24 ವರ್ಷದ ಯುವಕ ಐಸ್ಕ್ರೀಂ ತಿಂದು ಒಂದು ತಿಂಗಳ ಮಟ್ಟಿಗೆ ಜೈಲು ವಾಸ ಅನುಭವಿಸುವಂತಾಯಿತು. ಆತನ ಸ್ವಯಂಕೃತ ಅಪರಾಧಕ್ಕೆ ಯುಎಸ್ ಟೆಕ್ಸಾಸ್ ಕೋರ್ಟ್ ಒಂದರ ನ್ಯಾಯಾಧೀಶರು ನೀಡಿದ ಶಿಕ್ಷೆ ಇದು..
ಡಿ.ಆಡ್ರಿಯನ್ ಆ್ಯಂಡರ್ಸನ್ ಎಂಬ 24 ವರ್ಷದ ಯುವಕ ತನ್ನ ತಂದೆಯೊಂದಿಗೆ ಟೆಕ್ಸಾಸ್ನ ವಾಲ್ಮಾರ್ಟ್ ಸೂಪರ್ಮಾರ್ಕೆಟ್ಗೆ ತೆರಳಿದ್ದ. ಅಲ್ಲಿ ಅವನು ಫ್ರಿಜ್ನಲ್ಲಿರುವ ಐಸ್ಕ್ರೀಂ ಕಪ್ ತೆಗೆದುಕೊಂಡು, ಅದರ ಮುಚ್ಚಲ ತೆರೆದು ಸೀದಾ ನಾಲಿಗೆ ಹಾಕಿ ನೆಕ್ಕಿದ. ಅಷ್ಟು ಮಾಡಿದ ಬಳಿಕ ಮತ್ತೆ ಆ ಬರಿದಾದ ಕಪ್ನ್ನು ಅದೇ ಫ್ರಿಜ್ನಲ್ಲಿ ಇಟ್ಟಿದ್ದ. ಇಷ್ಟೆಲ್ಲ ಮಾಡಿ ಸುಮ್ಮನೆ ಇರುವ ಬದಲು ತನ್ನ ಎಡವಟ್ಟು ಕೆಲಸದ ವಿಡಿಯೋ ಕ್ಲಿಪ್ನ್ನು ಫೇಸ್ಬುಕ್ನಲ್ಲಿ ಪೋಸ್ಟ್ ಮಾಡಿಕೊಂಡಿದ್ದ. ಇದೆಲ್ಲ ಆಗಿದ್ದು 2019ರ ಆಗಸ್ಟ್ನಲ್ಲಿ.
ಆಡ್ರಿಯನ್ನ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟೆ ವೈರಲ್ ಆಗಿತ್ತು. ಆತ ಐಸ್ಕ್ರೀಮ್ ಕಪ್ಗೆ ಬಾಯಿ ಹಾಕಿ ನೆಕ್ಕಿದ್ದರ ಬಗ್ಗೆಯೇ ಹೆಚ್ಚು ಚರ್ಚೆಯಾಗಿತ್ತು.
ಇದನ್ನು ನೋಡಿದ ಪೊಲೀಸರು ಇದೊಂದು ಕಿಡಿಗೇಡಿತನವಾಗಿದೆ. ಅಪರಾಧ ಎನಿಸಿಕೊಳ್ಳುತ್ತದೆ ಎಂದು ಪ್ರಕರಣ ದಾಖಲಿಸಿ, ಆತನನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದರು. ಎಂಜಲು ಮಾಡಿದ ಐಸ್ಕ್ರೀಂ ಕಪ್ನ್ನು ಪುನಃ ಫ್ರಿಜ್ನಲ್ಲಿ ಇಟ್ಟಿದ್ದರಿಂದ, ಅದರಲ್ಲಿದ್ದ ಎಲ್ಲ ಐಸ್ಕ್ರೀಂಗಳನ್ನೂ ತೆಗೆಯಬೇಕಾಯಿತು. ಇದರಿಂದ ನಷ್ಟವಾಗಿದೆ. ಹಾಗಾಗಿ ಆ್ಯಂಡರ್ಸನ್ ಐಸ್ಕ್ರೀಂ ಕಂಪನಿಗೆ 1565 ಯುಎಸ್ ಡಾಲರ್ಗಳನ್ನು ಪಾವತಿಸಬೇಕು, 1000 ಯುಎಸ್ ಡಾಲರ್ಗಳಷ್ಟು ದಂಡ ತುಂಬಬೇಕು ಮತ್ತು 30 ದಿನಗಳ ಕಾಲ ಜೈಲು ಶಿಕ್ಷೆ ಅನುಭವಿಸಬೇಕು ಎಂದು ನ್ಯಾಯಾಲಯ ಮಾ.5ರಂದು ತೀರ್ಪು ನೀಡಿದೆ.
ಈ ಯುವಕ ತನ್ನ ವಿಡಿಯೋ ಚಿತ್ರೀಕರಣಕ್ಕಾಗಿ ಮಾತ್ರ ಹೀಗೆ ಮಾಡಿದ್ದ. ಬಳಿಕ ಖಾಲಿಯಾದ ಐಸ್ಕ್ರೀಂ ಕಪ್ನ್ನು ಫ್ರಿಜ್ನಿಂದ ತೆಗೆದು, ಅದನ್ನು ತೆಗೆದುಕೊಂಡು ಹೋಗಿದ್ದು ಸೂಪರ್ಮಾರ್ಕೆಟ್ನಲ್ಲಿದ್ದ ಸಿಸಿಟಿವಿ ಕ್ಯಾಮರಾದಲ್ಲಿ ಸೆರೆಯಾಗಿತ್ತು. ಪ್ರಕರಣ ದಾಖಲಾಗುತ್ತಿದ್ದಂತೆ ಯುವಕ ಮತ್ತು ಅವನ ತಂದೆ ಪೊಲೀಸರೆದುರು ಐಸ್ಕ್ರೀಂಗೆ ಬಿಲ್ ಮಾಡಿದ್ದನ್ನು, ರಶೀದಿ ಪಡೆದಿದ್ದನ್ನು ತೋರಿಸಿದರೂ ಪ್ರಯೋಜನವಾಗಲಿಲ್ಲ. ಸಾರ್ವಜನಿಕವಾಗಿ ಇಂಥದ್ದೆಲ್ಲ ಒಳ್ಳೆಯದಲ್ಲ, ಆರೋಗ್ಯ, ಸ್ವಚ್ಛತೆಗೆ ಸಂಬಂಧ ಪಟ್ಟ ವಿಚಾರ ಎಂದು ಹೇಳಿದ ಪೊಲೀಸರು ಇದನ್ನೊಂದು ಅಪರಾಧ ಎಂದೇ ಪರಿಗಣಿಸಿದರು.
ಈ ಹಿಂದೆ ಹುಡುಗಿಯೋರ್ವಳು ಇಂಥದ್ದೇ ವಿಡಿಯೋ ಮಾಡಿ ಸೋಷಿಯಲ್ ಮೀಡಿಯಾದಲ್ಲಿ ಹರಿಬಿಟ್ಟಿದ್ದಳು. ಆಕೆ ಇನ್ನೂ 17 ವರ್ಷದವಳಾದ ಕಾರಣ ಜೈಲಿಗೆ ಹಾಕಿರಲಿಲ್ಲ ಎಂದು ವರದಿಯಾಗಿದೆ. (ಏಜೆನ್ಸೀಸ್)