ಗುವಾಹಟಿ: ಉಪನಾಯಕ ಋತುರಾಜ್ ಗಾಯಕ್ವಾಡ್ (123*, 57 ಎಸೆತ, 13 ಬೌಂಡರಿ, 7 ಸಿಕ್ಸರ್) ಅಬ್ಬರದ ಶತಕದ ನಡುವೆಯೂ ಭಾರತ ತಂಡ ಮೂರನೇ ಟಿ20ಯಲ್ಲಿ ಪ್ರವಾಸಿ ಆಸ್ಟ್ರೇಲಿಯಾ ಎದುರು 5 ವಿಕೆಟ್ಗಳಿಂದ ಪರಾಭವಗೊಂಡಿದೆ. ಗ್ಲೆನ್ ಮ್ಯಾಕ್ಸ್ವೆಲ್ (104*ರನ್, 48 ಎಸೆತ, 8 ಬೌಂಡರಿ, 8 ಸಿಕ್ಸರ್) ಶತಕದ ಸಾಹಸದಿಂದ ಸೂರ್ಯಕುಮಾರ್ ಬಳಗಕ್ಕೆ ಹ್ಯಾಟ್ರಿಕ್ ಗೆಲುವು ತಪ್ಪಿಸಿದ ಆಸೀಸ್, ಹಿನ್ನಡೆಯನ್ನು 1-2ಕ್ಕೆ ತಗ್ಗಿಸಿ 5 ಪಂದ್ಯಗಳ ಸರಣಿಯನ್ನು ಜೀವಂತವಿರಿಸಿದೆ.
https://x.com/CricCrazyJohns/status/1729553647472681029?s=20
ಬರ್ಸಾಪುರ ಅಂಗಣದಲ್ಲಿ ನಡೆದ ಪಂದ್ಯದಲ್ಲಿ ಆರಂಭಿಕ ಆಘಾತದ ಬಳಿಕ, ಋತುರಾಜ್ – ತಿಲಕ್ ವರ್ಮ (31*) ಜೋಡಿ 4ನೇ ವಿಕೆಟ್ಗೆ ಕಲೆಹಾಕಿದ 149 ರನ್ಗಳ ಜತೆಯಾಟದ ಬಲದಿಂದ ಭಾರತ 3 ವಿಕೆಟ್ಗೆ 222 ರನ್ ಪೇರಿಸಿತು. ಪ್ರತಿಯಾಗಿ ಆಲ್ರೌಂಡರ್ ಮ್ಯಾಕ್ಸ್ವೆಲ್ ಶತಕದ ಸಾಹಸದಿಂದ ಆಸೀಸ್ ತಂಡ ಭರ್ತಿ 20 ಓವರ್ಗಳಲ್ಲಿ 5 ವಿಕೆಟ್ಗೆ 225 ರನ್ಗಳಿಸಿ ಜದ ನಗೆ ಬೀರಿತು.
