Thursday, 13th December 2018  

Vijayavani

ಕಬ್ಬು ದರ ಬಾಕಿ ನೀಡಲು ರೈತರ ಆಗ್ರಹ -ಸುವರ್ಣ ಸೌಧದಕ್ಕೆ ಮುತ್ತಿಗೆ ಯತ್ನ - ಪೊಲೀಸರೊಂದಿಗೆ ಅನ್ನದಾತರ ಜಟಾಪಟಿ        ರಾಜಸ್ಥಾನ ಸಿಎಂ ಆಗಿ ಗೆಹ್ಲೋಟ್ ಹೆಸರು ಫೈನಲ್ - ರಾಹುಲ್ ಆಪ್ತ ಸಚಿನ್ ಪೈಲಟ್​ಗೆ ಡಿಸಿಎಂ ಪಟ್ಟ - ಅಧಿಕೃತ ಘೋಷಣೆ ಬಾಕಿ        ಬಳ್ಳಾರಿಯ ಮೈಲಾರದಲ್ಲಿ ಗೊರವಯ್ಯನ ಗಲಾಟೆ - ಸಣ್ಣಪ್ಪ ಮಲ್ಲಪ್ಪನವರಿಗೆ ಗೊರವಯ್ಯನ ದೀಕ್ಷೆ ಕೊಟ್ಟಿದ್ದಕ್ಕೆ ವಿರೋಧ         ಟ್ರಿನಿಟಿ ಸರ್ಕಲ್​​ನಲ್ಲಿ ಮೆಟ್ರೋ ಪಿಲ್ಲರ್ ಬಿರುಕು - ಜೀವದ ಜತೆ ಚೆಲ್ಲಾಟ ಬೇಡ - ದಿಗ್ವಿಜಯ ನ್ಯೂಸ್ ಜತೆ ಎಕ್ಸ್​​ಪರ್ಟ್​​ಗಳ ಮಾತು        ತಿರುವನಂತಪುರದಲ್ಲಿ ಬಿಜೆಪಿ ಕಾರ್ಯಕರ್ತರ ಪ್ರತಿಭಟನೆ -ಹಿಂಸಾಚಾರಕ್ಕೆ ಯತ್ನ, ಪೊಲೀಸರಿಂದ ಲಾಠಿಚಾರ್ಜ್       
Breaking News

ಫೋಮೋದಿಂದ ಜೋಮೋವರೆಗೆ

Wednesday, 19.09.2018, 3:03 AM       No Comments

ಲುದೊಡ್ಡ ಸಂಖ್ಯೆಯ ಗ್ರಾಹಕರ ಕೈಗೆ ಸ್ಮಾರ್ಟ್​ಫೋನ್ ತಲುಪಿಸಿದ್ದು ಆಂಡ್ರಾಯ್ಡ್ ಕಾರ್ಯಾಚರಣ ವ್ಯವಸ್ಥೆಯ ಹೆಗ್ಗಳಿಕೆ. ಆಂಡ್ರಾಯ್ಡ್ ಬಳಸಿದ ಮೊದಲ ಮೊಬೈಲ್ ಫೋನ್ ಎಂದು ಹೆಸರಾಗಿರುವ ‘ಎಚ್​ಟಿಸಿ ಡ್ರೀಮ್ ಪರಿಚಯವಾಗಿ ಬರುವ 23ಕ್ಕೆ ಹತ್ತು ವರ್ಷ. ಸ್ಮಾರ್ಟ್​ಫೋನ್ ನಮ್ಮ ಬದುಕನ್ನು ಆವರಿಸಿರುವ ಬಗೆಯ ಕುರಿತು ಈ ಸಂದರ್ಭದಲ್ಲಿ ಒಂದು ನೋಟ…

ತಂತ್ರಜ್ಞಾನದ ಹೊಸ ಸವಲತ್ತುಗಳು ಕಾಲಕಾಲಕ್ಕೆ ನಮ್ಮ ಸಂಪರ್ಕಕ್ಕೆ ಬರುವುದು ಸಾಮಾನ್ಯ ಸಂಗತಿ; ಅವು ನಮ್ಮ ಬದುಕಿನ ಮೇಲೆ ಬೇರೆಬೇರೆ ಮಟ್ಟದಲ್ಲಿ ಪರಿಣಾಮ ಬೀರುವುದೂ ಸಾಮಾನ್ಯವೇ. ರೇಡಿಯೋದಿಂದ ಕಂಪ್ಯೂಟರ್​ವರೆಗೆ, ತಂತಿ ಸಂದೇಶದಿಂದ ವಾಟ್ಸ್​ಆಪ್​ವರೆಗೆ ಇಂತಹ ಅನೇಕ ಉದಾಹರಣೆಗಳನ್ನು ನಾವು ನೋಡಬಹುದು.

