ಬೆಂಗಳೂರು: ಆಧುನಿಕ ಕಾಲಟ್ಟದಲ್ಲಿ ಡಿಜಿಟಲ್ ತಂತ್ರಜ್ಞಾನದ ಬಳಕೆ ಹೆಚ್ಚುತ್ತಿದ್ದಂತೆ, ಸ್ಮಾರ್ಟ್ ಕಟ್ಟಡ, ಸ್ಮಾರ್ಟ್ ಮನೆ ನಿರ್ಮಾಣ ಹೆಚ್ಚಾಗುತ್ತಿದೆ. ಹೊಸದಾಗಿ ಮನೆ ನಿರ್ಮಿಸುತ್ತಿರುವವರು ಡಿಜಿಟಲ್ ಸೌಲಭ್ಯಗಳನ್ನು ಅಳವಡಿಸಿಕೊಳ್ಳಲು ಹೆಚ್ಚಿನ ಆದ್ಯತೆ ನೀಡುತ್ತಿದ್ದಾರೆ.
ದೇಶದ ಮಧ್ಯಮ ವರ್ಗದ ಮಂದಿ ಕೂಡ ಮನೆ ಕಟ್ಟುವಾಗ ಕನಿಷ್ಠ ಒಂದೆರಡು ಡಿಜಿಟಲ್ ಸೌಲಭ್ಯಗಳನ್ನು ಅಳವಡಿಸಿಕೊಳ್ಳಲು ಮುಂದಾಗುತ್ತಿದ್ದಾರೆ. 5ಜಿ ಇಂರ್ಟನೆಟ್ ಸೇವೆ ಇನ್ನಷ್ಟು ವಿಸ್ತರಿಸಿಕೊಳ್ಳುತ್ತಿದ್ದಂತೆ, ಸ್ಮಾರ್ಟ್ ಮನೆಗಳ ನಿರ್ಮಾಣ ಸಂಖ್ಯೆ ಹೆಚ್ಚುವ ಸಾಧ್ಯತೆ ನಿಶ್ಚಿತ ಎನ್ನಲಾಗುತ್ತಿದೆ.
ಅಗತ್ಯಕ್ಕೆ ತಕ್ಕಂತೆ ಡಿಜಿಟಲ್ ಸೌಲಭ್ಯಗಳನ್ನು ಮನೆಗಳಲ್ಲಿ ಅಳವಡಿಸಿಕೊಳ್ಳಬಹುದು. ವಿದ್ಯುತ್ ಹಾಗೂ ನೀರಿನ ಬಳಕೆ, ಮನರಂಜನೆ, ಸುರಕ್ಷತೆ, ಅಡುಗೆ ಮನೆ ಇತ್ಯಾದಿಗೆ ಸ್ಮಾರ್ಟ್ ವ್ಯವಸ್ಥೆಗಳನ್ನು ಬಳಕೆ ಮಾಡಬಹುದು. ಇದರಿಂದ ಕೆಲಸದ ಹೊರೆಯೂ ಕಡಿಮೆಯಾಗುತ್ತದೆ. ಜತೆಗೆ ಮನೆಯಲ್ಲಿ ಅತ್ಯಾಧುನಿಕ ಸೌಲಭ್ಯ ಇದೆ ಎಂಬ ಹೆಗ್ಗಳಿಕೆಯನ್ನೂ ಗಳಿಸಬಹುದು. ಸ್ಮಾರ್ಟ್ಫೋನ್ ಹಾಗೂ ವೈಫೈ ಸಂಪರ್ಕ ಹೊಂದಿದ್ದರೆ ಯಾವುದೇ ಅಡೆತಡೆಗಳಿಲ್ಲದೆ ಮನೆಗಳಲ್ಲಿ ಡಿಜಿಟಲ್ ಸೌಲಭ್ಯಗಳನ್ನು ಅಳವಡಿಸಬಹುದು.
