ನವದೆಹಲಿ: ವಿಶ್ವ ಉದ್ದೀಪನ ನಿಗ್ರಹ ಘಟಕದ (ವಾಡಾ) ನಿಯಮಾವಳಿ ಉಲ್ಲಂಘಿಸಿರುವ ಹಿನ್ನೆಲೆಯಲ್ಲಿ ದಕ್ಷಿಣ ಆಫ್ರಿಕಾದ ಕ್ರೀಡಾ ವಲಯ ಕಠಿಣ ಕ್ರಮ ಎದುರಿಸುವ ಭೀತಿಯಲ್ಲಿದೆ. ಅದರಲ್ಲೂ ಪ್ರಮುಖವಾಗಿ, ಪ್ರಸಕ್ತ ಭಾರತದಲ್ಲಿ ಏಕದಿನ ವಿಶ್ವಕಪ್ನಲ್ಲಿ ಆಡುತ್ತಿರುವ ದಕ್ಷಿಣ ಆಫ್ರಿಕಾದ ಕ್ರಿಕೆಟ್ ತಂಡ ಹೆಚ್ಚಿನ ಬಿಸಿ ಎದುರಿಸುವ ಅಪಾಯದಲ್ಲಿದೆ. ಒಂದು ವೇಳೆ ತಂಡ ವಿಶ್ವಕಪ್ನಲ್ಲಿ ಮುಂದುವರಿದರೂ, ದಕ್ಷಿಣ ಆಫ್ರಿಕಾ ದೇಶದ ರಾಷ್ಟ್ರಧ್ವಜದ ಬಳಕೆ ನಿರ್ಬಂಧಿಸಲ್ಪಡಲಿದೆ. ಶ್ರೀಲಂಕಾ ವಿರುದ್ಧದ ಪಂದ್ಯದಲ್ಲಿ ರನ್ಮಳೆ ಹರಿಸಿ ವಿಶ್ವಕಪ್ನಲ್ಲಿ ಭರ್ಜರಿ ಆರಂಭ ಕಂಡಿರುವ ಹರಿಣಗಳಿಗೆ ಇದು ಆಘಾತಕಾರಿ ಬೆಳವಣಿಗೆಯಾಗಿದೆ.
ದಕ್ಷಿಣ ಆಫ್ರಿಕಾದ ರಾಷ್ಟ್ರೀಯ ಉದ್ದೀಪನ ಸಂಸ್ಥೆ (ನಾಡೋ), ವಾಡಾದ 2021ರ ನೀತಿಸಂಹಿತೆ ಉಲ್ಲಂಘಿಸಿದೆ ಎಂದು ವಾಡಾದ ಕಾರ್ಯಕಾರಿ ಸಮಿತಿ ತೀರ್ಮಾನಿಸಿದ್ದು, ಈ ಸಂಬಂಧ ತೆಗೆದುಕೊಳ್ಳುವ ಕ್ರಮದ ಬಗ್ಗೆ ಅಕ್ಟೋಬರ್ 14ರಂದು ಅಂತಿಮ ತೀರ್ಪು ಪ್ರಕಟಿಸಲಿದೆ. ಆದರೆ ದಕ್ಷಿಣ ಆಫ್ರಿಕಾಕ್ಕೆ ತಕ್ಷಣವೇ ಮೇಲ್ಮನವಿ ಸಲ್ಲಿಸಲು ಅವಕಾಶವಿದೆ. ಇದರಿಂದ ಅದು ನಿಷೇಧದ ಜಾರಿಯನ್ನು ಸ್ವಲ್ಪ ಸಮಯ ಮುಂದೂಡಬಹುದು ಮತ್ತು ಕ್ರಿಕೆಟ್ ತಂಡಕ್ಕೆ ವಿಶ್ವಕಪ್ ಅಭಿಯಾನ ಪೂರ್ಣಗೊಳಿಸಲು ಅವಕಾಶ ಕಲ್ಪಿಸಬಹುದು.
ಈಗಾಗಲೆ ರಷ್ಯಾಗೆ 2019ರಿಂದ ಒಲಿಂಪಿಕ್ಸ್ ಸಹಿತ ಪ್ರಮುಖ ಕ್ರೀಡಾಕೂಟಗಳಿಂದ ನಿಷೇಧ ಹೇರಿರುವ ವಾಡಾ, ಇದೀಗ ದಕ್ಷಿಣ ಆಫ್ರಿಕಾದ ಜತೆಗೆ ಬಮುರ್ಡಾಗೂ ನಿಷೇಧ ಹೇರುವ ಸಿದ್ಧತೆಯಲ್ಲಿದೆ. ಈ ಹಿಂದೆ ವರ್ಣಭೇದಕ್ಕಾಗಿ ದಕ್ಷಿಣ ಆಫ್ರಿಕಾ 32 ವರ್ಷಗಳ ಕಾಲ ಒಲಿಂಪಿಕ್ಸ್ನಿಂದ ನಿಷೇಧಕ್ಕೊಳಗಾಗಿತ್ತು. ಇದೇ ಕಾರಣಕ್ಕಾಗಿ ಐಸಿಸಿ ಕೂಡ 1970ರಿಂದ 1991ರವರೆಗೆ ಹರಿಣಗಳನ್ನು ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡದಂತೆ ತಡೆದಿತ್ತು.
ವಿಶ್ವಕಪ್ನಲ್ಲಿ ಪಾಕ್ ವಿರುದ್ಧ ಪಂದ್ಯದಲ್ಲಿ ಕೇಸರಿ ಜೆರ್ಸಿ ಧರಿಸುವುದೇ ಟೀಮ್ ಇಂಡಿಯಾ?