ಇಂತಹ ಸವಲತ್ತುಗಳ ಪೈಕಿ ಕೆಲವು, ಬೇರೆ ಸವಲತ್ತುಗಳ ಹೋಲಿಕೆಯಲ್ಲಿ, ನಮ್ಮನ್ನು ಕೊಂಚ ಹೆಚ್ಚಾಗಿಯೇ ಪ್ರಭಾವಿಸುತ್ತವೆ. ಅದರಲ್ಲಿ ಕೆಲವನ್ನಂತೂ ಬಿಟ್ಟಿರುವುದೇ ಕಷ್ಟ ಎನ್ನಿಸುವ ಪರಿಸ್ಥಿತಿಯೂ ನಿರ್ವಣವಾಗುತ್ತದೆ. ಈಚಿನ ವರ್ಷಗಳಲ್ಲಿ ಇಂತಹ ವಿಶೇಷ ಸ್ಥಾನ ಪಡೆದುಕೊಂಡಿರುವ ಸವಲತ್ತುಗಳ ಪೈಕಿ ಅಗ್ರಸ್ಥಾನ ಸಲ್ಲುವುದು ಸ್ಮಾರ್ಟ್​ಫೋನ್​ಗಳಿಗೆ. ಬ್ಲಾ್ಯಕ್​ಬೆರಿ ಹಾಗೂ ಐಫೋನ್​ನಿಂದ ಶುರುವಾಗಿ ಆಂಡ್ರಾಯ್ಡ್ ಫೋನ್​ಗಳ ಮೂಲಕ ಹೆಚ್ಚಿದ ಅವುಗಳ ಜನಪ್ರಿಯತೆ ಕಳೆದ ಒಂದು ದಶಕದ ಅವಧಿಯಲ್ಲಿ ಅಗಾಧವಾಗಿ ಬೆಳೆದಿದೆ. ಹೀಗಾಗಿ ಇಂದು ನಮ್ಮ ಬದುಕಿನಲ್ಲಿ ಸ್ಮಾರ್ಟ್​ಫೋನ್​ಗೆ ಎಲ್ಲಿಲ್ಲದ ಮಹತ್ವ.

ಪ್ರಪಂಚದ ಮೂಲೆಮೂಲೆಗಳ ನಡುವೆ ಸಂವಹನವನ್ನು ಕ್ಷಣಾರ್ಧದಲ್ಲಿ ಸಾಧ್ಯವಾಗಿಸುವ ಈ ಸಾಧನಕ್ಕೆ ಇಷ್ಟು ಗೌರವ ಸಲ್ಲಲೇಬೇಕು, ನಿಜ. ಆದರೆ ಬೆಳಗ್ಗೆ ಎದ್ದಾಗಿನಿಂದ ರಾತ್ರಿ ಮಲಗುವವರೆಗೆ ಪ್ರತಿಯೊಂದು ಕ್ಷಣದಲ್ಲೂ ಸ್ಮಾರ್ಟ್​ಫೋನ್ ನಮ್ಮೊಡನೆ ಇರಬೇಕು ಎನಿಸುವ ಪರಿಸ್ಥಿತಿಯೂ, ಗೊತ್ತಿದ್ದೋ ಗೊತ್ತಿಲ್ಲದೆಯೋ, ಅನೇಕ ಬಳಕೆದಾರರಲ್ಲಿ ನಿರ್ವಣವಾಗಿಬಿಟ್ಟಿದೆ.

