ರಾಜು ಹೊಸಮನಿ ನರಗುಂದ
ಕರೊನಾ ಹಾವಳಿ ಇಡೀ ಜಗತ್ತನ್ನೇ ತಲ್ಲಣಗೊಳಿಸಿದೆ. ಜನತಾ ಕರ್ಫ್ಯೂ, ಲಾಕ್ಡೌನ್ ಹಿನ್ನೆಲೆಯಲ್ಲಿ ನಿರ್ಗತಿಕರು ಒಂದು ಹೊತ್ತಿನ ಊಟಕ್ಕೂ ಪರಿತಪಿಸುತ್ತಿದ್ದಾರೆ. ಈ ಮಧ್ಯೆ ಪಟ್ಟಣದ ಯುವಕರ ತಂಡವೊಂದು ಮೋಡ್ಕಾ (ಗುಜರಿ) ಸಂಗ್ರಹಿಸಿ ನಿರ್ಗತಿಕರ ಕುಟುಂಬಗಳಿಗೆ ಕಿಟ್ಗಳನ್ನು ವಿತರಿಸಲು ಮುಂದಾಗಿದೆ.
ಪಟ್ಟಣದ ಹೆಲ್ಪಿಂಗ್ ಹ್ಯಾಂಡ್ಸ್ ಮುಸ್ಲಿಂ ಸಂಘಟನೆ ಸದಸ್ಯರು, ಆರ್ಥಿಕವಾಗಿ ಸಂಕಷ್ಟದಲ್ಲಿರುವ ನಿರ್ಗತಿಕರು, ಅಸಹಾಯಕರು, ವಿಧವೆಯರ ಕುಟುಂಬಗಳಿಗೆ ಆಹಾರ ಸಾಮಗ್ರಿಗಳ ಕಿಟ್ಗಳನ್ನು ವಿತರಿಸಿ ಮಾನವೀಯತೆ ಮೆರೆದಿದ್ದಾರೆ. ಸಂಘಟನೆ ಸದಸ್ಯರು ಹಳೆಯ ಪಾತ್ರೆ, ಕಬ್ಬಿಣ, ಪ್ಪಾಸ್ಟಿಕ್ ಡಬ್ಬಿ, ಬಕೇಟ್ ಗುಜರಿ ಸಂಗ್ರಹಿಸಿ, ಅವುಗಳನ್ನು ಮಾರಿ ಬಂದ ಹಣದಲ್ಲಿ ಕಿಟ್ಗಳನ್ನು ತಯಾರಿಸಿ ವಿತರಿಸುತ್ತಿದ್ದಾರೆ.
ಇದೀಗ ರಂಜಾನ್ ತಿಂಗಳಲ್ಲಿ ಮುಸ್ಲಿಂ ಸಮಾಜದವರು ಮನೆಗಳನ್ನು ಸ್ವಚ್ಛ ಮಾಡಿಕೊಳ್ಳುತ್ತಿದ್ದಾರೆ. ಈ ವೇಳೆ ಮನೆಯಲ್ಲಿರುವ ಗುಜರಿ ವಸ್ತುಗಳನ್ನು ಹೊರಗೆ ಹಾಕುತ್ತಾರೆ. ಅಂಥ ವಸ್ತುಗಳನ್ನು ಸಂಘಟನೆಯ 50 ಸದಸ್ಯರು ಸಂಗ್ರಹಿಸಿದ್ದಾರೆ. ಅಂದಾಜು 6 ಟಾಟಾ ಏಸ್ ವಾಹನಗಳಷ್ಟು ಗುಜರಿ (ಮೋಡ್ಕಾ) ಸಂಗ್ರಹವಾಗಿದ್ದು, ಅದನ್ನು ಮಾರಾಟ ಮಾಡಿದ್ದಾರೆ. ಜತೆಗೆ ಕೆಲವು ದಾನಿಗಳಿಂದ ಹಣ ಸಂಗ್ರಹಿಸಿ 60ಕ್ಕೂ ಅಧಿಕ ನಿರ್ಗತಿಕ ಮಹಿಳೆಯರಿಗೆ ಕಿಟ್ಗಳನ್ನು ವಿತರಿಸಿದ್ದಾರೆ. ಕಿಟ್ನಲ್ಲಿ 5 ಕೆಜಿ ಅಕ್ಕಿ, ಅಡುಗೆ ಎಣ್ಣೆ, ಅರಿಷಿಣ ಪುಡಿ, ಉಪ್ಪು, ಬೇಳೆ, ಶ್ಯಾವಿಗೆ ಪ್ಯಾಕೆಟ್, ಮಸಾಲೆ ಪದಾರ್ಥ ಒಳಗೊಂಡಿದ್ದು, 1200 ರೂಪಾಯಿ ಮೌಲ್ಯದ ಸಾಮಗ್ರಿಗಳಿವೆ.
ನನಗೀಗ 75 ವರ್ಷ, ನಾನು ಪಾರ್ಶ್ವವಾಯುದಿಂದ ಬಳಲುತ್ತಿದ್ದೇನೆ. ಪತಿಯಿಲ್ಲ, ಮಗ ಮಾನಸಿಕ ಅಸ್ವಸ್ಥ. ಲಾಕ್ಡೌನ್ನಿಂದ ಸಾಕಷ್ಟು ಸಮಸ್ಯೆಯಾಗಿದೆ. ಯಾರೂ ದಿಕ್ಕಿಲ್ಲದ ನನಗೆ ರಂಜಾನ್ ಹಬ್ಬ ಆಚರಿಸುವುದಿರಲಿ, ಒಂದು ಹೊತ್ತಿನ ಊಟಕ್ಕೂ ಕಷ್ಟವಿದೆ. ಹುಡುಗರು ಬಂದು ನಮ್ಮ ಕುಟುಂಬಕ್ಕೆ ಆಹಾರ ಸಾಮಗ್ರಿಗಳ ಕಿಟ್ ವಿತರಿಸಿದ್ದಾರೆ. ಇದರಿಂದ ಒಂದು ವಾರದ ಊಟಕ್ಕೆ ಅನುಕೂಲವಾಗುತ್ತದೆ.
| ಅಮೀನಬಿ ಗುಡಾರ ಕಿಟ್ ಪಡೆದ ಫಲಾನುಭವಿ
ಪ್ರವಾಹ, ಲಾಕ್ಡೌನ್ನಿಂದಾಗಿ ತಾಲೂಕಿನ ಜನರು ಆರ್ಥಿಕ ಸಂಕಷ್ಟ ಎದುರಿಸುವಂತಾಗಿದೆ. ಸ್ಥಿತಿವಂತರು ಹೇಗಾದರೂ ಬದುಕುತ್ತಾರೆ. ಆದರೆ, ಬಡವರಿಗೆ ಯಾರೂ ದಿಕ್ಕಿಲ್ಲದಂತಾಗಿದೆ. ನಮ್ಮ ಸಂಘಟನೆ ಸದಸ್ಯರೂ ಆರ್ಥಿಕವಾಗಿ ಸದೃಢರಿಲ್ಲ. ಹೀಗಾಗಿ ಮೋಡ್ಕಾ ಸಂಗ್ರಹಿಸಿ ಕೈಲಾದ ಸಹಾಯ ಮಾಡುತ್ತಿದ್ದೇವೆ.
| ಖಲಂದರ ಮಾಲ್ದಾರ
ಹೆಲ್ಪಿಂಗ್ ಹ್ಯಾಂಡ್ಸ್ ಗ್ರೂಪ್ ಸದಸ್ಯ