ಆರ್ಭಟಿಸಿದ ಋತುರಾಜ್: ಮೊದಲ 22 ರನ್ಗಳಿಸಲು ಅಷ್ಟೇ ಎಸೆತ ತೆಗೆದುಕೊಂಡಿದ್ದ ಋತುರಾಜ್, ಬಳಿಕ 35 ಎಸೆತಗಳಲ್ಲಿ 101 ರನ್ ಕಸಿದರು. ಸೂರ್ಯಕುಮಾರ್ ನಿರ್ಗಮನದ ಬಳಿಕ ಅಬ್ಬರಿಸಿದ ಋತುರಾಜ್ ಆಸೀಸ್ ಬೌಲರ್ಗಳನ್ನು ಕಾಡಿದರು. ತಿಲಕ್ ವರ್ಮ (31*) ಹಾಗೂ ಋತುರಾಜ್ ಜೋಡಿ 4ನೇ ವಿಕೆಟ್ಗೆ 59 ಎಸೆತಗಳಲ್ಲಿ ಬರೋಬ್ಬರಿ 149 ರನ್ ಕಸಿಯಿತು. ಪಂದ್ಯದ 12ನೇ ಓವರ್ ಬಳಿಕ ರನ್ಗಳಿಕೆಗೆ ಚುರುಕು ಮುಟ್ಟಿಸಿದ ಋತುರಾಜ್, 18ನೇ ಓವರ್ನಲ್ಲಿ 3 ಸಿಕ್ಸರ್, ಬೌಂಡರಿ ಸಹಿತ 25 ರನ್ ಚಚ್ಚಿದರು. ಇದರೊಂದಿಗೆ ಶತಕ ಸನಿಹ ತಲುಪಿದರು. ಮ್ಯಾಕ್ಸ್ವೆಲ್ ಎಸೆದ ಇನಿಂಗ್ಸ್ನ ಕೊನೇ ಓವರ್ನ ಮೊದಲ ಎಸೆತವನ್ನು ಮಿಡ್ ವಿಕೆಟ್ನಿಂದ ಸಿಕ್ಸರ್ಗಟ್ಟಿ 52 ಎಸೆತಗಳಲ್ಲಿ ಟಿ20ಯಲ್ಲಿ ಚೊಚ್ಚಲ ಶತಕ ಪೂರೈಸಿದರು. ಮ್ಯಾಕ್ಸ್ವೆಲ್ರ ಈ ಓವರ್ನಲ್ಲಿ 30 ರನ್ ಕಸಿದ ಟೀಮ್ ಇಂಡಿಯಾ ಸರಣಿಯಲ್ಲಿ ಸತತ ಮೂರನೇ ಬಾರಿಗೆ 200 ಪ್ಲಸ್ ರನ್ ಕಲೆಹಾಕಿತು. ಅಂತಿಮ ಐದು ಓವರ್ನಲ್ಲಿ ಆಸೀಸ್ ಬೌಲರ್ಗಳು 79 ರನ್ ಬಿಟ್ಟುಕೊಟ್ಟರು.
1: ಋತುರಾಜ್ ಗಾಯಕ್ವಾಡ್ ಟಿ20ಯಲ್ಲಿ ಆಸ್ಟ್ರೇಲಿಯಾ ಎದುರು ಶತಕ ಸಿಡಿಸಿದ ಮೊದಲ ಭಾರತೀಯ ಎನಿಸಿದರು. ಜತೆಗೆ ಆಸೀಸ್ ಎದುರು ಗರಿಷ್ಠ ವೈಯಕ್ತಿಕ ರನ್ಗಳಿಸಿದ ಬ್ರೆಂಡನ್ ಮೆಕ್ಕಲಂ (116) ದಾಖಲೆ ಮುರಿದರು.
2. ಋತುರಾಜ್ ಗಾಯಕ್ವಾಡ್ ಟಿ20ಯಲ್ಲಿ ಅತಿಹೆಚ್ಚು ರನ್ಗಳಿಸಿದ ವಿರಾಟ್ ಕೊಹ್ಲಿ (122*) ದಾಖಲೆಯನ್ನು ಹಿಂದಿಕ್ಕೆ 2ನೇ ಸ್ಥಾನಕ್ಕೇರಿದರು. ಶುಭಮಾನ್ ಗಿಲ್ (126*) ಅಗ್ರಸ್ಥಾನದಲ್ಲಿದ್ದಾರೆ.
9. ಋತುರಾಜ್ ಗಾಯಕ್ವಾಡ್ ಟಿ20ಯಲ್ಲಿ ಭಾರತದ ಪರ ಶತಕ ಸಿಡಿಸಿದ 9ನೇ ಬ್ಯಾಟರ್. ರೋಹಿತ್ ಶರ್ಮ (4), ಸೂರ್ಯಕುಮಾರ್ (3), ಕೆಎಲ್ ರಾಹುಲ್ (2), ಸುರೇಶ್ ರೈನಾ, ವಿರಾಟ್ ಕೊಹ್ಲಿ, ದೀಪಕ್ ಹೂಡಾ, ಶುಭಮಾನ್ ಗಿಲ್, ಯಶಸ್ವಿ ಜೈಸ್ವಾಲ್ ಮೊದಲಿಗರು.