ಮೀಟಿಂಗ್​ನಲ್ಲಿ ಕುಳಿತಾಗ, ಊಟಕ್ಕೆ ಹೋದಾಗ, ಕಡೆಗೆ ಟಿವಿ ನೋಡುವಾಗಲೂ ಸ್ಮಾರ್ಟ್​ಫೋನ್ ಇವರ ಜತೆಯಲ್ಲಿರುತ್ತದೆ. ಒಂದೊಮ್ಮೆ ಮೊಬೈಲ್ ಬದಿಗಿಟ್ಟರೂ ಥಟ್ಟನೆ ಬರುವ ಯಾವುದೋ ಒಂದು ನೋಟಿಫಿಕೇಶನ್ ಅದನ್ನು ಮತ್ತೆ ಕೈಗೆತ್ತಿಕೊಳ್ಳುವಂತೆ ಮಾಡುತ್ತದೆ. ಕೆಲಸಮಯ ಯಾವುದೇ ನೋಟಿಫಿಕೇಶನ್ ಬಾರದಿದ್ದರೆ ಯಾಕೋ ಏನೂ ಬರಲೇ ಇಲ್ಲವಲ್ಲ ಎಂದು ನೋಡಲಾದರೂ ಇವರು ಮೊಬೈಲ್ ಮತ್ತೆ ಕೈಗೆತ್ತಿಕೊಳ್ಳುತ್ತಾರೆ. ಇನ್ನು ಅದರ ಬ್ಯಾಟರಿ ಮುಗಿದುಹೋಯಿತು ಅಥವಾ ಮೊಬೈಲ್ ಜಾಲದ ಸಂಪರ್ಕ ತಪ್ಪಿಹೋಯಿತು ಎಂದರಂತೂ ಚಡಪಡಿಕೆಯೇ ಶುರುವಾಗಿಬಿಡುತ್ತದೆ.

ಈ ಪರಿಸ್ಥಿತಿಯನ್ನು ತಜ್ಞರು ‘ಫಿಯರ್ ಆಫ್ ಮಿಸ್ಸಿಂಗ್ ಔಟ್(ಫೋಮೋ)’, ಅರ್ಥಾತ್ ಹೊರಗುಳಿಯುವ ಭೀತಿ ಎಂದು ಗುರುತಿಸುತ್ತಾರೆ. ಈ ಭೀತಿಗೆ ಕಾರಣ – ಕೊಂಚ ಹೊತ್ತು ಮೊಬೈಲ್ ಕೈಯಲ್ಲಿಲ್ಲದಿದ್ದರೆ, ವಾಟ್ಸ್ ಆಪ್​ನಲ್ಲಿ ಇಣುಕದಿದ್ದರೆ, ಸಾಮಾಜಿಕ ಜಾಲತಾಣಗಳಲ್ಲಿ ಅಡ್ಡಾಡದಿದ್ದರೆ ಅಲ್ಲಿನ ವಿದ್ಯಮಾನಗಳು ನಮಗೆ ತಿಳಿಯುವುದಿಲ್ಲ ಎನ್ನುವ ಅನಿಸಿಕೆ. ಎಲ್ಲರೊಡನೆಯೂ ಯಾವಾಗಲೂ ಸಂಪರ್ಕದಲ್ಲಿರಬೇಕು, ಸಂದೇಶ ಕಳುಹಿಸಿದವರಿಗೆ ಥಟ್ಟನೆ ಉತ್ತರಿಸಬೇಕು ಎನ್ನುವ ಬಯಕೆಯೂ ಇದಕ್ಕೆ ಕಾರಣವಾಗಬಹುದು. ಕೈಗೆ ಸಿಕ್ಕಿದ ಸಂದೇಶಗಳನ್ನು ಅದೇಕ್ಷಣದಲ್ಲಿ ಸಿಕ್ಕವರಿಗೆಲ್ಲ ಕಳಿಸಿಬಿಡುವುದೂ ಈ ಭೀತಿಯದೇ ಇನ್ನೊಂದು ರೂಪ.

ಹೊರಗುಳಿಯುವ ಭೀತಿಯ ಪರಿಣಾಮಗಳು ಹಲವು ಬಗೆಯದಾಗಿರುವುದು ಸಾಧ್ಯ. ಅರಿವಿಗೇ ಬಾರದಂತೆ ಸಮಯ ವ್ಯರ್ಥವಾಗುವುದು ಇಂತಹ ಪರಿಣಾಮಗಳಲ್ಲಿ ಪ್ರಮುಖವಾದದ್ದು. ಫೇಸ್​ಬುಕ್​ನಲ್ಲಿ ಸಮಯ ಕಳೆಯುವುದೇ ಗೊತ್ತಾಗುವುದಿಲ್ಲ. ಸಾಮಾಜಿಕ ಜಾಲತಾಣಗಳಲ್ಲಿ ಕಾಣುವ ಇತರರ ಜೀವನಶೈಲಿಗೆ ನಮ್ಮದನ್ನು ಹೋಲಿಸಿಕೊಂಡು ಕೀಳರಿಮೆ ಅನುಭವಿಸುವುದು, ನಾವು ಹಾಕಿದ ಚಿತ್ರ ಇಲ್ಲವೇ ಸಂದೇಶಕ್ಕೆ ಪ್ರತಿಕ್ರಿಯೆಯೇ ಬರಲಿಲ್ಲವೆಂದು ಕೊರಗುವುದು ಕೂಡ ಇಂಥದ್ದೇ ಇನ್ನಷ್ಟು ಪರಿಣಾಮಗಳು.

