ನೈಜೀರಿಯಾ: ಸದ್ಯ ಇಡೀ ಜಗತ್ತು ಕೊರೊನಾ ವೈರಸ್ ಬಗ್ಗೆ ವಿಪರೀತ ತಲೆಕೆಡಿಸಿಕೊಂಡಿದ್ದರೆ ಆಫ್ರಿಕನ್ ಕಂಟ್ರಿ ನೈಜೀರಿಯಾದಲ್ಲಿ ಮತ್ತೊಂದು ಭೀಕರ ವೈರಸ್ ಸದ್ದಿಲ್ಲದೆ ಜನರನ್ನು ಬಲಿಪಡೆಯುತ್ತಿದೆ.
2020ನೇ ವರ್ಷ ಪ್ರಾರಂಭದಿಂದ ನೈಜೀರಿಯಾದ ಸುಮಾರು 19 ರಾಜ್ಯಗಳಲ್ಲಿ ಲಾಸ್ಸಾ ವೈರಸ್ ಸೋಂಕು ಹರಡಿದೆ. ಈ ಜ್ವರಕ್ಕೆ ಈಗಾಗಲೇ 41 ಜನರು ಮೃತಪಟ್ಟಿದ್ದು 258 ಮಂದಿಗೆ ಸೋಂಕು ತಗುಲಿದ್ದು ದೃಢಪಟ್ಟಿದೆ. ಅದರಲ್ಲಿ ಏಳು ಮಂದಿ ಆರೋಗ್ಯ ಕಾರ್ಯಕರ್ತರಲ್ಲಿಯೂ ಸೋಂಕು ಪತ್ತೆಯಾಗಿದೆ.
ಈ ವೈರಸ್ ಹೆಚ್ಚಾಗಿ 11 ರಿಂದ 40 ವರ್ಷದವರೆಗಿನವರಲ್ಲಿ ಕಂಡುಬರುತ್ತಿದೆ ಎಂದು ನೈಜೀರಿಯನ್ ಸೆಂಟರ್ ಫಾರ್ ಡಿಸೀಸ್ ಕಂಟ್ರೋಲ್ (ನೈಜೀರಿಯನ್ ರೋಗ ನಿಯಂತ್ರಣಾ ಕೇಂದ್ರ)ನ ಅಧಿಕಾರಿಗಳು ತಿಳಿಸಿದ್ದಾರೆ.
ಇದೊಂದು ರಕ್ತಸ್ರಾವಯುಕ್ತ ಜ್ವರವಾಗಿದ್ದು ಮೊದಲು ಉತ್ತರ ನೈಜೀರಿಯಾದ ಲಾಸ್ಸಾ ಎಂಬ ಪಟ್ಟಣದಲ್ಲಿ ಕಾಣಿಸಿಕೊಂಡಿತು. ಅದೇ ಕಾರಣಕ್ಕೆ ಈ ವೈರಸ್ಗೆ ಲಾಸ್ಸಾ ಎಂದು ಹೆಸರಿಡಲಾಗಿದೆ.
ರಕ್ತಸ್ರಾವ, ಸುಸ್ತು, ತಲೆನೋವು, ವಾಂತಿ, ಸ್ನಾಯು ಸೆಳೆತಗಳು ಲಾಸ್ಸಾ ಜ್ವರದ ಲಕ್ಷಣಗಳು. ಆದರೆ ಲಾಸಾ ಅಷ್ಟು ಬೇಗ ಪತ್ತೆಯಾಗುವುದು ಕಷ್ಟ ಎನ್ನಲಾಗಿದೆ. ಲಾಸ್ಸಾ ವೈರಸ್ನಿಂದ ಸಂಭವಿಸುವ ಸಾವಿನ ಪ್ರಮಾಣ ಶೇ.1 ರಷ್ಟು ಎಂದು ವಿಶ್ವಸಂಸ್ಥೆ ತಿಳಿಸಿದೆ.
ಯುಎಸ್ನ ರೋಗ ನಿಯಂತ್ರಣಾ ಕೇಂದ್ರಗಳ ಪ್ರಕಾರ ಪಶ್ಚಿಮ ಆಫ್ರಿಕಾದ ಕೆಲವು ಪ್ರದೇಶಗಳಲ್ಲಿ ಲಾಸ್ಸಾ ವೈರಸ್ ಪ್ರತಿವರ್ಷವೂ ಸಾಮಾನ್ಯವಾಗಿದೆ. ಸುಮಾರು 1 ಲಕ್ಷದಿಂದ 3 ಲಕ್ಷದಷ್ಟು ಜನರಿಗೆ ಸೋಂಕು ತಗುಲುತ್ತದೆ. ಅದರಲ್ಲಿ ಸುಮಾರು 5000 ಮಂದಿ ಸಾಯುತ್ತಾರೆ. (ಏಜೆನ್ಸೀಸ್)