ನವದೆಹಲಿ: ಚೀನಾದಲ್ಲಿ ಮಹಾಮಾರಿಯಾಗಿ ಕಾಡುತ್ತಿರುವ ಕೊರೊನಾದ ಪರಿಣಾಮವನ್ನು ಭಾರತ ಎದುರಿಸುತ್ತಿದೆ. ಚೀನಾದಿಂದ ಭಾರತಕ್ಕೆ ಆಮದು ಸ್ಥಗಿತಗೊಂಡಿದ್ದು, ಎಲೆಕ್ಟ್ರಾನಿಕ್, ಸ್ಮಾರ್ಟ್ಫೋನ್, ಮೆಡಿಕಲ್ ಸೇರಿದಂತೆ ಎಲ್ಲ ಕ್ಷೇತ್ರಗಳ ಮೇಲೂ ಅದು ಹೊಡೆತ ನೀಡುತ್ತಿದೆ. ಇದೇ ಪರಿಸ್ಥಿತಿ ಮುಂದುವರೆದರೆ ಮುಂದಿನ ತಿಂಗಳಲ್ಲಿ ಭಾರತದಲ್ಲಿ ಅನೇಕ ಔಷಧಗಳು ಲಭ್ಯವಾಗುವುದಿಲ್ಲ ಮತ್ತು ಅನೇಕ ಔಷಧಗಳ ಬೆಲೆ ಹೆಚ್ಚಲಿದೆ ಎಂದು ಹೇಳಲಾಗಿದೆ.
ಚೀನಾದಿಂದ ಆಮದು ಸ್ಥಗಿತಗೊಂಡಿರುವ ಹಿನ್ನೆಲೆ ಫೆಡರೇಶನ್ ಆಫ್ ಇಂಡಿಯನ್ ಚೇಂಬರ್ಸ್ ಆಫ್ ಕಾಮರ್ಸ್ ಆ್ಯಂಡ್ ಇಂಡಸ್ಟ್ರಿ (ಎಫ್ಐಸಿಸಿಐ) ಭಾರತದ ಅನೇಕ ಇಂಡಸ್ಟ್ರಿಗಳಿಂದ ವರದಿ ಸಂಗ್ರಹಿಸಿದೆ. ಯಾವ ಯಾವ ಸಾಮಾಗ್ರಿಗಳ ಕೊರತೆ ಉಂಟಾಗಿದೆ ಎನ್ನುವುದನ್ನು ಪಟ್ಟಿ ಮಾಡಿದೆ. ಈ ಪಟ್ಟಿಯ ಅನುಸಾರ ಭಾರತದಲ್ಲಿ ಅತಿ ಹೆಚ್ಚು ಬಳಕೆಯಾಗುತ್ತಿರುವ ಪ್ಯಾರಸಿಟಮಾಲ್, ಐಬ್ರುಫಿನ್ ನಂತಹ ಔಷಧಗಳಲ್ಲಿ ಕೊರತೆ ಉಂಟಾಗುತ್ತಿದೆ.
ಚೀನಾದಿಂದ ಆಮದಾಗುವ ಈ ಔಷಧಗಳಿಗೆ ಭಾರತದ ಮಾರುಕಟ್ಟೆಯಲ್ಲಿ ಕೊರತೆಯಾಗಿದ್ದು, ಈ ತಿಂಗಳ ಅಂತ್ಯಕ್ಕೆ ಅವುಗಳು ಸಂಪೂರ್ಣವಾಗಿ ಖಾಲಿಯಾಗಬಹುದು ಎನ್ನಲಾಗಿದೆ. ಮುಂದಿನ ತಿಂಗಳೊಳಗೆ ಚೀನಾ ಕೊರೊನಾ ಮುಕ್ತವಾಗಿ ಸಹಜ ಸ್ಥಿತಿಗೆ ಬಾರದಿದ್ದರೆ ಹಲವು ಔಷಧಗಳ ಕೊರತೆ ಉಂಟಾಗಲಿದ್ದು, ವ್ಯಾಪಾರ ಸ್ಥಗಿತವಾಗಬಹುದು ಎಂದು ಎಫ್ಐಸಿಸಿಐ ತಿಳಿಸಿದೆ.
ಆಮದು ಇಲ್ಲದ ಕಾರಣ ಔಷಧಗಳ ಬೆಲೆ ಏರಿಕೆ ಮಾಡಬೇಕಾಗಬಹುದು ಎಂದು ಸಹ ಹೇಳಲಾಗಿದೆ. (ಏಜೆನ್ಸೀಸ್)