ಈ ಭೀತಿಯನ್ನು ದೂರಮಾಡುವ ನಿಟ್ಟಿನಲ್ಲಿ ಮೊದಲ ಹೆಜ್ಜೆಯೆಂದರೆ ಮೊಬೈಲ್ ಬಳಕೆ ಕಡಿಮೆ ಮಾಡುವುದು. ಹೀಗೆ ಮಾಡಿದರೆ ಹೊರಗುಳಿಯುವ ಭೀತಿಯನ್ನು ಸುಲಭವಾಗಿ ದೂರಮಾಡಬಹುದು ಎನ್ನುವುದು ಇದರ ಉದ್ದೇಶ. ಆದರೆ ಇದನ್ನು ಸಾಧ್ಯವಾಗಿಸುವುದು ಹೇಳಿದಷ್ಟು ಸುಲಭವಲ್ಲ. ಹೀಗಾಗಿಯೇ ಈ ಕೆಲಸದಲ್ಲೂ ನೆರವಾಗುವ ತಂತ್ರಾಂಶಗಳನ್ನು ಪರಿಚಯಿಸಲಾಗುತ್ತಿದೆ.

ಸ್ಮಾರ್ಟ್​ಫೋನ್ ಬೆಳವಣಿಗೆಗೆ ಮಹತ್ವದ ಕೊಡುಗೆ ನೀಡಿದ ಆಂಡ್ರಾಯ್ಡ್ ಕಾರ್ಯಾಚರಣ ವ್ಯವಸ್ಥೆಯೇ ಇಂತಹ ಪ್ರಯತ್ನಗಳ ಮುಂಚೂಣಿಯಲ್ಲಿರುವುದು ವಿಶೇಷ. ಇದೀಗ ಘೊಷಣೆಯಾಗಿರುವ ಆಂಡ್ರಾಯ್ಡ್ ಹೊಸ ಆವೃತ್ತಿಯಲ್ಲಿ (ಆಂಡ್ರಾಯ್ಡ್ ಪೈ) ಮೊಬೈಲ್ ಬಳಕೆ ಕಡಿಮೆಗೊಳಿಸುವ ಕೆಲ ಪ್ರಯತ್ನಗಳನ್ನು ಅಳವಡಿಸಿಕೊಳ್ಳಲಾಗಿದೆ.

ಯೂಟ್ಯೂಬ್​ನಲ್ಲಿ ಪ್ರತಿದಿನ ನಾವು ಎಷ್ಟು ನಿಮಿಷಗಳಷ್ಟು ವೀಡಿಯೋ ನೋಡುತ್ತಿದ್ದೇವೆ, ಇತರ ಆಪ್​ಗಳಲ್ಲಿ ಎಷ್ಟು ಸಮಯ ಕಳೆಯುತ್ತಿದ್ದೇವೆ ಎಂಬ ಮಾಹಿತಿಯನ್ನೆಲ್ಲ ಗ್ರಾಹಕರಿಗೆ ತೋರಿಸುವುದು ಇಂತಹ ಪ್ರಯತ್ನಗಳಲ್ಲೊಂದು. ಈ ಮಾಹಿತಿಯ ಆಧಾರದ ಮೇಲೆ ನಮ್ಮ ಬಳಕೆಯನ್ನು ನಾವೇ ನಿಯಂತ್ರಿಸಿಕೊಳ್ಳುವ ಸೌಲಭ್ಯವೂ ಗ್ರಾಹಕರಿಗೆ ದೊರಕಲಿದೆ. ನಾವು ನಿರ್ಧರಿಸಿಕೊಂಡ ಅವಧಿಗಿಂತ ಹೆಚ್ಚು ಹೊತ್ತು ವೀಡಿಯೋ ನೋಡುತ್ತಿದ್ದರೆ, ಇತರ ಯಾವುದೋ ಆಪ್ ಬಳಸುತ್ತಿದ್ದರೆ ನಮ್ಮ ಮೊಬೈಲೇ ನಮಗೆ ಎಚ್ಚರಿಕೆಯ ಸಂದೇಶ ತೋರಿಸುತ್ತದೆ!

