ಮುಂಬೈ: ಭಾರತೀಯ ಷೇರುಪೇಟೆಯಲ್ಲಿ ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್ (ಬಿಎಸ್ಇ) ಸೂಚ್ಯಂಕ ಸೆನ್ಸೆಕ್ಸ್ ಮತ್ತು ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ (ಎನ್ಎಸ್ಇ) ಸೂಚ್ಯಂಕ ನಿಫ್ಟಿ ಮಂಗಳವಾರವೂ ಏರಿಕೆ ಮುಂದುವರಿಸಿವೆ. ಸೆನ್ಸೆಕ್ಸ್ 43,000 ದ ಗಡಿ ದಾಟಿದರೆ, ನಿಫ್ಟಿ 12,600ರ ಗಡಿ ದಾಟಿದೆ.
ಕೋವಿಡ್ 19 ವಾಕ್ಸಿನ್ ಟ್ರಯಲ್ಸ್ ಗೆ ಸಂಬಂಧಿಸಿದ ಸುದ್ದಿಯ ಕಾರಣಕ್ಕೆ ಜಾಗತಿಕ ಮಾರುಕಟ್ಟೆಯ ವಹಿವಾಟಿನಲ್ಲಿ ಏರಿಕೆ ಕಂಡುಬಂದಿದೆ. ಇದು ಭಾರತೀಯ ಷೇರುಪೇಟೆಯ ಮೇಲೂ ಪರಿಣಾಮ ಬೀರಿದೆ. ಮಂಗಳವಾರದ ವಹಿವಾಟಿನಲ್ಲಿ ಸೆನ್ಸೆಕ್ಸ್ 43,316.44 ಅಂಶ ಏರಿಕೆ ದಾಖಲಿಸಿದ್ದು, ದಿನದ ಅಂತ್ಯಕ್ಕೆ 680.22 ಅಂಶ (1.60%) ಏರಿಕೆಯೊಂದಿಗೆ 43,277.65 ಅಂಶದಲ್ಲಿ ವಹಿವಾಟು ಕೊನೆಗೊಳಿಸಿದೆ. ನಿಫ್ಟಿ ಕೂಡ ಇಂಟ್ರಾ ಡೇ ವಹಿವಾಟಿನಲ್ಲಿ 12,643.90 ಅಂಶದ ಗರಿಷ್ಠ ಮಟ್ಟ ತಲುಪಿ, ದಿನದ ಅಂತ್ಯಕ್ಕೆ 170.05 ಅಂಶ (1.36%) ಏರಿಕೆಯೊಂದಿಗೆ 12,631.10 ಅಂಶದಲ್ಲಿ ವಹಿವಾಟು ಮುಗಿಸಿದೆ.
ಇದನ್ನೂ ಓದಿ: ಜಿಲ್ಲೆಯ ಸಹಕಾರ ಸಂಘಗಳಿಗೆ ಹೆಚ್ಚುವರಿ ಸಾಲ ನೀಡಲು 125 ಕೋಟಿ ಮೀಸಲು: ಡಿ.ಎಸ್.ಸುರೇಶ್
ಸೆನ್ಸೆಕ್ಸ್ ಪಟ್ಟಿಯಲ್ಲಿ ಬಜಾಜ್ ಫೈನಾನ್ಸ್ ಟಾಪ್ ಗೇನರ್ ಆಗಿದ್ದು ಶೇಕಡ 9 ಲಾಭಾಂಶ ದಾಖಲಿಸಿದೆ. ಇಂಡಸ್ ಇಂಡ್ ಬ್ಯಾಂಕ್, ಎಲ್ಆ್ಯಂಡ್ ಟಿ, ಬಜಾಜ್ ಫಿನ್ಸರ್ವ್, ಎಚ್ಡಿಎಫ್ಸಿ, ಎಸ್ಬಿಐ, ಐಸಿಐಸಿಐ ಬ್ಯಾಂಕ್, ಎಚ್ಡಿಎಫ್ಸಿ ಬ್ಯಾಂಕ್, ಒಎನ್ಜಿಸಿ ಮತ್ತು ಆ್ಯಕ್ಸಿಸ್ ಬ್ಯಾಂಕ್ ಗಳು ಕೂಡ ಲಾಭಾಂಶ ಗಳಿಸಿವೆ. ಇನ್ನೊಂದೆಡೆ ಟೆಕ್ ಮಹಿಂದ್ರಾ, ಎಚ್ಸಿಎಲ್ ಟೆಕ್, ಇನ್ಫೋಸಿಸ್, ನೆಸ್ಟ್ಲೆ ಇಂಡಿಯಾ, ಸನ್ ಫಾರ್ಮಾ, ಟಿಸಿಎಸ್ ಷೇರುಗಳು ನಷ್ಟ ಅನುಭವಿಸಿವೆ. (ಏಜೆನ್ಸೀಸ್)
ಮಾರ್ಚ್ 31ರೊಳಗೆ ಎಲ್ಲ ಖಾತೆಗಳೂ ಆಧಾರ್ ಜತೆ ಲಿಂಕ್ ಆಗಿರಬೇಕು: ಬ್ಯಾಂಕುಗಳಿಗೆ ಕೇಂದ್ರ ವಿತ್ತ ಸಚಿವರ ಸೂಚನೆ