ಬೆಂಗಳೂರು: ಶಿವರಾಜಕುಮಾರ್ ಅವರ 125ನೇ ಚಿತ್ರವಾದ ‘ವೇದ’ ಬಿಡುಗಡೆಯಾಗುವುದಕ್ಕೆ ಇನ್ನು 20 ದಿನಗಳು ಮಾತ್ರ ಬಾಕಿ ಇವೆ. ಇದೇ ತಿಂಗಳ 23ರಂದು ಚಿತ್ರವು ಬಿಡುಗಡೆಯಾಗುತ್ತಿದೆ. ಈ ಮಧ್ಯೆ, ಚಿತ್ರದ ಮೊದಲ ಟೀಸರ್ ಆದ ‘ದಿ ಸೌಲ್ ಆಫ್ ವೇದ’ ಬಿಡುಗಡೆಯಾಗಿದೆ.
ಇದನ್ನೂ ಓದಿ: ಯುವ ಅಭಿನಯದ ಸಿನಿಮಾದಲ್ಲಿ ಐಶ್ವರ್ಯಾ ನಟಿಸುತ್ತಿರುವುದು ಸುಳ್ಳು ಎಂದ ಪ್ರಿಯಾಂಕಾ ಉಪೇಂದ್ರ
‘ವೇದ’ ಚಿತ್ರದ ಕಥೆಯೇನು? ಎಂಬ ವಿಷಯವನ್ನು ಶಿವರಾಜಕುಮಾರ್ ಅವರಾಗಲೀ, ನಿರ್ದೇಶಕ ಹರ್ಷ ಆಗಲೀ ಬಿಟ್ಟುಕೊಟ್ಟಿರಲಿಲ್ಲ. ಚಿತ್ರಕ್ಕೆ ‘ದಿ ಬ್ರೂಟಲ್ ಸಿಕ್ಸ್ಟೀಸ್’ ಎಂಬ ಅಡಿಬರಹ ಇದ್ದುದರಿಂದ, ಈ ಚಿತ್ರವು 1960ರ ಕಾಲಘಟ್ಟದಲ್ಲಿ ನಡೆಯುವ ಕಥೆ ಎಂಬುದು ಮಾತ್ರ ಸ್ಪಷ್ಟವಾಗಿತ್ತು. ಬಹುಶಃ ಆಗಿನ ಕಾಲದ ಭೂಗತಲೋಕದ ಕಥೆ ಇರಬಹುದು ಎಂಬ ಅಂದಾಜಿತ್ತು.
ಆದರೆ, ಇಂದು ಬಿಡುಗಡೆಯಾಗಿರುವ ಚಿತ್ರದ ಟೀಸರ್ ನೋಡಿದರೆ, ಹರ್ಷ ಮತ್ತೊಮ್ಮೆ ಆತ್ಮ ಮತ್ತು ಮಾಟ-ಮಂತ್ರದ ಕಥೆ ಹೇಳುವುದಕ್ಕೆ ಹೊರಟಿದ್ದಾರಾ? ಎಂಬ ಪ್ರಶ್ನೆ ಎದುರಾಗುತ್ತದೆ. ಚಿತ್ರದಲ್ಲಿ ಗೊಂಬೆಯೊಂದು ಪ್ರಮುಖ ಪಾತ್ರ ವಹಿಸುತ್ತದೆ ಮತ್ತು ಅದನ್ನು ಟೀಸರ್ನಲ್ಲಿ ಆಗಾಗ ತೋರಿಸಲಾಗುತ್ತದೆ. ಈ ಗೊಂಬೆ ಆಗಾಗ ಬರುವುದು ನೋಡಿದರೆ, ಚಿತ್ರದಲ್ಲಿ ಮಾಟ-ಮಂತ್ರ ಮತ್ತು ಆತ್ಮದ ಛಾಯೆ ಮತ್ತೊಮ್ಮೆ ಕಾಣಿಸುತ್ತದೆ. ಈ ಹಿಂದೆ ‘ಭಜರಂಗಿ’ ಮತ್ತು ‘ಭಜರಂಗಿ 2” ಚಿತ್ರಗಳಲ್ಲೂ, ಆತ್ಮ ಮತ್ತು ಮಾಟ-ಮಂತ್ರದ ಕಥೆಯಿತ್ತು. ಈಗ ಅದೇ ವಿಷಯವನ್ನಿಟ್ಟುಕೊಂಡು ಹರ್ಷ ಇನ್ನೊಂದು ಹೊಸ ಚಿತ್ರ ಮಾಡಿದ್ದಾರಾ? ಎಂಬ ಪ್ರಶ್ನೆ ಬರುವುದು ಸಹಜ.
ಆದರೆ, ಈ ಬಗ್ಗೆ ಈಗಲೇ ಹೇಳುವುದು ಕಷ್ಟ. ಏಕೆಂದರೆ, ಇದು ಬರೀ ಟೀಸರ್. ಅದನ್ನು ನೋಡಿ, ಇದು ಇಂಥದ್ದೇ ಕಥೆ ಎಂಬ ತೀರ್ಮಾನಕ್ಕೆ ಬರುವುದು ಕಷ್ಟ. ಹಾಗಾಗಿ, ಚಿತ್ರ ನೋಡಿದ ಮೇಲಷ್ಟೇ, ಅದರ ಬಗ್ಗೆ ಏನಾದರೂ ಹೇಳಬಹುದು.
ಅಂದಹಾಗೆ, ‘ವೇದ’ ಚಿತ್ರವು ಗೀತಾ ಶಿವರಾಜಕುಮಾರ್ ನಿರ್ಮಾಣದ ಮೊದಲ ಚಿತ್ರವಾಗಿದ್ದು, ಇದನ್ನು ಅವರು ಗೀತಾ ಆರ್ಟ್ಸ್ ಎಂಬ ಹೊಸ ಸಂಸ್ಥೆಯನ್ನು ಹುಟ್ಟುಹಾಕಿ, ಅದರಡಿ ನಿರ್ಮಿಸಿದ್ದಾರೆ. ಈ ಚಿತ್ರವನ್ನು ನಿರ್ದೇಶನ ಮಾಡುವುದರ ಜತೆಗೆ ಕಥೆ-ಚಿತ್ರಕಥೆಯನ್ನೂ ಹರ್ಷ ಬರೆದಿದ್ದಾರೆ.
ಇದನ್ನೂ ಓದಿ: ಸಾಯಿಬಾಬ ಕುರಿತು ಕನ್ನಡದಲ್ಲಿ ಇನ್ನೊಂದು ಸಿನಿಮಾ; ಈ ಬಾರಿ ಮಕ್ಕಳೇ ಪಾತ್ರಧಾರಿಗಳು …
ಶಿವರಾಜಕುಮಾರ್, ಗಾನವಿ ಲಕ್ಷ್ಮಣ್, ಉಮಾಶ್ರೀ, ಅದಿತಿ ಸಾಗರ್, ಶ್ವೇತಾ ಚೆಂಗಪ್ಪ, ವೀಣಾ ಪೊನ್ನಪ್ಪ, ರಾಘು ಶಿವಮೊಗ್ಗ, ಚೆಲುವರಾಜ್ ಮುಂತಾದವರು ಅಭಿನಯಿಸಿರುವ ಈ ಚಿತ್ರಕ್ಕೆ ಅರ್ಜುನ್ ಜನ್ಯ ಸಂಗೀತ ಸಂಯೋಜಿಸಿದ್ದು, ಸ್ವಾಮಿ ಗೌಡ ಛಾಯಾಗ್ರಹಣ ಮಾಡಿದ್ದಾರೆ.