ನವದೆಹಲಿ: ಮಧ್ಯಮ ವರ್ಗದ ಜನರ ಅಚ್ಚುಮೆಚ್ಚಿನ ಕಾರು ಟಾಟಾ ನ್ಯಾನೋ ಇದೀಗ ಎಲೆಕ್ಟ್ರಿಕ್ ಅವತರಣಿಕೆಯಲ್ಲಿ ಮಾರುಕಟ್ಟೆಗೆ ಬರಲಿದೆ. ಈ ಹಿಂದೆ 2020ರಲ್ಲಿ ಟಾಟಾ ನ್ಯಾನೋದ ಉತ್ಪಾದನೆಯನ್ನೇ ನಿಲ್ಲಿಸಲಾಗಿತ್ತು. ಹೀಗಾಗಿ ನ್ಯಾನೋ ಕಾರಿನ ಎಲೆಕ್ಟ್ರಿಕ್ ಆವೃತ್ತಿ ಈ ಕಾರಿಗೆ ಪುನರ್ಜನ್ಮವನ್ನೇ ನೀಡಲಿದೆ ಎಂದು ಹೇಳಲಾಗುತ್ತಿದೆ.
ಈಗಾಗಲೇ ಟಾಟಾ ಮೋಟರ್ಸ್ ವಿವಿಧ ರೀತಿಯ ಎಲೆಕ್ಟ್ರಿಕ್ ಕಾರುಗಳನ್ನು ಮಾರುಕಟ್ಟೆಗೆ ಪರಿಚಯಿಸಿದೆ. ಟಾಟಾ ಟಿಯಾಗೋ, ಟಿಗೋರ್, ನೆಕ್ಸಾನ್ ಇವಿ ಕಾರುಗಳ ಸಾಲಿಗೆ ಇದೀಗ ಎಲೆಕ್ಟ್ರಿಕ್ ನ್ಯಾನೋ ಸೇರಲಿದೆ. ಇದರಿಂದ ದೇಶದ ವಿವಿಧ ವರ್ಗಗಳ ಜನರು ಎಲೆಕ್ಟ್ರಿಕ್ ವಾಹನಗಳನ್ನು ಖರೀದಿಸುವಂತೆ ಆಗಲಿದೆ.
ಟಾಟಾ ಮೋಟರ್ಸ್, ಹಳೆ ನ್ಯಾನೋ ಕಾರಿನ ಪೆಟ್ರೋಲ್ ಇಂಜಿನ್ ತೆಗೆದು ಎಲೆಕ್ಟ್ರಿಕ್ ಮೋಟರ್ ಹಾಕಲ್ಲವಂತೆ. ಬದಲಾಗಿ ಈ ಕಾರನ್ನು ಎಲೆಕ್ಟ್ರಿಕ್ ಗಾಡಿಯಾಗಿ ಮರು ವಿನ್ಯಾಸ ಮಾಡಲಾಗಿದೆ ಅಂತೆ. ಹೊಸ ವಿನ್ಯಾಸದ ನ್ಯಾನೋನಲ್ಲಿ ಹೊಸ ಸಸ್ಪೆಂಶನ್, ಟಯರ್ಗಳು ಹಾಗೂ ಬಾಡಿಯನ್ನೂ ಹೊಸತಾಗಿ ವಿನ್ಯಾಸ ಮಾಡಿದ್ದಾರೆ. ಈ ಕಾರಿನ ಡಿಸೈನ್ ಆಧುನಿಕ ಲುಕ್ ಪಡೆಯಲಿದ್ದು ಡ್ಯಾಶ್ ಬೋರ್ಡ್ನಲ್ಲಿ ಆಧುನಿಕ ಟೆಕ್ನಾಲಜಿಯನ್ನು ಸೇರಿಸಲಾಗಿದೆ.
ಇದರ ಎಲೆಕ್ಟ್ರಿಕ್ ಮೋಟರ್ ಸಿಟಿ ಲಿಮಿಟ್ನಲ್ಲಿ ಸಂಚರಿಸಲು ಯೋಗ್ಯವಾಗಿರುವಂತೆ ಡಿಸೈನ್ ಮಾಡಲಾಗಿದೆ. ಇದನ್ನು ಒಮ್ಮೆ ಚಾರ್ಜ್ ಮಾಡಿದರೆ 200 ಕಿಮೀ ತನಕ ಓಡಲಿದೆ ಎಂದು ಹೇಳಲಾಗುತ್ತಿದೆ.
ಇದರ ಬೆಲೆ ಜನರ ಕೈಗೆ ಎಟುಕುವಂತಿದ್ದರೆ ಮೆಟ್ರೋಪಾಲಿಟನ್ ನಗರದಲ್ಲಿ ಭಾರೀ ಜನಪ್ರಿಯ ಆಗಲಿದೆ ಎಂದೇ ಹೇಳಲಾಗುತ್ತಿದೆ. ಇದಿಷ್ಟೇ ಅಲ್ಲದೇ ಟಾಟಾ ಮೋಟರ್ಸ್ ಮುಂದಿನ 5 ವರಷಗಳಲ್ಲಿ 10ಕ್ಕೂ ಹೆಚ್ಚು ಬ್ಯಾಟರಿ ಚಾಲಿತ ಕಾರುಗಳನ್ನು ಮಾರುಕಟ್ಟೆಗೆ ಪರಿಚಯಿಸಲು ಮುಂದಾಗಿದೆ. (ಏಜೆನ್ಸೀಸ್)