ಮುಂಬೈ: ಸಲ್ಮಾನ್ ಖಾನ್ ಅಭಿನಯದ “ರಾಧೇ’ ಇತ್ತೀಚೆಗಷ್ಟೇ ಬಿಡುಗಡೆಯಾಗಿದೆ. ಅಷ್ಟೇ ಅಲ್ಲ, ಚಿತ್ರದ ಬಗ್ಗೆ ಭಾರೀ ನಿರೀಕ್ಷೆಗಳನ್ನಿಟ್ಟುಕೊಂಡಿದ್ದ ಪ್ರೇಕ್ಷಕರಿಂದ ಜನರಿಂದ ಅತ್ಯಂತ ನೀರಸ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಸುಶಾಂತ್ ಸಿಂಗ್ ರಜಪೂತ್ ಅಭಿನಯದ “ದಿಲ್ ಬೇಚಾರಾ’ ಚಿತ್ರಕ್ಕೆ ಒಟಿಟಿಯಲ್ಲಿ ಮೊದಲ ದಿನ 95 ಮಿಲಿಯನ್ ವೀಕ್ಷಣೆ ಸಿಕ್ಕರೆ, “ರಾಧೇ’ಗೆ ಕೇವಲ 4.2 ಮಿಲಿಯನ್ ವೀಕ್ಷಣೆ ಸಿಕ್ಕದೆ. ಸಾಲದ್ದಕ್ಕೆ, ಸಲ್ಮಾನ್ ಚಿತ್ರಜಿವನದಲ್ಲೇ ಅತ್ಯಂತ ಕಡಿಮೆ ರೇಟಿಂಗ್ ಪಡೆದ ಚಿತ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಇಷ್ಟು ಸಾಕು, ಜನ ಈ ಚಿತ್ರವನ್ನು ಹೇಗೆ ಸ್ವೀಕರಿಸಿದ್ದಾರೆ ಎಂದು.
ಇದನ್ನೂ ಓದಿ: ಜೂನಿಯರ್ ಎನ್ಟಿಆರ್ ಜನ್ಮದಿನಕ್ಕೆ RRR ಚಿತ್ರತಂಡದಿಂದ ಭರ್ಜರಿ ಗಿಫ್ಟ್
ಈ ಚಿತ್ರದ ಮೂಲಕ ಸಲ್ಮಾನ್ ಹ್ಯಾಟ್ರಿಕ್ ಹೊಡೆದಿದ್ದಾರೆ. ಸತತವಾಗಿ ಸಲ್ಮಾನ್ ಅಭಿನಯದ ಮೂರು ಚಿತ್ರಗಳು ಪ್ರೇಕ್ಷಕರಿಗೆ ನಿರಾಸೆ ಮಾಡಿದೆ. ಮೂರು ವರ್ಷಗಳ ಹಿಂದೆ ಬಿಡುಗಡೆಯಾದ “ಟೈಗರ್ ಜಿಂದಾ ಹೇ’ ಚಿತ್ರವೇ ಕೊನೆ. ಆ ನಂತರ ಸಲ್ಮಾನ್ ಅಭಿನಯದ ಯಾವ ಚಿತ್ರವೂ ಹಿಟ್ ಆಗಿಲ್ಲ. “ಭಾರತ್’ ಮತ್ತು “ದಬಾಂಗ್ 3′ ಚಿತ್ರಗಳನ್ನು ಈ ಮೊದಲು ಫ್ಲಾಪ್ ಪಟ್ಟಿಗೆ ಸೇರಿಸಲಾಗಿತ್ತು. ಈಗ “ರಾಧೇ’ ಸಹ ಹೊಸ ಸೇರ್ಪಡೆಯಾಗಿದೆ.
ಇದನ್ನೂ ಓದಿ: ವೈರಸ್ಗೆ ಅಗೌರವ ತೋರಿದರೆ ಬಹಳಷ್ಟು ಜನರಿಗೆ ಬೇಸರವಾಗುತ್ತೆ: ಕಂಗನಾ
ಬರೀ ಸಲ್ಮಾನ್ ಅಷ್ಟೇ ಅಲ್ಲ, ಶಾರೂಖ್ ಖಾನ್ ಕಥೆ ಸಹ ಇದಕ್ಕಿಂತ ವಿಭಿನ್ನವಾಗೇನೂ ಇಲ್ಲ. ಶಾರೂಖ್ ಅಭಿನಯದ “ಜೀರೋ’, “ರಯೀಸ್’ ಮತ್ತು “ಫ್ಯಾನ್’ ಚಿತ್ರಗಳು ಬಾಕ್ಸ್ಆಫೀಸ್ನಲ್ಲಿ ಹೀನಾಯ ಸೋಲು ಕಾಣುವ ಮೂಲಕ ಈಗಾಗಲೇ ಅವರು ಹ್ಯಾಟ್ರಿಕ್ ಸೋಲಿನ ರುಚಿ ನೋಡಿದ್ದಾರೆ. ಇಷ್ಟು ದಿನ ಅವರೊಬ್ಬರೇ ಇದ್ದು, ಈಗ ಅವರ ಜತೆಗೆ ಸಲ್ಮಾನ್ ಸಹ ಸೇರಿಕೊಂಡಿದ್ದಾರೆ.