ಕೊಚ್ಚಿ: ಕೇರಳದ ಚಿನ್ನ ಕಳ್ಳಸಾಗಣೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಹೊಸದೊಂದು ಮಾಹಿತಿ ಬಹಿರಂಗವಾಗಿದ್ದು, ಆರೋಪಿಗಳು ಶಾಸಕರೊಬ್ಬರಿಗಾಗಿ ಚಿನ್ನ ಕಳ್ಳಸಾಗಣೆ ನಡೆಸಿದ್ದರು ಎಂಬ ವಿಷಯ ಬೆಳಕಿಗೆ ಬಂದಿದೆ.
ಚಿನ್ನ ಕಳ್ಳಸಾಗಣೆ ಪ್ರಕರಣದಲ್ಲಿ ಸಿಲುಕಿ ಹಾಕಿಕೊಂಡಿರುವ ಆರೋಪಿಗಳ ಪೈಕಿ ಸಂದೀಪ್ ನಾಯರ್ ಎಂಬಾತನ ಪತ್ನಿ ಬಿ.ಎಸ್. ಸೌಮ್ಯ ಈ ವಿಷಯನ್ನು ವಿಚಾರಣೆ ವೇಳೆ ಬಾಯ್ಬಿಟ್ಟಿರುವುದು ಕಸ್ಟಮ್ಸ್ ಅಧಿಕಾರಿಗಳ ವರದಿಯಿಂದ ಬಹಿರಂಗಗೊಂಡಿದೆ.
ಕೊಜಿಕೋಡ್ ಜಿಲ್ಲೆಯ ಕೂಡುವಳ್ಳಿಯ ಶಾಸಕ ಕಾರಟ್ ರಜಾಕ್ ಹಾಗೂ ಕೂಡುವಳ್ಳಿ ಮುನಿಸಿಪಾಲಿಟಿಯ ಕೌನ್ಸಿಲರ್ ಕಾರಟ್ ಫೈಜಲ್ ಅವರಿಗಾಗಿ ತನ್ನ ಪತಿ ಚಿನ್ನ ಕಳ್ಳಸಾಗಣೆಯಲ್ಲಿ ತೊಡಗಿದ್ದಾಗಿ ಹೇಳಿಕೆ ನೀಡಿದ್ದಾರೆ.
ಎಲ್ಡಿಎಫ್ ಬೆಂಬಲಿತ, ಪಕ್ಷೇತರ ಶಾಸಕ ಕಾರಟ್ ರಜಾಕ್ ಹಾಗೂ ಕೌನ್ಸಿಲರ್ ಕಾರಟ್ ಫೈಜಲ್ ಅವರಿಗಾಗಿ ಸಂದೀಪ್ ಮತ್ತು ರಾಮೀಸ್ ಚಿನ್ನ ಸ್ಮಗ್ಲಿಂಗ್ ಮಾಡುತ್ತಿದ್ದರು ಎಂಬುದು ಗೊತ್ತಿತ್ತು. ಅದನ್ನು ಆಕ್ಷೇಪಿಸಿದ್ದಕ್ಕೆ ಸಂದೀಪ್ ಥಳಿಸುತ್ತಿದ್ದ ಬಗ್ಗೆಯೂ ಆತನ ಪತ್ನಿ ಸೌಮ್ಯ ಹೇಳಿಕೊಂಡಿರುವುದು ಕಸ್ಟಮ್ಸ್ ವರದಿಯಲ್ಲಿ ಉಲ್ಲೇಖವಾಗಿದೆ.
ಕಾರ್ಗೋನಲ್ಲಿ ಬಂದ ಬ್ಯಾಗೇಜ್ ವಿಲೇವಾರಿ ಸಂದರ್ಭ ಸ್ವಪ್ನ ಸುರೇಶ್ ಹಾಗೂ ಸರಿತ್ ನೆರವು ಸಿಗುತ್ತಿದ್ದ ಬಗ್ಗೆಯೂ ಸಂದೀಪ್ ಹೇಳಿಕೊಂಡಿದ್ದ ಎಂಬುದಾಗಿ ಸೌಮ್ಯ ಹೇಳಿಕೆ ನೀಡಿದ್ದಾರೆ. (ಏಜೆನ್ಸೀಸ್)