ಇದೇ ರೀತಿ ವಿವಿಧ ಆಪ್​ಗಳು ನಮಗೆ ತೋರಿಸುವ ನೋಟಿಫಿಕೇಶನ್​ಗಳ ಮೇಲೂ ಹೆಚ್ಚಿನ ನಿಯಂತ್ರಣ ಗ್ರಾಹಕರಿಗೆ ದೊರಕಲಿದೆ. ನಿರ್ದಿಷ್ಟ ಅವಧಿಯಲ್ಲಿ ಯಾವುದೇ ನೋಟಿಫಿಕೇಶನ್ ಬಾರದಂತೆ ನೋಡಿಕೊಳ್ಳುವ ಆಯ್ಕೆಯೂ ಇರಲಿದೆ. ಇಂತಹ ಸೌಲಭ್ಯಗಳನ್ನೆಲ್ಲ ಬಳಸಿಕೊಂಡು ಗ್ರಾಹಕರು ಮೊಬೈಲ್ ಬಳಕೆ ಸಾಧ್ಯವಾದಷ್ಟೂ ಕಡಿಮೆ ಮಾಡಿಕೊಳ್ಳಲಿದ್ದಾರೆ ಎನ್ನುವುದು ಈ ಪ್ರಯತ್ನಗಳ ಆಶಯ. ಹೊರಗುಳಿಯುವ ಭೀತಿಯಿಂದ ವರ್ಚುಯಲ್ ಲೋಕದಲ್ಲೇ ಉಳಿದು ಭೌತಿಕ ಜಗತ್ತಿನ ಅನುಭವಗಳನ್ನು ತಪ್ಪಿಸಿಕೊಳ್ಳುವುದು ಬೇಡ, ಅದರ ಬದಲು ಸಾಧ್ಯವಾದಾಗಲೆಲ್ಲ – ಅದು ಎಷ್ಟು ಕಡಿಮೆ ಸಮಯವಾದರೂ ಸರಿ – ವರ್ಚುಯಲ್ ಲೋಕದಿಂದ ಹೊರಗುಳಿಯುವ ಖುಷಿಯನ್ನು (ಜಾಯ್ ಆಫ್ ಮಿಸ್ಸಿಂಗ್ ಔಟ್, ಜೋಮೋ) ಅನುಭವಿಸುವುದು ಒಳ್ಳೆಯದು ಎಂದು ತಜ್ಞರು ಹೇಳುತ್ತಾರೆ. ಸೋಶಿಯಲ್ ಮೀಡಿಯಾ ವಾಗ್ವಾದದ ಬದಲು ಮೊಬೈಲ್ ಇಲ್ಲದ ಮುಖಾಮುಖಿ ಚರ್ಚೆಯನ್ನೇ ಮಾಡುವುದು, ತಿಂಡಿ ಚಿತ್ರಕ್ಕೆ ಲೈಕ್-ಕಮೆಂಟ್ ಹಾಕುತ್ತ ಕೂರುವ ಬದಲು ಮೊಬೈಲ್ ಪಕ್ಕಕ್ಕಿಟ್ಟು ಗೆಳೆಯರೊಡನೆ ತಿಂಡಿ ತಿನ್ನಲು ಹೋಗುವುದು, ಸ್ವಲ್ಪಹೊತ್ತು ಮೊಬೈಲ್​ನಿಂದ ದೂರವಿದ್ದು ಪುಸ್ತಕ ಓದುವುದು ಒಳ್ಳೆಯದು ಎನ್ನುವುದು ಅವರ ಅನಿಸಿಕೆ.

ಇಷ್ಟೆಲ್ಲ ಹೇಳಿದ ಮೇಲೆ, ನಮ್ಮ ಆಯ್ಕೆ ಏನೆಂದು ನಾವೇ ತೀರ್ವನಿಸಿಕೊಳ್ಳಬೇಕು. ಹೊರಗುಳಿಯುವ ಭೀತಿಯೋ, ಹೊರಗುಳಿಯುವ ಖುಷಿಯೋ?

Leave a Reply

Your email address will not be published. Required fields are marked *

Back To Top