ಬೆಂಗಳೂರು: ಶಂಕರ್ ನಾಗ್ ನಿರ್ದೇಶನದ ‘ಗೀತಾ’ ಚಿತ್ರದ ಜನಪ್ರಿಯ ಪಾತ್ರಗಳು ಸಂಜು ಮತ್ತು ಗೀತಾ. ಆ ಚಿತ್ರದ ನಂತರ ಅದೆಷ್ಟೋ ಚಿತ್ರಗಳಲ್ಲಿ ನಾಯಕ-ನಾಯಕಿಯ ಪಾತ್ರ ಸಂಜು ಮತ್ತು ಗೀತಾ ಎಂದಾಗಿತ್ತು. ಅಷ್ಟೇ ಅಲ್ಲ, ಶ್ರೀನಗರ ಕಿಟ್ಟಿ ಮತ್ತು ರಮ್ಯಾ ಅಭಿನಯದಲ್ಲಿ ‘ಸಂಜು ವೆಡ್ಸ್ ಗೀತಾ’ ಎಂಬ ಚಿತ್ರ ತಯಾರಾಗಿ ಸೂಪರ್ ಹಿಟ್ ಸಹ ಆಗಿತ್ತು. ಈಗ ‘ಸಂಜು ಮತ್ತು ಗೀತಾ’ ಎಂಬ ಇನ್ನೊಂದು ಚಿತ್ರ ಸದ್ದಿಲ್ಲದೆ ಸೆಟ್ಟೇರಿದೆ.
ಇದನ್ನೂ ಓದಿ: ಬದುಕು ಬದಲಾಗಬಹುದು, ಭಾವನೆಗಳಲ್ಲ … ಮತ್ತೆ ಬರಲಿದೆ ‘ಮಾಯಾಮೃಗ’
ಆರ್.ಕೆ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ‘ಸಂಜು ಮತ್ತು ಗೀತಾ’ ಚಿತ್ರದಲ್ಲಿ ವಿನಯ್ ಕಾರ್ತಿಕ್ ಮತ್ತು ಸನ್ಮಿತಾ ನಾಯಕ-ನಾಯಕಿಯಾಗಿ ನಟಿಸುತ್ತಿದ್ದಾರೆ. ಇನ್ನು, ರಾಘವೇಂದ್ರ ರಾಜಕುಮಾರ್, ಭವ್ಯ, ಸ್ವಾತಿ, ದೊಡ್ಡರಂಗೇಗೌಡ ಮುಂತಾದ ಹಿರಿಯರು ಇದ್ದಾರೆ.
ಇದೊಂದು ನವೀರಾದ ಪ್ರೇಮಕಥೆ ಎನ್ನುವ ಆರ್ಕೆ, ‘ಕುಟುಂಬ ಸಮೇತ ನೋಡಬಹುದಾದ ಒಳ್ಳೆಯ ಚಿತ್ರ ಇದು. ಈ ಹಿಂದೆ ನನ್ನ ನಿರ್ದೇಶನದ ‘ಕಾಣೆಯಾಗಿದ್ದಾಳೆ’ ಚಿತ್ರದಲ್ಲಿ ನಾಯಕನಾಗಿ ನಟಿಸಿದ್ದ ವಿನಯ್ ಕಾರ್ತಿಕ್ ಈ ಚಿತ್ರದಲ್ಲೂ ನಾಯಕನಾಗಿ ಅಭಿನಯಿಸಿದ್ದಾರೆ. ಫ್ಯಾಮಿಲಿ ಆಡಿಯನ್ಸ್ ಒಪ್ಪುವಂತಹ ಕಥೆ ಇಲ್ಲಿದೆ. ಕಥೆಯನ್ನು ಐದು ಗುಲಾಬಿಗಳ ಮೂಲಕ ಹೇಳುವ ಪ್ರಯತ್ನ ಮಾಡುತ್ತಿದ್ದೇವೆ. ಕೆಂಪು ಗುಲಾಬಿ ಪ್ರೀತಿಯ ಸಂಕೇತ, ಹಳದಿ ಹೂವು ಸ್ನೇಹದ ಸಂಕೇತ. ಹೀಗೆ ಒಂದೊಂದು ಭಾವನೆಯನ್ನು ಒಂದೊಂದು ಹೂವಿನ ಮೂಲಕ ಹೇಳುವ ಪ್ರಯತ್ನವಾಗಲಿದೆ’ ಎನ್ನುತ್ತಾರೆ.
ಈ ಚಿತ್ರದ ಮೂಲಕ ಪ್ರೀತಿಯನ್ನು ಬರೀ ಪ್ರೇಮಿಗಳು ಒಪ್ಪುವುದಷ್ಟೇ ಅಲ್ಲ, ಎರಡೂ ಕುಟುಂಬದವರೂ ಒಪ್ಪಬೇಕು ಎಂದು ಹೇಳುವುದಕ್ಕೆ ಹೊರಟಿದ್ದಾರಂತೆ. ‘ನಾವು ಏನೇ ಮಾಡಿದರೂ ಸಮಾಜದ ನಡುವೆ ಬದುಕಬೇಕು. ಹಾಗಾಗಿ, ಅಲ್ಲಿ ಸರಿಯಾಗಿರಬೇಕು. ಈ ಚಿತ್ರಕ್ಕೂ ‘ಸಂಜು ವೆಡ್ಸ್ ಗೀತಾ’ ಚಿತ್ರಕ್ಕೂ ಯಾವುದೇ ಸಂಬಂಧವಿಲ್ಲ. ಅದೇ ಬೇರೆ ಜಾನರ್ನ ಚಿತ್ರ. ಇದೇ ಬೇರೆ ಜಾನರ್ನ ಚಿತ್ರ. ಮುಂದಿನ ವಾರದಿಂದ ಚಿತ್ರೀಕರಣ ಆರಂಭವಾಗಲಿದೆ’ ಎಂದು ಮಾಹಿತಿ ನೀಡುತ್ತಾರೆ ನಿರ್ದೇಶಕರು.
ಇದನ್ನೂ ಓದಿ: ಬ್ರಹ್ಮಾಸ್ತ್ರ ಬಿಡ್ತಾರಾ? ಕರ್ಣ ಆಗ್ತಾರಾ? ಯಶ್ ಮುಂದಿದೆ ಎರಡು ಆಯ್ಕೆಗಳು
‘ಸಂಜು ಮತ್ತು ಗೀತಾ’ ಚಿತ್ರದಲ್ಲಿ ‘ಮಜಾಭಾರತ’ದ ರಾಘವೇಂದ್ರ ಸೇರಿದಂತೆ ಹಲವರು ನಟಿಸುತ್ತಿದ್ದಾರೆ. ಚಿತ್ರಕ್ಕೆ ಕೌಶಿಕ್ ಸಂಗೀತ, ನಾಗರಾಜ್ ಛಾಯಾಗ್ರಹಣವಿದೆ. ಈ ಚಿತ್ರವನ್ನು ಸಂಜಯ್ ಮಾಗನೂರು ನಿರ್ಮಿಸುತ್ತಿದ್ದಾರೆ.