ಬೆಂಗಳೂರು: ಮೈಸೂರಿನಲ್ಲಿ ನಟ ನೀನಾಸಂ ಸತೀಶ್, ನಟಿ ಹರಿಪ್ರಿಯಾ, ನಿರ್ದೇಶಕ ವಿಜಯಪ್ರಸಾದ್ ‘ಪೆಟ್ರೊಮ್ಯಾಕ್ಸ್’ ಹಿಡಿದು ಓಡಾಡುತ್ತಿದ್ದಾರೆ. ದಸರಾ ಸಂಭ್ರಮದಲ್ಲಿ ಜಗಮಗಿಸುತ್ತಿರುವ ಮೈಸೂರಲ್ಲಿ ಇವರ್ಯಾಕೆ ‘ಪೆಟ್ರೊಮ್ಯಾಕ್ಸ್’ ಹಿಡಿದರು?!
‘ಪೆಟ್ರೊಮ್ಯಾಕ್ಸ್’ ಎಂದಾಕ್ಷಣ ಸಾಮಾನ್ಯವಾಗಿ ನೆನಪಿಗೆ ಬರುವುದು ಹಳೇ ಕಾಲದಲ್ಲಿ ಬೆಳಕಿಗಾಗಿ ಬಳಸುತ್ತಿದ್ದ ಲಾಟೀನು ಅಥವಾ ದಶಕಗಳ ಹಿಂದೆ ಸಿನಿಮಾವೊಂದರಲ್ಲಿ ಅನಂತ್ನಾಗ್ ಹೇಳಿದ್ದ ಆ ಪೆಟ್ರೊಮ್ಯಾಕ್ಸ್. ಆದರೆ ಇಲ್ಲೀಗ ‘ಪೆಟ್ರೊಮ್ಯಾಕ್ಸ್’ ಎಂಬುದು ಸಿನಿಮಾ ಟೈಟಲ್. ಅಂದರೆ, ವಿಜಯಪ್ರಸಾದ್ ನಿರ್ದೇಶನ ಹಾಗೂ ನೀನಾಸಂ ಸತೀಶ್-ಹರಿಪ್ರಿಯಾ ಅಭಿನಯದ ‘ಪೆಟ್ರೊಮ್ಯಾಕ್ಸ್’ ಸಿನಿಮಾಗೆ ಮೈಸೂರಲ್ಲಿ ಇಂದು ಮುಹೂರ್ತ ನಡೆದಿದೆ.
ಒಟ್ಟಿನಲ್ಲಿ ಹರಿಪ್ರಿಯಾ ಹಾಗೂ ಸತೀಶ್ ಇಬ್ಬರಿಗೂ ಇದು ವಿಶೇಷ ಎನಿಸಿಕೊಂಡಿದೆ. ಏಕೆಂದರೆ ವಿಜಯಪ್ರಸಾದ್ ನಿರ್ದೇಶನದಲ್ಲಿ ಹರಿಪ್ರಿಯಾ ನಟಿಸಿದ್ದ ‘ನೀರ್ದೋಸೆ’ ಸಿನಿಮಾ ಯಶಸ್ವಿಯಾಗಿದ್ದು, ಸಿನಿಪ್ರಿಯರಿಗೆ ಉತ್ತಮ ರಂಜನೆ ನೀಡಿತ್ತು. ಇದೀಗ ಅದೇ ನಿರ್ದೇಶಕರ ಆ್ಯಕ್ಷನ್-ಕಟ್ಗೆ ಹರಿಪ್ರಿಯಾ ಮತ್ತೊಮ್ಮೆ ಅಭಿನಯಿಸುತ್ತಿದ್ದರೆ, ನೀನಾಸಂ ಸತೀಶ್ಗೆ ಇದೇ ಮೊದಲ ಸಲ ಜೋಡಿಯಾಗಿ ಅಭಿನಯಿಸುತ್ತಿದ್ದಾರೆ.
ಇನ್ನು ನೀನಾಸಂ ಸತೀಶ್ ಅವರ ಅಭಿನಯದ ಎರಡೂ ಸಿನಿಮಾಗೆ ಇವತ್ತೇ ಮುಹೂರ್ತ ನಡೆದಿದೆ. ರಚಿತಾ ರಾಮ್ ಜತೆ ಅಭಿನಯಿಸುತ್ತಿರುವ ‘ಮ್ಯಾಟ್ನಿ’ ಹಾಗೂ ಹರಿಪ್ರಿಯಾ ಜತೆಗಿನ ‘ಪೆಟ್ರೊಮ್ಯಾಕ್ಸ್’ ಎರಡಕ್ಕೂ ಒಂದೇ ದಿನ ಮುಹೂರ್ತ ನಡೆದಿರುವ ಬಗ್ಗೆ ನೀನಾಸಂ ಖುಷಿ ಹಂಚಿಕೊಂಡಿದ್ದಾರೆ.