ನವದೆಹಲಿ: ಈಶಾನ್ಯ ದೆಹಲಿಯಲ್ಲಿ ಸಿಎಎ, ಎನ್ಆರ್ಸಿ ಪರ ವಿರೋಧದ ಹೋರಾಟ ಹಿಂಸಾತ್ಮಕ ರೂಪ ಪಡೆದುಕೊಂಡು ಇದೀಗ ಕೊಂಚ ಸುಧಾರಿಸಿದೆ. ಇದರ ಬೆನ್ನಲ್ಲೇ ರಾಷ್ಟ್ರ ರಾಜಧಾನಿಯ ರಾಜೀವ್ ಚೌಕ್ ಮೆಟ್ರೋ ನಿಲ್ದಾಣದಲ್ಲಿ ಗೋಲಿ ಮಾರೋ ಘೋಷಣೆ ಕೇಳಿಬಂದಿದ್ದು, ಘೋಷಣೆ ಕೂಗಿದ ಆರು ಯುವಕರನ್ನು ಪೊಲೀಸರು ಬಂಧಿಸಿದ್ದಾರೆ.
ಇಂದು ಬೆಳಗ್ಗೆ ಕೇಸರಿ ಜುಬ್ಬ ಮತ್ತು ಟೀ ಶರ್ಟ್ಗಳನ್ನು ತೊಟ್ಟ ಆರು ಯುವಕರ ಗುಂಪೊಂದು ರಾಜೀವ್ ಚೌಕ್ ಮೆಟ್ರೋ ನಿಲ್ದಾಣದಲ್ಲಿ “ಗೋಲಿ ಮಾರೋ” ಎಂದು ಘೋಷಣೆ ಕೂಗಿದೆ. ರೈಲಿನಿಂದ ಇಳಿಯುವಾಗ ಘೋಷಣೆ ಕೂಗಲು ಆರಂಭಿಸಿದ ಅವರು, ಮೆಟ್ರೋ ನಿಲ್ದಾಣದಲ್ಲಿ ಈ ದೇಶದ ಯುವಕರು ಸಿಎಎಗೆ ಬೆಂಬಲ ನೀಡಲಿದ್ದೇವೆ ಎನ್ನುವ ಅರ್ಥ ನೀಡುವ ಘೋಷಣೆಗಳನ್ನು ಕೂಗಿದ್ದಾರೆ. ಈ ರೀತಿಯ ಘೋಷಣೆ ಕೂಗುತ್ತಿರುವುದನ್ನು ಸಹ ಪ್ರಯಾಣಿಕರು ವಿಡಿಯೋ ಮಾಡಿದ್ದು ಅದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಯುವಕರು ಘೋಷಣೆ ಕೂಗುತ್ತಿರುವ ಮಾಹಿತಿ ಲಭಿಸಿದ ತಕ್ಷಣ ಅವರ ಬಳಿ ಬಂದ ಸಿಐಎಸ್ಎಫ್ ಪೊಲೀಸರು ಯುವಕರನ್ನು ಬಂಧಿಸಿದ್ದಾರೆ. ಹೆಚ್ಚಿನ ತನಿಖೆ ನಡೆಸುವ ಸಲುವಾಗಿ ಯುವಕರನ್ನು ದೆಹಲಿ ಮೆಟ್ರೋ ಪೊಲೀಸ್ ಅಧಿಕಾರಿಗಳಿಗೆ ಹಸ್ತಾಂತರಿಸಲಾಗಿದೆ.
ಗೋಲಿ ಮಾರ್ ಘೋಷಣೆಯನ್ನು ಪರಿಚಯಿಸಿದ್ದು ಬಿಜೆಪಿಯ ಸಚಿವ ಅನುರಾಗ್ ಠಾಕೂರ್. ದೆಹಲಿ ವಿಧಾನ ಸಭಾ ಚುನಾವಣೆಯ ಪ್ರಚಾರ ಸಭೆಯೊಂದರಲ್ಲಿ ಭಾಗವಹಿಸಿದ್ದ ಅವರು ಗೋಲಿಮಾರ್ ಘೋಷಣೆಯನ್ನು ಕೂಗಿ, ಜನರ ಬಾಯಿಂದಲೂ ಆ ಘೋಷಣೆಯನ್ನು ಕೂಗಿಸಿದ್ದರು.
ದೆಹಲಿ ಮೆಟ್ರೋ (ಕಾರ್ಯಾಚರಣೆ ಮತ್ತು ನಿರ್ವಹಣೆ) ಕಾಯ್ದೆ 2002ರ ಪ್ರಕಾರ, ದೆಹಲಿ ಮೆಟ್ರೋ ನಿಲ್ದಾಣದಲ್ಲಿ ಯಾವುದೇ ರೀತಿಯ ಪ್ರದರ್ಶನ ಅಥವಾ ಉಪದ್ರವವನ್ನು ನಿಷೇಧಿಸಲಾಗಿದೆ. (ಏಜೆನ್ಸೀಸ್)