಮೀ. ರೋಡ್ ಶೋನಲ್ಲಿ ಭಾಗವಹಿಸಲಿದ್ದಾರೆ. ಮೊದಲು ದೆಹಲಿಗೆ ಬಂದಿಳಿಯಲಿರುವ ಟ್ರಂಪ್ ಅಹಮದಾಬಾದ್ನ ಜತೆ ಆಗ್ರಾಕ್ಕೂ ಕೂಡ ಭೇಟಿ ನೀಡುತ್ತಾರೆ ಎನ್ನಲಾಗಿದೆ. ಹೀಗಾಗಿ ಆಗ್ರಾವನ್ನೂ ಸಹ ಸುಂದರವಾಗಿಸುವ ಕೆಲಸ ನಡೆಯುತ್ತಿದೆ. ಆಗ್ರಾದ ತಾಜ್ ಮಹಲ್ ಬಳಿ ಹರಿಯುವ ಯಮುನಾ ನದಿಯನ್ನೂ ಸುಂದರವಾಗಿಸುವ ಪ್ರಯತ್ನ ನಡೆದಿದೆ. ನದಿಯ ಕಲುಷಿತತೆಯನ್ನು ಟ್ರಂಪ್ ಕಣ್ಣಿಗೆ ಕಾಣದಿರುವಂತೆ ಮಾಡುವ ಸಲುವಾಗಿ ನದಿಗೆ 500 ಕ್ಯುಸೆಕ್ ನೀರು ಬಿಡಲಾಗಿದೆ.
ಉತ್ತರಪ್ರದೇಶದ ಬುಲಂದರ್ಶಹರ್ನ ಗಂಗನ್ಹರ್ ಪ್ರದೇಶದಿಂದ ಯಮುನಾ ನದಿಗೆ 500 ಕ್ಯೂಸೆಕ್ ನೀರನ್ನು ಉತ್ತರ ಪ್ರದೇಶದ ನೀರಾವರಿ ಇಲಾಖೆ ಬಿಡುಗಡೆ ಮಾಡಿದೆ. ಈ ನೀರು ಫೆ.20ಕ್ಕೆ ಮಥುರಾ ತಲುಪಲಿದ್ದು, ಫೆ.21ರ ಮಧ್ಯಾಹ್ನದ ಹೊತ್ತಿಗೆ ಆಗ್ರಾ ತಲುಪಲಿದೆ. ಫೆ.24ರವರೆಗೆ ಯಮುನೆಯಲ್ಲಿ ಉತ್ತಮ ನೀರಿನ ಮಟ್ಟವನ್ನು ಕಾಯ್ದುಕೊಳ್ಳಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಭಾರತದ ಅನೇಕ ನದಿಗಳು ಸಂಪೂರ್ಣವಾಗಿ ಕಲುಷಿತವಾಗಿದ್ದು ಅದರಲ್ಲಿ ಯಮುನಾ ನದಿಯೂ ಒಂದು. ಈ ನದಿಯ ನೀರಿನಿಂದ ಆಗ್ರಾದ ಕೆಲ ಪ್ರದೇಶದಲ್ಲಿ ದುರ್ವಾಸನೆ ಉಂಟಾಗಿದೆ. ಇದೀಗ ನೀರು ಬಿಟ್ಟಿರುವುದರಿಂದಾಗಿ ದುರ್ವಾಸನೆ ದೂರಾಗಲಿದೆ ಎಂದು ಹೇಳಲಾಗಿದೆ. ಹಾಗೆಯೇ ಮಥುರ ಮತ್ತು ಆಗ್ರಾದಲ್ಲಿ ಹರಿಯುವ ಈ ನದಿಯಲ್ಲಿ ಆಮ್ಲಜನಕದ ಮಟ್ಟವೂ ಹೆಚ್ಚಲಿದೆ ಎಂದು ತಿಳಿಸಲಾಗಿದೆ. (ಏಜೆನ್ಸೀಸ್)