ಮುರ್ಷಿದಾಬಾದ್: ದೇಶಾದ್ಯಂತ ಶಾಲಾ-ಕಾಲೇಜುಗಳು ಆನ್ಲೈನ್ ಶಿಕ್ಷಣದ ಮೊರೆ ಹೋಗಿವೆ. ಹಲವೆಡೆ ತಾಂತ್ರಿಕ ತೊಂದರೆಗಳಿಂದಾಗಿ ಎಲ್ಲ ವಿದ್ಯಾರ್ಥಿಗಳಿಗೆ ಆನ್ಲೈನ್ ತರಗತಿ ಸಿಗುತ್ತಿಲ್ಲ. ಆದಾಗ್ಯೂ ಅವರನ್ನೆಲ್ಲ ಕಡೆಗಣಿಸಿ ಶಿಕ್ಷಣ ಸಂಸ್ಥೆಗಳು ಆನ್ಲೈನ್ ತರಗತಿ ಮುಂದುವರಿಸಿವೆ. ಇವುಗಳ ನಡುವೆ ಪಶ್ಚಿಮ ಬಂಗಾಳದ ಗ್ರಾಮೀಣ ಶಾಲೆಯೊಂದು ದೇಶದ ಗಮನಸೆಳೆದಿದೆ.
ಪಶ್ಚಿಮ ಬಂಗಾಳದ ಮುರ್ಷಿದಾಬಾದ್ ಜಿಲ್ಲೆಯ ಬೆಲ್ಡಂಗಾ ಪ್ರದೇಶದಲ್ಲಿರುವ ಆಂಡಿರನ್ ಪ್ರೈಮರಿ ಸ್ಕೂಲ್(ಎಪಿಎಸ್) ಕೂಡ ಎಲ್ಲ ಶಾಲೆಗಳಂತೆ ಆನ್ಲೈನ್ ತರಗತಿಗಳನ್ನು ಆರಂಭಿಸಿತ್ತು. ಆದರೆ, 162 ವಿದ್ಯಾರ್ಥಿಗಳ ಪೈಕಿ 15 ವಿದ್ಯಾರ್ಥಿಗಳ ಪಾಲಕರ ಬಳಿ ಮಾತ್ರವೇ ಸ್ಮಾರ್ಟ್ಫೋನ್ ಇರುವ ಕಾರಣ ಉಳಿದವರು ಅದರಿಂದ ವಂಚಿತರಾಗಿದ್ದರು. ಈ ಶಾಲೆಯ ಶಿಕ್ಷಕರ ಮುತುವರ್ಜಿ ಎಷ್ಟರಮಟ್ಟಿಗೆ ಎಂದರೆ ಮಕ್ಕಳಿಗೆ ಪಾಠ ತಪ್ಪಿ ಹೋಗಬಾರದು ಎಂದು ಎಲ್ಲ ಶಿಕ್ಷಕರೂ ಚಿಂತನೆ ನಡೆಸಿ ಶಾಲಾ ತರಗತಿಯನ್ನೇ ಮಕ್ಕಳಿರುವಲ್ಲಿ ಕೊಂಡೊಯ್ಯುವ ಸಿದ್ಧತೆ ನಡೆಸಿದ್ರು.
ಇದನ್ನೂ ಓದಿ: ಸ್ಮಾರಕ ರಕ್ಷಣೆಗೆ ವಾಟರ್ ಪ್ರೂಫ್ ತಂತ್ರಜ್ಞಾನದ ಮೊರೆ!
ಎಪಿಎಸ್ನ ಹೆಡ್ಮಾಸ್ಟರ್ ಬಿಸ್ವಜಿತ್ ದತ್ತ ಈ ಬಗ್ಗೆ ಪ್ರತಿಕ್ರಿಯಿಸಿದ್ದು, ನಮ್ಮಲ್ಲಿ ಕಲಿಯುವ ಬಹುತೇಕ ವಿದ್ಯಾರ್ಥಿಗಳ ಪಾಲಕರು ಬಡವರು. ಅವರಿಗೆ ಸ್ಮಾರ್ಟ್ಫೋನ್ ತೆಗೆದುಕೊಳ್ಳುವುಷ್ಟು ಅಥವಾ ಇಂಟರ್ನೆಟ್ ಹೊಂದುವಷ್ಟು ಸಾಮರ್ಥ್ಯವಿಲ್ಲ. ಹೀಗಾಗಿ ನಾವೇ ಸುತ್ತಮುತ್ತಲಿನ ಪೂರ್ವಪಾರ, ದಾಸ್ಪಾರಾ, ಸಸ್ಟಿತಲ ಮತ್ತು ಇತರೆ ಪ್ರದೇಶಗಳಿಗೆ ತೆರಳಿ ಅಲ್ಲಿ ಸಾರ್ವಜನಿಕ ಪ್ರದೇಶದಲ್ಲಿ ಆಯಾ ಪ್ರದೇಶದ ಮಕ್ಕಳು ಸೇರಿಸಿ ವಾರಕ್ಕೆ ಎರಡು ಅಥವಾ ಮೂರು ತರಗತಿಗಳನ್ನು ನಡೆಸುತ್ತೇವೆ. ಈ ರೀತಿ ಒಟ್ಟು ಎಂಟು ಪ್ರದೇಶಗಳಲ್ಲಿ ತರಗತಿ ನಡೆಯುತ್ತಿವೆ. ಈ ತರಗತಿಗಳು ಬೆಳಗ್ಗೆ 9ರಿಂದ ಅಪರಾಹ್ನ 2 ಗಂಟೆ ತನಕ ಮಾತ್ರ ನಡೆಯುತ್ತವೆ. ಪ್ರತಿ ತರಗತಿಯಲ್ಲಿ 25 ಮಕ್ಕಳಷ್ಟೇ ಇರುತ್ತಾರೆ. ಕೋವಿಡ್ ನಿಯಮಗಳನ್ನು ಚಾಚೂ ತಪ್ಪದೆ ಪಾಲಿಸಲಾಗುತ್ತಿದೆ. ಸ್ಥಳೀಯರ ಸಹಕಾರವೂ ಇದಕ್ಕೆ ಸಿಕ್ಕಿದೆ ಎಂದು ವಿವರಿಸಿದ್ದಾರೆ. (ಏಜೆನ್ಸೀಸ್)