ಅಡುಗೆ ಮನೆಯಲ್ಲಿ ಬಳಸುವ ಬಹುತೇಕ ವಸ್ತುಗಳು ಡಿಜಿಟಲ್ ರೂಪ ಪಡೆದುಕೊಳ್ಳುತ್ತಿವೆ. ವಿದ್ಯುತ್ ದೀಪ, ಫ್ಯಾನ್, ಎಸಿ ನಿರ್ವಹಣೆ, ಸಿಸಿ ಕ್ಯಾಮರಾ ನಿರ್ವಹಣೆ ಇತ್ಯಾದಿಯನ್ನು ಕುಳಿತಲ್ಲಿಂದಲೇ ‘ಆನ್&ಆಫ್’ ಮಾಡಲು ಸಾಧ್ಯವಿದೆ. ಜತೆಗೆ ಫ್ರಿಜ್, ಮಿಕ್ಸರ್ ಗೆಂಡರ್, ಓವನ್ ಇತ್ಯಾದಿಯನ್ನು ಕೂಡ ಮೊಬೈಲ್ಗಳ ಮೂಲಕ ನಿರ್ವಹಿಸಬಹುದು. ಒಟ್ಟಾರೆಯಾಗಿ ಇಂದು ಮೊಬೈಲ್ ಮೂಲಕ ಸಂಪೂರ್ಣ ಮನೆಯನ್ನು ನಿರ್ವಹಣೆ ಮಾಡಬಹುದು.
ಟಚ್ಲೆಸ್ ಡೋರ್ಬೆಲ್
ಪ್ರತಿಯೊಂದು ಮನೆಗಳಲ್ಲೂ ಬೆಲ್ ಇದ್ದೇ ಇರುತ್ತದೆ. ಯಾರಾದರೂ ಬಂದರೆ ಮೊದಲು ಮುಖ್ಯದ್ವಾರದ ಬಳಿಯಿರುವ ಬೆಲ್ ಬಾರಿಸುತ್ತಾರೆ. ಈ ವ್ಯವಸ್ಥೆ ನಿಧಾನವಾಗಿ ಹಳತೆನಿಸುತ್ತಿದ್ದು, ಡಿಜಿಟಲ್ ಬೆಲ್ ಬಳಕೆ ಹೆಚ್ಚುತ್ತಿದೆ. ವ್ಯಕ್ತಿಯೊಬ್ಬರು ಬಾಗಿಲಿನ ಬಳಿ ಬಂದು ನಿಲ್ಲುತ್ತಿದ್ದಂತೆ ಅಳವಡಿಸಿರುವ ಸೆನ್ಸರ್ ಮೂಲಕ ಸಂದೇಶ ರವಾನೆಯಾಗುತ್ತದೆ. ಇದನ್ನು ಮೊಬೈಲ್ ಮೂಲಕ ನಿಯಂತ್ರಿಸಬಹುದು.
ಥರ್ಮೋಸ್ಟ್ಯಾಟ್
ದಿನದಿಂದ ದಿನಕ್ಕೆ ವಾತಾವರಣದಲ್ಲಿ ಬದಲಾವಣೆಯಾಗುತ್ತಿರುತ್ತದೆ. ಇದು ಮನೆಯೊಳಗೆ ಯಾವುದೇ ಬದಲಾವಣೆ ತರಬಾರದು ಎಂಬ ಕಾರಣಕ್ಕೆ ಥರ್ಮೋಸ್ಟ್ಯಾಟ್ಗಳನ್ನು ಅಳವಡಿಸುತ್ತಿರುವವರ ಸಂಖ್ಯೆ ಹೆಚ್ಚಿದೆ. ಇದು ಮನೆಯೊಳಗೆ ಬೆಚ್ಚಗಿನ ಹಾಗೂ ತಂಪಿನ ವಾತಾವರಣ ಸೃಷ್ಟಿಸಲು ಸಹಾಯ ಮಾಡುತ್ತದೆ.
ಹೈಟೆಕ್ ಭದ್ರತೆ
ಹೊಸದಾಗಿ ಮನೆ ನಿರ್ಮಿಸುತ್ತಿರುವವರು ಭದ್ರತೆಗೆ ಹೆಚ್ಚಿನ ಆದ್ಯತೆ ನೀಡುತ್ತಿದ್ದಾರೆ. ಮುಖ್ಯದ್ವಾರದಿಂದ ಹಿಡಿದು ಪ್ರತಿ ಹಂತದಲ್ಲೂ ಸ್ಮಾರ್ಟ್ ಹೋಮ್ ವ್ಯವಸ್ಥೆಗಳನ್ನು ಅಳವಡಿಸಿಕೊಳ್ಳುತ್ತಿದ್ದಾರೆ. ಜತೆಗೆ ಡಿಜಿಟಲ್ ಲಾಕರ್ಗಳೂ ಮನೆಯಲ್ಲಿ ಬಳಕೆಯಾಗುತ್ತಿವೆ. ಇದರೊಂದಿಗೆ ಬಾಗಿಲುಗಳಿಗೆ ಕೀಗಳ ಬದಲಾಗಿ, ಫಿಂಗರ್ ಪ್ರಿಂಟ್ ತಂತ್ರಜ್ಞಾನ ಅಳವಡಿಸಲಾಗುತ್ತಿದೆ.