ಮುಂಬೈ: ತೊಂಬತ್ತರ ದಶಕದಲ್ಲಿ ಟಾಪ್ ನಟಿಯರಲ್ಲಿ ಸ್ಥಾನ ಗಿಟ್ಟಿಸಿಕೊಂಡಿದ್ದ ಸೋನಾಲಿ ಬೇಂದ್ರೆ ಅಪ್ರತಿಮ ಸೌಂದರ್ಯ ಹಾಗೂ ನಟನಾ ಕೌಶಲ್ಯವಿದ್ದರೂ ಬೆರಳಣಿಕೆ ಚಿತ್ರದಲ್ಲಷ್ಟೇ ಕಾಣಿಸಿಕೊಂಡಿದ್ದಾರೆ. ತಾವು ಬಹುಬೇಡಿಕೆ ನಟಿಯಾಗಿದ್ದರು, ಚಿತ್ರಗಳ ಸಂಖ್ಯೆ ಕಡಿಮೆ ಹೇಗಾಯಿತು ಎಂಬುದನ್ನು ಈಗ ಬಹಿರಂಗಪಡಿಸಿದ್ದಾರೆ.
ಬಾಲಿವುಡ್ನಲ್ಲಿ ತಮಗೇಕೆ ದೊಡ್ಡ ಹೆಸರು ಮಾಡಲು ಸಾಧ್ಯವಾಗಲಿಲ್ಲ, ಅಲ್ಲದೇ ಬಾಲಿವುಡ್ನಲ್ಲಿ ಹೆಚ್ಚು ಸಿನಿಮಾಗಳಲ್ಲಿ ನಟಿಸಲು ಸಾಧ್ಯವಾಗಲಿಲ್ಲ ಎಂಬ ಬಗ್ಗೆಯೂ ಹೇಳಿರುವ ನಟಿ ಸೋನಾಲಿ, ಬಾಲಿವುಡ್ನ ಕರಾಳತೆಯ ಬಗ್ಗೆ ಮೊದಲ ಬಾರಿಗೆ ಹಂಚಿಕೊಂಡಿದ್ದಾರೆ.
ಬಾಲಿವುಡ್ಗೆ ಭೂಗತ ಜಗತ್ತಿನ ನಂಟಿತ್ತು, ಎಂಬ ವಿಷಯವನ್ನು ಧೈರ್ಯವಾಗಿಯೇ ಹೇಳಿದ್ದಾರೆ. ಈ ಹಿಂದೆ ಬಾಲಿವುಡ್ನ ಬಗ್ಗೆ ಟೀಕಿಸುತ್ತಿದ್ದ ಕಂಗನಾ ನಂತರ ಇದೀಗ ನಟಿ ಸೋನಾಲಿ ಬೇಂದ್ರೆ ಕೂಡ ಬಾಲಿವುಡ್ನಲ್ಲಿ ಒಳರಾಜಕೀಯಗಳು ಯಾವ ರೀತಿ ಇತ್ತು ಎಂಬುದನ್ನು ತಿಳಿಸಿದ್ದಾರೆ.
90 ರದಶಕದಲ್ಲಿ ಸಾಕಷ್ಟು ಸಿನಿಮಾಗಳ ಅವಕಾಶವಿತ್ತು, ಆ ಸಮಯದಲ್ಲಿ ಬಾಲಿವುಡ್ ಮೇಲಿದ್ದ ಭೂಗತ ಲೋಕದ ಪ್ರಭಾವದಿಂದ ಹೆಚ್ಚು ಅವಕಾಶಗಳು ಸಿಗಲಿಲ್ಲ, ಸಿಕ್ಕ ಅವಕಾಶಗಳು ಬೇರೆಯವರ ಪಾಲಾದವು ಎಂದು ನಟಿ ಸೋನಾಲಿ ಹೇಳಿದ್ದಾರೆ. ಕೆಟ್ಟ ಸಮಯದಲ್ಲಿ ತಮ್ಮ ತಮ್ಮ ಪತಿ ನಿರ್ಮಾಪಕ ಗೋಲ್ಡಿ ಬೇಲ್ ಸಹಾಯ ಮಾಡಿದರು ಆದ್ದರಿಂದ ಇಂದಿನವರೆಗೂ ಹೀಗೆಯೇ ಇರಲು ಸಾಧ್ಯವಾಯಿತು ಎಂದು ಹೇಳಿದ್ದಾರೆ.
ಅಪರಾಧಿ ಹಿನ್ನೆಲೆಯುಳ್ಳವರು ಹಣ ಹೂಡಿದ ಸಿನಿಮಾಗಳಲ್ಲಿ ನಟಿಸುವುದರಿಂದ ನಾನು ಹಿಂದೆ ಸರಿದೆ. ಆ ಸಮಯದಲ್ಲಿ ನನ್ನ ಬಾಯ್ಫ್ರೆಂಡ್ ಆಗಿದ್ದ ನನ್ನ ಪತಿ ಆ ವಿಷಯದಲ್ಲಿ ಸಹಾಯ ಮಾಡಿದರು. ನಾನು ಒಂದೇ ಪಾತ್ರಕ್ಕೆ ಫಿಕ್ಸ್ ಆಗಿರುತ್ತಿದ್ದೆ, ನಂತರ ಯಾರದ್ದೋ ಒತ್ತಾಯಕ್ಕೆ ಮಣಿದು ಆ ಪಾತ್ರವನ್ನೂ ನನ್ನಿಂದ ಪಡೆದು ಬೇರೆಯವರಿಗೆ ನೀಡಿದ್ದೂ ಇದೆ. ಆ ವೇಳೆ ನಿರ್ದೇಶಕರೋ, ಸಹ ನಟರು ಕ್ಷಮೆ ಕೇಳುವುದು ನಾನು ಪರವಾಗಿಲ್ಲ ಎನ್ನುವುದು ಸಾಮಾನ್ಯವಾಗಿತ್ತು. ಇದೇ ಕಾರಣದಿಂದ ಹೆಚ್ಚು ಸಿನಿಮಾಗಳಲ್ಲಿ ನಟಿಸಲು ಆಗಲಿಲ್ಲ ಎಂದು ಹೇಳಿಕೊಂಡಿದ್ದಾರೆ. (ಏಜೆನ್ಸೀಸ್)